Nabbabiyaageetu Oyshaa . . .

Xoossay issi zariyaa haraappe xoqqu ootti xeellii?

▪ CHiikka. Geeshsha Maxaafay qoncciyan, “Xoossai asa som77o xeellenna; shin dere ubban baassi yayyiyaagaanne xillo ooso oottiyaagaa [galatees]” yaagees.—Oos. 10:34, 35.

Ha allaalliyaara gayttidaagan Xoossaa xeelay, polo gidenna asaa naatuugaappe keehi xoqqa. Daro asay issi zaree (darotoo baagee) haraappe yallisees giidi qoppees. Hegaa mala xeelay kaallidi deꞌiyaagaadan xaafida CHarles Darwina qofaa qonccissees: “Sinttappe issi wode, . . . eran keehi dichida asa zaree eri baynna asa zariyaa muleera xayssidi, hegaa sohuwaa laattana.” Bantta zaree yallisiyaabadan qoppiyaageeti hara darotu bolli wolqqaama qohuwaa gattiyoogee azzanttiyaaba.

Issi zaree haraappe yallisiyaabadan qoppiyoogee bessiyaabee? Leemisuwau, saynisee issi zaree meretan haraappe yallisa gidiyoogau naqaasha demmidee? Hegaappe dumma hanotan, asaa zariyaabaa xannaꞌiyaanne Okisford Yuniversttiyaa profeseree, Breyin Seykesi hagaadan giis: “Asaa zariyaa woykko sheeshshaa shaakki eranau maaddiyaabi aybinne asa jiiniyan deꞌenna. . . . Giriike asaa Di en ee woykko Xaaliyaa biittaa asa jiine giyoobi deꞌiyaakkonne asay tana darotoo oychees; shin hegaadan giyoobi baawa. . . . Nuuni ubbaban issi mala gaana danddayettees.”

Hegaa xeelliyaagan saynisee akeekidobay Geeshsha Maxaafay yootiyoobaara moggees. Xoossay issi bitaniyaanne issi maccaasiyo medhidoogaa, qassi asaa naatu ubbau denddoy he asata gidiyoogaa Geeshsha Maxaafay yootees. (Doo. 3:20; Oos. 17:26) Hegaa gishshau, Xoossay asaa naata ubbaa issi zaredan xeellees.

Asa meray woy somꞌꞌoy ay malakka gido, hegee Yihooway he uraa xeelliyo hanotan dummatetta medhenna. SHin i hara keehi koshshiyaabaa, giishin nu wozanan deꞌiyaabaa woykko nu garssa oonatettaa xoqqu oottidi xeellees. Yihooway, “Asi som77uwaa xeellees; shin GODAI wozanaa xeellees” yaagiis. (1 Sam. 16:7) Hegaa hassayiyoogee nuna keehippe minttettees. Waanidi?

Nu zaree awugaakka gido, nuuppe daroti nu meran woykko qottan ufayttokko; shin hegaa giigissanau nuussi wolqqi laafa. Gidoshin, keehippe koshshiya waannabaa, giishin nu wozanaa qofaanne nuussi siyettiyaabaa giigissana danddayoos. (Qol. 3:9-11) Nuna loytti qoriyo wode, nu zaree haraappe guuttaa yallisiyaabadan woykko guuxxiyaabadan qoppiyoogaa akeekana danddayoos. Ha naaꞌꞌu qofaykka Xoossaa qofaara moggenna gishshau, hegaa mala ay qofaakka gidin nu wozanaappe digganau baaxetana koshshees.—Maz. 139:23, 24.

Nu huuphiyaanne harata Yihooway xeelliyo ogiyan xeellanau baaxetiyo wode, i nuna maaddanaagaa ammanettana danddayoos. A Qaalay, “Ba kumetta wozanaappe GODAN ammanettiya asa minttettanau GODAA aifee sa7aa bollan ubbasaa xeellees” yaagidi nuna minttettiyaabaa yootees. (2 Odi. 16:9) Nu zaree awugaa gidikkokka, ha xiqisee yootiyoobay tuma.