Nabbabiyaageetu Oyshaa

Yesuusi hayqqanaappe kase qammi kehiyaageeta giidoogeeti oonee, qassi he bonchcho sunttay etawu ayssi imettidee?

Yesuusi hayqqanaappe kase qammi, I kiittidoogeeti bantta mala Kiristtaanetuppe gitatanawu koyennaadan zoriis. I eta hagaadan giis: “Ha sa7an de7iya kawoti bantta asaa godatoosona. Eta haariyaageeti kehiyaageeta geetettoosona. SHin . . . intte hegaadan hanoppite.”—Luq. 22:25, 26.

Yesuusi kehiyaageeta giidoogeeti oonee? Beni Giriikenne Rooma biittatu wogan erettida asatanne haariyaageeta bonchchanawu Everiyetis woy Kehiyaageeta giyoogaa woocettidi xaafettidabay, santtimetinne xuufeti qonccissoosona. He asatuyyo he bonchchoy imettiyoy eti asawu maaddiya amaridabaa oottido gishshataassa.

Daro kawoti Kehiyaagaa giyo bonchcho sunttan xeesettidosona. Hegeetuppe amaridaageeti Tolema heezzanttuwaa, Everiyetisanne (247-222 K.K. heeran) Tolema hosppuntta, Everiyetis naaꞌꞌanttuwaa (147-117 K.K. heeran) giyo Gibxxe kawota. Yihudaa kawoy Gita Heeroodisi, Rooma biittaa haariya Yuuliyoos Qeesaarinne (48-44 K.K.) Awugisxxoosi (31 K.K.–14 M.L.) he bonchcho sunttan xeesettidosona. Heeroodisi he bonchcho sunttan xeesettidoy koshay denddin ba asaa ashshanawu kare biittappe gisttiyaa ehiissidonne hiyyeesatussi maayuwaa immido wode gidennan aggenna.

Geeshsha Maxaafaa erancha gidida Adolf Daysman giyo Jarmane bitanee yootidoogaadan, Kehiyaagaa giyo bonchcho sunttaa asay daro biittan goꞌettees. I, “Woocettidi xaafettidaban [he bonchcho sunttaa goꞌettido] xeetaappe dariya sohuwaa daro wode wurssennan shiishshanaagee metenna” yaagiis.

Yaatin, Yesuusi ba erissiyo ashkkaratuyyo, “SHin . . . intte hegaadan hanoppite” giidoogee woygiyoogee? Eti banttanaara darotoo gayttiya asaa ufayssiyaabaa qoppennaadan Yesuusi etawu yootidee? CHii. Yesuusa qofissidabay keha gidiyo gaasuwaa milatees.

Yesuusi saꞌan deꞌiyo wode, dure asati tiyatiriyaanne kaassaa miishshan maaddiyoogan, allaxxiyoosaanne beeta maqidasiyaa keexxiyoogaaninne hegaa malaban maaddiyoogan bantta sunttaa xeesissanawu koyoosona. SHin asan sabettanawu, erettida asa gidanawu woy asay eta dooranaadan ammanttanawu eti hegaadan oottoosona. Issi xuufee hagaadan gees: “Hegaadan immiyaageeti tumuppe kehiyoogaa bessiya leemisoti deꞌikkonne, darotoo polotikan bantta xallaa maaddiyaabaa koyiyoogee hegawu denttettees.” Gitatanawu hegaadan koyiyoogaappenne bantta xallaa maaddiyaabaa koyiyoogaappe naagettanaadan Yesuusi bana kaalliyaageetussi mintti yootiis.

Amarida layttappe simmin, kiitettida PHawuloosi wozanappe kehanaadan denttettana bessiya gaasuwaa qonccissiis. I Qoronttoosan deꞌiya ba mala Kiristtaanetussi hagaadan giis: “Xoossai ufaissan immiya uraa siiqiyo gishshau, qarettiiddi woi dosennan immiyoogaa gidennan, immiya urai huuphen huuphen ba wozanan qoppidobaa immo.”—2 Qor. 9:7.