Ayyaanaabaa Oosuwau Intte Naata Loohissite
1. Mazamure 148:12, 13y yelida Kiristtaaneti ay oottanaadan denttettii?
1 Yihooway naati bana sabbanaadan shoobbees. (Maz. 148:12, 13) Yaatiyo gishshau, yelida Kiristtaaneti bantta naata Geeshsha Maxaafaa tumaanne Xoossay kessido kandduwaa maaraa tamaarissiyoogaappe aadhiyaabaa oottoosona. Eti mishiraachuwaa sabbakiyaageeta gidanaadankka loohissoosona. Hegaadan oottiyoogaa waatidi gujji gujji baana danddayettii?
2. Yelidaageetu loꞌꞌo leemisoy eta naata waatidi denttettana danddayii?
2 Loꞌꞌo Leemiso Gidiyoogaa: Daanna Geedooni banaara deꞌiya 300 asata, “Taakko haa xeellidi, taani oottiyoogaa oottite” yaagiis. (Daan. 7:17) Naati banttana yelidaageeti oottiyoobaa xeellidi, eta leemisuwaa kaalliyoogee wottin deꞌiyaaba. Issi aaway qammi qammi oottees; shin i keehippe daafuriyaaba gidikkokka, soo yiidi xiskkiyoogaappe Qeera gallassi maallado naata ekkidi haggaazuwaa kiyees. Hegaadan oottiyoogan, haggaazoy kaseyana koshshiyooba gidiyoogaa kessidi yootennan tamaarissees. (Maa. 6:33) Intte naati intte woossiyoogaa, Geeshsha Maxaafaa nabbabiyoogaa, shiiquwan qofaa immiyoogaanne sabbakiyoogaa mala goynniyo dumma dumma ogiyan ufayssan shaahettiyoogaa akeekiyoonaa? Intte polo leemiso gidana danddayennaagee tuma. SHin intte naati intte Yihoowayyo minnidi oottiyoogaa beꞌiyaaba gidikko, eti ayyo goynnanaadan intte tamaarissanau baaxeetiyoogaadan oottanau kaseegaappe aaruwan koyana danddayoosona.—Zaa. 6:6, 7; Roo. 2:21, 22.
3. Yelidaageeti bantta naati wodiyaappe wodiyan ayyaanaaban ayba hoolliyaa kessanaadaaninne hegau gakkanaadan maaddana koshshii?
3 Hoolliyaa: Yelidaageeti bantta naati hemettanaadan, haasayanaadan, maayuwaa banttarkka maayanaadaaninne hegaa malabaa oottanaadan xalalennan loohissoosona. Naati diccidi issi xekkaa gakkiyoode, etau hara hoolliyaa kessana danddayettees. Yelidaageeti Kiristtaane gidikko, naati bantta layttaadaaninne bantta abbiyaadan ayyaanaabaa hoolliyaa kessidi hegau gakkanaadan maaddoosona. (1 Qor. 9:26) Intte naati nabbabennan zaaranaadaaninne Tiꞌokiraase Haggaazo Timirtte Keettan imettida kifiliyaa banttarkka giigettanaadan tamaarisseetii? (Maz. 35:18) Haggaazuwan dumma dumma macaran shaahettanaadan eta looshisseetii? Xammaqettanaunne kumetta wodiyaa haggaazanau hoolliyaa kessanaadan eta maaddeetii? Eta minttettana danddayiya, ufayssan mishettidi haggaaziyaageetuura laggetanaadan maaddeetii?—Lee. 13:20.
4. Yelidaageeti naata naatettaappe doommidi ayyaanaabaa oosuwau loohissiyo wode naati ayba ogiyan goꞌettiyoonaa?
4 Mazamuraawee, “Abeet Xoossau, neeni ta yelagatettaappe doommada tana tamaarissadasa. Ha77i gakkanaassi taani ne garamissiya oosuwaabaa yootais” yaagiis. (Maz. 71:17) Ayyaanaabaa oosuwau intte naata naatettaappe doommidi loohissite. Intte ayyaanaaban koyruwaappe doommidi eta maaddanau oottiyoobay eti gasttiyo wodekka maaddiyoogee erettidaba!—Lee. 22:6.