Nuuni Ubbatookka Sabbakeettees
1. Koyro xeetu layttan wonggeliyaa sabbakiyaageeti ubbatoo sabbakana koshshiyoogaa dogibeennaagaa aybin eriyoo?
1 Koyro xeetu layttan mishettidi sabbakiyaageeti asi deꞌiyo soho ubban mishiraachuwaa “yootiyoogaa yaa gujjidosona.” (Oos. 5:42) Hegaa gishshau, eti sooppe soo biidi sabbakiyo wode, ogiyan gayttiya asaukka sabbakidoogaa akeekana danddayoos. Eti haggaazuwaappe simmiiddi, giyaappe issi issibaa shammiyo wode gayttiya asaukka sabbakidoogaa akeekana danddayoos. Yesuusaagaadan, etikka ubbatoo sabbakana bessiyoogaa dogibookkona.—Mar. 6:31-34.
2. Nu sunttaadan deꞌiyoogee ay ay gujjii?
2 Ubbatoo Giigetta: Yihoowa Markka giya sunttay nuuni oottiyoobaa xalla gidennan, nu oonatettaakka qonccissees. (Isi. 43:10-12) Hegaa gishshau, nuuni sooppe soo beenna wodekka, nu hidootaabaa oychiya asau zaaro immanau ubbatoo giigetti uttida. (1 PHe. 3:15) Haggaazuwau kiyennan sabbakanau injje gidiya hanotaa kaseta qoppada, neeni gaanabaa qoppay? Koyiya asau immanau xuufiyaa ubbatoo oyqqay? (Lee. 21:5) Neeni sabbakiyoy sooppe soo biyoogaa xallaaneeyye, woy hanotay injjetikko, hara sohuwankka mishiraachuwaa yootay?
3. Ogiyan, kaamiyaa essiyo sohuwan, dubbushan, zalꞌꞌe heeraaninne hegaa mala sohuwan sabbakiyoogaa xaasayi xeellana bessennay aybissee?
3 Dabaaban Markkattiyoogaa: Nuuni ogiyan, kaamiyaa essiyo sohuwan, dubbushan, zalꞌꞌe heeraaninne hegaa mala sohuwan sabbakoos. Hegee qoppennan, tiran kiyin woy dooridi oottiyoobee? Kiitettida PHauloosi dabaaban woy ‘yaaꞌaaninne’ sooppe soo biidi sabbakidoogaa yootiis. (Oos. 20:20) Sooppe soo biidi sabbakiyoogee asau Kawotettaa kiitaa yootanau keehi loꞌꞌonne waanna oge. SHin koyro xeetu layttan sabbakiyaageeti koyidoy asaappe attin keettaa gidenna. Eti dabaaban, haggaazuwau kiyennan, qassi sooppe soo biyoogan demmido injje ubbaa goꞌettidi asau tumaabaa yootidosona. Nuunikka haggaazuwaa polanau etaagaadan oottiyaageeta gidoos.—2 Xim. 4:5.