Mata Wode Aassiyoogaa Doommidaageeti Sabbakanaadan Loohissiyo Ogiyaa
1. Haggaaziyoogaa doommido koyro gallassi neeyyo aybi siyettidee?
1 Sooppe soo baada haggaazido koyro gallassaa hassayay? He wode keehi yayyennan aggakka. Neeni haggaazidoy nena xannaꞌissiya uraara woy aassiya hara uraara gidikko, he uri maaddidoogan neeni ufayttidoogee sirissenna. Neeni haggaaziyoogan haꞌꞌi meezee deꞌiyoogaa gidiyo gishshau, mata wode aassiyoogaa doommidaageeti sabbakanaadan maaddanau danddayaasa.
2. Mata wode aassiyoogaa doommidaageeti ay tamaarana koshshii?
2 Mata wode aassiyoogaa doommidaageeti asaa haasayissiyoogaa doommiyo, sooppe soo haggaaziyo wode Geeshsha Maxaafaa goꞌettiyo, zaaretti oychiyoonne xinaatiyaa doomissiyo, qassi Geeshsha Maxaafaa xannaꞌissiyo ogiyaa tamaarana koshshees. Ogiyan sabbakiyoogaanne zalꞌꞌiyo heeran asau sabbakiyoogaa mala dumma dumma haggaaziyo ogetakka eti tamaarana koshshees. Ha ogetun eti murutanaadan leemiso gidiyaabaa oottiyoogaaninne qofaa immiyoogan maaddite.
3. Leemiso gidiyaabaa oottiyoogan harata waatidi maaddana danddayiyoo?
3 Leemiso Gidiyaabaa Oottiyoogan Tamaarissite: Yesuusi sabbakiyo ogiyaa ba erissiyo ashkkarata bessiis. (Luq. 8:1; 1 PHe. 2:21) Mata wode aassiyoogaa doommida uraara haggaazanau koyiyo wode, he uri zaarettidi goꞌettanau deexxenna, asaa haasayissiyoogaa doommiyo qofaa giigetta; he qofay nu xuufetun deꞌiyaagaappe issuwaa gidana danddayees. Yaatada, neeni giyoobaa he aassiyaagee siyana mala, koyro issi woy naaꞌꞌu keettan demmiyo asaa haasayissanau goꞌetta. Hara keettaa baanaappe kase, neeni asaa haasayissido ogee murutakkonne he aassiyaagaa oychana danddayaasa. Hegaadan oottiyoogee hara asaara haggaaziyoogaa goꞌꞌaa i akeekanaadaaninne i asaa haasayissi simmin, neeni ayyo yootiyo zoriyaa ekkanau metootennaadan oottees.
4. Mata wode aassiyoogaa doommida uray asaa haasayissishin siyidi, ayba ogiyan maaddana danddayiyoo?
4 Qofaa Immite: Yesuusi ba erissiyo ashkkarati ayba ogiyan sabbakana koshshiyaakkokka kaaletuwaa immiis. (Maa. 10:5-14) Mata wode aassiyoogaa doommida uraa hegaadan maaddana danddayaasa. Haasayissiyo kayay aagaa gidiyo wode loyttada ezgga. He keettaappe kiyi simmin, i haasayissido ogee giigissoy koshshiyoogaa gidikkokka, kehatettan wozanappe galata. Zoranaappe kase, he balaa hara keettaa asaa haasayissiyo wode giigissiyaakkonne beꞌanau doorana danddayaasa. Hegee i keehippe yayyido gishshataassa gidana danddayees. Aassiya ubbati issi mala eray deꞌiyoogeeta gidennaagaakka hassaya; qassi issibaa dumma dumma ogiyan oottana danddayettees.—1 Qor. 12:4-7.
5. Maaddiya qofaa immanau kasetiyaageeta gidiyo wode woygana danddayiyoo?
5 Issi issitoo mata wode aassiyoogaa doommida uri nena zoriyaa oychana danddayees. SHin i oychana xayikko, a maaddanau kasetiyaagaa gida. Hegaa waatidi akeekan oottana danddayettii? Meezee deꞌiyo aassiyaageetuppe issoti issoti, “Ta neessi issiba yootoo?” woykko, “Hanotay ay mala gaada qoppay?” yaagidi oychoosona. Hagaadankka gaana danddayettees: “Taani aassiyoogaa doommido wode, tana keehippe metiday . . . shin . . . tana keehippe maaddiis.” Issi issitoo Akeekissiyo maxaafaappe issi issibaa issippe beꞌiyoogee goꞌꞌees. Yaatiyo gishshau, darissennan i haasayissido ogetuppe issi hanota xallaa xeelliyaagan zora.
6. Haggaazuwaara gayttidaagan ‘biratay birataa poshiyoy’ ayba ogiyaanee?
6 Biratay Birataa Poshees: Haggaaziyoogan loꞌꞌo meezee deꞌiyo Ximootiyoosi tamaarissiyoogan ubbatoo minnanaadaaninne dichaa bessanaadan PHauloosi minttettiis. (1 Xim. 4:13, 15) Neeni haggaaziyoogaa doommoosappe daro layttay aadhidaba gidikkonne, haggaaziyo hiillaa kaseegaappe dichiyoogaa agganau mule koyana koshshenna. Haggaaziyoogan daro meezee baynnaageetakka gidin, nenaara issippe sabbakiya aassiyaageetuppe tamaara; harata kehatettan maaddanau, ubba qassi mata wode aassiyoogaa doommidaageeti mishiraachuwaa loyttidi yootiyaageeta gidanaadan maaddanau akeekancha gida.—Lee. 27:17.