Bollaara Heemmiyaagaappe Yiida Dabddaabbiyaa
Nunaara Issippe Oottiya Siiqo Yihoowa Markkatoo:
Hagee ayba ufayssiya wodee! Nuuni daro ufayttiyoobi deꞌees! Siiqo ishanttoonne michenttoo, saluwan deꞌiya nu Aawaa Yihoowayyo awudeegaappenne aaruwan markkattiyo ha wodiyan, nuuni inttenaara ‘issippe oottiyoogan’ wozanappe ufayttoos.—Sof. 3:9; Yoh. 14:12.
Nuuni Yihoowayyo oottiyoogan ufayttiyoogee wolqqaama metoy nu bolli gakkenna giyoogaa gidenna. Aadhida haggaazo layttan intteppe issoti issoti biittaa qaattaa, wolqqaama diꞌuwaa, gotiyaanne beetaa, qassi meretay gattiyo, shemppo miya hara bashshaa gaasuwan qohettideta. (Maa. 24:7) Daroti sahuwaappenne cimatettaappe denddidaagan galla galla metootoosona. Nuuni ubbay wodiyaappe wodiyan gujji gujji biya, “leesso mala” metuwaara baaxetana bessees. (Maa. 24:8) Armeeniyaa, Erttiranne Tohossa Kooriyaa gujjin, amarida biittatun nu ishatuppe daroti bantta ammanuwaa gaasuwan qashettidosona.—Maa. 24:9.
Ha metoy deꞌishinkka, nuuyyo loꞌꞌo xeelay deꞌanaadan maaddidabay aybee? Hegau maaddida issi waannabaa, 2010 laytta xiqisee hassayissiis: ‘Siiqoy ubbabaa genccees. Siiqoy mulekka xayenna.’ (1 Qor. 13:7, 8) Ee, nuuni issoy issuwaa siiqiyoogee, hegaadankka Yihoowa siiqiyoogee metuwan genccanaadan minttiis.
Banttana Kiristtaane giya daroti nuuni aahuwan, qassi aggennan sabbakiyoogan garamettoosona. Eti nu ammanuwaanne timirttiyaa dosennan aggana danddayikkokka, etappe issoti issoti ubba, “Intte nuuni oottana koshshiya oosuwaa ootteeta!” yaagoosona. Yihoowa Markkati gallassinne qammi aggennan markkattanaadan maaddiyaabatuppe issoy aybee? Hegaa zaaroy haꞌꞌikka siiquwaa. Nuuni saluwan deꞌiya nu Aawaagaadan ooninne xayana mala koyokko. (2 PHe. 3:9) Aadhida haggaazo layttan aassiyaageetu ooratta xoqqa qooday 7,508,050 gididoogee, ubba asay ba nagaraappe simmanaadan nuuni koyiyoogaa bessiyaaba. Harata ayyaanaaban wozanappe maaddiyoogan siiqoy denttettin oottiyo ha oosuwaa minnidi oottiya daro oosanchati deꞌiyo hara haymaanootee awun deꞌii?
Isiyaasi xaafido hiraagay polettiiddi deꞌiyoogaa beꞌiyoogee nuna minttettees: “Wurssetta gallassatun GODAA Beeta Maqidasee keexettido deree deretu ubbaappe xoqqidi beettana; kera ubbatuppekka xoqqu xoqqu gaana. Kawotettatun de7iya asai ubbai akko zulana.” (Isi. 2:2-4) Aadhida haggaazo layttan xammaqettida 294,368 asati Yihoowa keettaa zuliiddi deꞌiyaageetuppe amaridaageeta. Ha alꞌꞌo laggeta nu dirijjitiyau hashshu saro yiideta goos. Nu morkkiyaa Seexaanaa Dabloosa qohuwaa eti eqettanaadan ubbatoo maaddana mala, nu Kiristtaane siiqoy denttettiyoogeeta gidoos.—1 PHe. 5:8, 9.
Godaa Kahuwaa Masqqaynno, Laappune 30, 2010n bonchida asaa qooday awudeegaappenne keehi xoqqa, giishin 18,706,895 gididoogee, biron daro miiloone asay nunaara issippe Yihoowayyo goynnanaagaa bessees. Yihooway ha iita siraataa xayssiichibeennaagan daro ufayttoos! He wodee gakkanaashin, ubbatoo genccanaadan nu siiqoy maaddees.—2 Tas. 3:5.
“Yihoowayyo Mata Dabbo Gididi Deꞌite!” giya Awuraajjaa SHiiqotuppe darota alame yuushuwan 2010n shiiqida; he shiiqoti, saluwan deꞌiya nu Aawaa Yihoowaara nuuyyo deꞌiya dabbotaa minttidosona. Mazamuraawee, “Eta Xoossai [Yihoowa] gidiyo asati anjjettidaageeta” yaagidoogee daroppe tuma! (Maz. 144:15) Sinttappe aybi hanikkonne, Yihooway nu miyyiyan deꞌishin nuna yashshiyaabi aybinne baawa. (Maz. 23:4) Matan, Yihooway ba Naꞌaa bagaara, “xalahe halaqaa oosuwaa” xayssana. (1 Yoh. 3:8) He wodee gakkanaadan nuuni yeemottidi naagiyoogee erettidaba! SHin hegee gakkanaashin, oosoy daridoogeeta gididi oottiyo darobay deꞌees.—1 Qor. 15:58.
Nuuni “ubba wode” nu woosan inttena hassayiyoogaa ammanettite. (Roo. 1:9) “Nu Godai Yesuus Kiristtoosi ba maarotettan intteyyo immana merinaa de7uwaa naagiiddi, intte huuphiyaa Xoossaa siiquwan” wottiyaageeta gidite.—Yih. 21.
Inttena ubbaakka siiqoos!
Intte ishantta,
Yihoowa Markkata Bollaara Heemmiyaagaa