“Aadhdhida Eratettai Ba Oosuwan Tuma Gididi Beettees”
1. Issooti issooti nu oosuwaa waati xeelliyoonaa?
1 Nubaa bala ogiyan akeekiya woykko Yihoowa Markkatubaa worddobaa siyida asay issi issitoo nuuyyo loꞌꞌo zaaruwaa immennan aggana danddayees. Etau hegaa mala qofay deꞌanaadan oottiday eraadooniyaanne gaazeexaa malabatun odettiya worddobaa gidana danddayees. Issi issi heeran nuuyyo “iita haymaanoote” giya sunttay imettiis. Asay nuna hegaadan toochiyo wode waatidi zaarana koshshii?
2. Nuna asay baceessiyo wode hidootaa qanxxennaadan aybi maaddana danddayii?
2 Loꞌꞌo Xeelaa Oyqqite: Koyro xeetu layttan asay Yesuusanne Yihoowa ashkkarata darotoo bala ogiyan xeelliisinne qilliicciis. (Oos. 28:22) SHin he baceessoy eti bantta haggaazuwan yeellatanaadan oottibeenna. Yesuusi: “Aadhdhida eratettai ba oosuwan tuma gididi beettees” yaagiis. (Maa. 11:18, 19) I tumaa koyiyaageeti mishiraachuwaa goꞌꞌaa akeekanaagaa ammanettidi, ba Aawaa sheniyaa mishettidi oottiyoogaa aggibeenna. Nu bolli gakkiyaagaa mala hanotay Xoossaa Naꞌaa bolli gakkidoogaa hassayiyoogan, hidootaa qanxxennan aggana danddayoos.
3. Iita haasayaaninne yedetan nuuni garamettana koshshennay aybissee?
3 Yesuusi alamee bana ixxidoogaadan bana kaalliyaageetakka ixxanaagaa yootiis. (Yoh. 15:18-20) Yaatiyo gishshau, ha wodiyan nu bolli gakkiya iita haasayaaninne yedetan garamettana koshshenna. Wurssetta gallassay wuri wuri biyo wodenne Seexaanay hanqquwan suulli suulli biyo wode, hegaa malabay nu bolli darotoo gakkanaagaa naagana koshshees. (Ajj. 12:12) Hegee Seexaanaa alamee matan xayanaagaa bessiyo gishshau, nuuni ufayttana danddayoos.
4. Mishiraachuwaa yootiyo asay loꞌꞌo ogiyan zaarennaba gidikko, nuuni waati zaarana koshshii?
4 Kehatettan Zaarite: Asay nu bolli iitabaa haasayiyo wode, nuuni ubbatoo kehatettaaninne ashkketettan zaarana koshshees. (Lee. 15:1; Qol. 4:5, 6) Injjetiyaaba gidikko, nuuni haasayissiyo ashkke urau, Yihoowa Markkata xeelliyaagan asay yootiyo worddo gidida darobaa yootanau woykko ayyo hegaadan siyettidoy aybissakko oychana danddayoos. Nuuni ashkketettan zaariyoogee keettaaway Yihoowa Markkata xeelliyaagan siyido worddobaa siranaadaaninne hara wode Yihoowa Markkati haasayissiyo wode siyanaadan oottana danddayees. SHin keettaaway keehippe yiillotiyaaba gidikko, saruwan aggidi biyoogee loꞌꞌo. Asay nuna ayba ogiyan xeellikkokka, Yihooway nu haggaazuwaa xoqqu oottidi xeelliyoogaa ammanettana danddayoos.—Isi. 52:7.