SINTTA HUUPHE YOHUWAA | SINTTANAABAA ERANA DANDDAYIYA URI DEꞌII?
Guuttabay Polettiis; Darobay Polettibeenna
Sinttappe hananabaa eranawu koyay? Daro asay hegaa eranawu koyees. Sinttappe hananabaa yootiya daro asay deꞌees; shin eti yootiyoobay polettees woy aggees. Kaallidi deꞌiyaabaa beꞌa:
SAYNTTISTTETI heeray hambbalaashettiyoogee wodeppe saꞌaa waatidi qohanaakko, qassi wontto ne heeran iray bukkanaakko agganaakko dumma dummabaa eridi yootanawu, wolqqaama miishshata goꞌettoosonanne daro miishshaa kessoosona.
YIGGIYOOGAN ERETTIDAAGEETI polotikaa hanotaanne zalꞌꞌiyaa hanotaa kasetidi yootoosona. Alamiyan keehi dure asatuppe issuwaa gidida Waren Bafeti zalꞌꞌiyaabaa kasetidi suure yootido gishshawu, issoti issoti i hananabaa yootiyaabadan xeellidosona. Hanotaa yiggiya Nat Silver giyo hara asi qassi issi issi hanotaa akeekidi, Amarkkan deꞌiya polotikaa hanotaappe biidi pilmiyaa oosuwan Holiwude woytuwaa ekkiya uraa gakkanawu kasetidi yootiis.
BENI GEETETTIDABAA asay hiraagadan xeellees. Leemisuwawu, issi issi asay Mishel di Notredami (Nostiradamesi) 16tta xeetu layttan xaafido maxaafatun deꞌiya qoncce gidennabay ha wodiyan polettiiddi deꞌiyaabadan qoppees. Issi issi asay Tisaase 21, 2012n wurida Maaya asaa kalanddaree alamiyan wolqqaama bashshay gakkiyoogaa bessiyaaba giidi qoppiis.
HAYMAANOOTIYAA KAALETTIYAAGEETI bantta asaa qoodaa gujjanawu alamiyan daafabay gakkanaagaa issi issitoo yootoosona. Alamiyan bashshay gakkanaagaa yootiya Harold Kamppeninne a erissiyo ashkkarati saꞌay 2011n xayanaagaa daro heeran yootidosona. SHin alamee xayibeennaagee qoncce.
KAAYIYAAGEETI sinttanaabaa yootana danddayoosona giidi asay ammanees. Edigar Kasinne Jin Diksena 20tta xeetu layttaa xeelliyaagan yootido issi issibati polettidosona. SHin eti naaꞌꞌaykka yootido darobati polettibookkona. Leemisuwawu, Diksena 1958n Heezzantto Alamiyaa Olay denddanaagaa yootaasu; qassi Kasi Niyoorkke katamay 1975 heeran abban muukettanaagaa yootiis.
Yaatin sinttanaabaa yootiya ammanttiyaabi deꞌii? Hegee oychana bessiyo oysha. Neeni sinttappe hananabaa eriyaaba gidiyaakko, ne deꞌoy haꞌꞌigaappe dummatana danddayees.