Oyshaa Saaxiniyaa
◼ Gubaaꞌiyaa shiiqotun tamaariyo hanotay ufayssiyaagaa gidanaadan ubba asay ay oottana danddayii? (Zaa. 31:12)
Yihoowanne gubaaꞌiyan shiiqanaadan i giigissido giigissuwaa wozanappe bonchiyoogaappe denddidaagan, kasetidi shiiquwan beettanaadaaninne appe tamaaranau giiganaadan ubbaa minttettoos. Guutta naati deꞌiyoogeetinne issi issitoo pooꞌissidi gakkiyaageeti guyyeera uttanaadan, sinttaara deꞌiya oydeti koyro kumiyoogee loꞌꞌo. SHiiqoy doomettanaappe kase moobayle silkkiyaa malabaa cenggurssay asaa qofaa shaakkennaadan oottana koshshees. SHiiquwan beettiya ubbay shiiquwaa bessiyaagaadan xeellikko, qofay shaahettanaadan oottiyaabay darennan aggana danddayees.—Era. 5:1; Pili. 2:4.
Ooratta asay shiiquwaa yiyoogaa doommiyo wode, eta eriya gubaaꞌiyaa yameti banttanaara uttanaadan oottana danddayoosona. He asatuyyo loohana bessiya guutta naati deꞌiyaaba gidikko, hegaadan oottiyoogee keehippe maaddees. SHiiquwan beettiyoogee he keettaa asay meezetibeennaba gidana danddayees. Hegaadaana gidikko, guutta naata addaraashaappe kare kessidi zaaranau koyiyo wode, haratu qofay darin shaahettennaadan yelidaageeti guyye baggaara uttiyoogee loꞌꞌo gidiyoogaa akeekana danddayoosona. (Lee. 22:6, 15) Guutta naati deꞌiyoogeeti, naati wocamana danddayiyoobadan qoppiyo, dumma kifiliyan uttana koshshenna. Yelidaageeti naata seeranau woykko etau koshshiya harabaa oottanau addaraashaappe kare kessidi, zaaridi addaraashaa ehiyoogee loꞌꞌo.
Asaa mokkiyaageeti goyno sohuwau bessiyaagaa mala hanotay deꞌanaadan oottoosona. Naati deꞌiyoogeetinne issi issitoo pooꞌissidi gakkiyaageeti bessiya sohuwan uttanaadan mokkiyaageeti maaddoosona. Qofay shaahettennan asay injje hanotan uttanaadan maaddiyo wode, mokkiyaageeti akeekaanne hiillaa goꞌettana bessees. Qoppennan asaa qofaa shaakkiyaabay merettiyo wode, eti hanotaa akeekan oyqqoosona. Issi naꞌi haratu qofaa shaakkiyaabaa oottiyo wode, mokkiyaageeti kehatettan maaddana danddayoosona.
Yihoowabaanne sarotettaynne xillotettay kumido ooratta alamiyaa ehaanau i halchidobaa tamaariyo wode, goynnanau shiiquwan beettida ubbay ufayssiya hanotay deꞌanaadan oottana danddayees.—Ibr. 10:24, 25.