NABBABIYAAGEETU OYSHAA
Eti Bashshaa Haattaappe kase deꞌidoogaa Doomettaabaa 6:2, 4y yootiyo “Xoossaa naati” oonee?
Eti ayyaana mereta gidida Xoossaa naata gidiyoogaa bessiya naqaashay deꞌees. SHin ayba naqaashee?
He xiqisetuppe koyroogee, “‘Xoossaa naata’ geetettiya meretati ha asaa macca naati puulanchcha gidiyoogaa be7idosona; be7idi etappe bantta dooridoogeeta machchidosona” yaagees.—Doo. 6:2.
Ibraysxxe Geeshsha Maxaafaa xuufeti koyro xaafettido doonan, Doomettaabaa 6:2, 4n, Iyyooba 1:6; 2:1; 38:7ninne Mazamure 89:6n “Tumu Xoossaa naata” yaagiya qofaynne “Xoossaa naata” yaagiya qofay deꞌees. Wolayttatto Geeshsha Maxaafankka Doomettaabaa 6:2, 4n hegaara issi mala qofay deꞌees. Ha xiqiseti “Xoossaa naata” geetettida he meretatubaa ay qonccissiyoonaa?
Iyyooba 1:6n (NW) “tumu Xoossaa naata” geetettidaageeti Yihoowa sinttan shiiqida ayyaana meretata. “Sa7an ubban yaanne haanne” yuuyida Seexaanaykka eta giddon deꞌees. (Iyy. 1:7; 2:1, 2) Hegaadankka, Iyyooba 38:4-7y (NW) Xoossay saꞌaa baasuwau shuchaa koyro wottido wode, “Xoossaa naati” ubbay ufayssau ililidoogaa yootees. He wode asaa naati merettibeenna gishshau, eti kiitanchata gidana bessees. Mazamure 89:6n (NW) “Xoossaa naata” geetettidaageeti asa gidennan, saluwan Xoossaara deꞌiya meretata gidiyoogee qoncce.
Yaatin, Doomettaabaa 6:2, 4n “Xoossaa naata” geetettidaageeti oonee? Qommoora beꞌido Geeshsha Maxaafaa qofaappe akeekiyoogaadan, he xiqisee ayyaana mereta gidida, saꞌaa yiida Xoossaa naatubaa yootees giyoogee bessiyaaba.
Issi issi asay kiitanchati asho gaytotettaa polanau koyana danddayiyoogaa ammananau metootees. Yesuusi yootido, Maatiyoosa 22:30n deꞌiya qofay saluwan deꞌiya meretati aqo oyqqennaagaanne asho gaytotettaa polennaagaa qonccissees. SHin, kiitanchati issi issitoo ashuwaa maayidosona; ubba eti asaara miidosonanne uyidosona. (Doo. 18:1-8; 19:1-3) Yaatiyo gishshau, eti ashuwaa maayiyo wode, maccaasaara asho gaytotettaa polana danddayoosona giidi kuuyiyoogee bessiyaaba.
Issi issi kiitanchati hegaadan oottidoogaa bessiya naqaashay Geeshsha Maxaafan deꞌees. Yihudaa 6, 7y banttau bessennabaa oottidi shaaramuxidanne shaaramuxanau qaaqqatida Sadooma asatu nagaraa “bantta de7iyoosaa aggidi, banttau imettida halaqatettaa naagibeenna” kiitanchatu nagaraara geeddarssees. He kiitanchatikka Sadooma asatikka banttau bessennabaa oottidi “shaaramuxidosonanne shaaramuxanau keehi qaaqqatidosona.” Hegaara issi mala qofay deꞌiyo, 1 PHeexiroosa 3:19, 20y azazettibeenna kiitanchatubaa ‘Nohe wodiyaara’ gattidi yootees. (2 PHe. 2:4, 5) Hegaa gishshau, azazettennan ixxida kiitanchati Nohe wode oottidobaa Sadoomanne Gamoora asati oottidobaara geeddarssana danddayettees.
Nuuni Doomettaabaa 6:2, 4n “Xoossaa naata” geetettidaageeti macca naatuura shori baynna asho gaytotettaa polida, ashuwaa maayida kiitanchata gidiyoogaa akeekiyo wode, hegaadan kuuyiyoogee bessiyaaba.
Geeshsha Maxaafay, Yesuusi “qashuwan de7iya ayyaanatukko biidi, etayyo qaalaa” yootidoogaa odees. (1 PHe. 3:19) Hegee woygiyoogee?
Kiitettida PHeexiroosi he ayyaanati Xoossay Nohe wode “danddayidi gam77ido wode,” Ayyo azazettibeennaageeta gidiyoogaa yootiis. (1 PHe. 3:20) PHeexiroosi yootidoy Seexaanaadan makkalida kiitanchatubaa gidiyoogee qoncce. Yihuday, “pirddaa ekkiyo gita gallassai gakkanaassi Xoossai eta naagiyoosan, [eti] xumaappe garssan merinau qashettidi” deꞌiyoogaa qonccissidi, “bantta de7iyoosaa aggidi, banttau imettida halaqatettaa naagibeenna” kiitanchatubaa yootiis.—Yih. 6.
Ayyaana meretati Nohe wode azazettibeennay ayba ogiyaanee? Bashshaa Haattaappe kase, ha iita ayyaanati ashuwaa maayidosona; hegee Xoossay etau halchibeennaba. (Doo. 6:2, 4) Hegaa bollikka, maccaasaara zinꞌꞌida he kiitanchati banttau bessennabaa oottidosona. Xoossay ayyaana meretati maccaasaara zinꞌꞌanaadan medhibeenna. (Doo. 5:2) Iita gidida ha makkalancha kiitanchata Xoossay ba keerido wodiyan xayssana. Yihuday giidoogaadan, haꞌꞌi eti ayyaana qasho keetta malaban “xumaappe garssan” deꞌoosona.
Yesuusi ‘qashuwan deꞌiya he ayyaanatuyyo’ awude sabbakidee; qassi waati sabbakidee? Yesuusi ‘ayyaanan paxi’ simmidi hegaadan oottidoogaa PHeexiroosi yootiis. (1 PHe. 3:18, 19) PHeexiroosi, “[Yesuusi] qaalaa yootiis” yaagidoogaakka akeeka. PHeexiroosi “yootiis” yaagidoogee, i koyro dabddaabbiyaa xaafanaappe kase Yesuusi sabbakidoogaa qonccissees. Hegaa gishshau, Yesuusi hayquwaappe denddi simmidi, iita ayyaanatuyyo eti ekkana bessiya qixaatiyaabaa yootennan waayi aggana. Yesuusi etau hidootay deꞌiyoogaa yootibeenna. I eti ekkana pirddaa yootiis. (Yona. 1:1, 2) Yesuusa ammanoynne i hayqqana gakkanaassi ammanettidaagaa gididi hayquwaappe denddidoogee Seexaanay a aynne oottana danddayennaagaa bessees; hegaa gishshau, hegaa mala pirddaa awaajjanau au baaso gidiyaabay deꞌees.—Yoh. 14:30; 16:8-11.
Sinttappe, Yesuusi Seexaanaakka he kiitanchatakka qachidi ciimma ollan yeggana. (Luq. 8:30, 31; Ajj. 20:1-3) He wode gakkanaassi, azazettennan ixxida he ayyaanati ayyaanaaban sakkana xuman deꞌoosona; qassi eti wurssettan xayanaagee qoncce.—Ajj. 20:7-10.