Xeelliyoosan Deꞌiya Cimata Baloppite
1. Xeelliyoosan deꞌiyaageetuyyo mishiraachuwaa yootana koshshiyoy aybissee?
1 Wodiyaappe wodiyan daro asay cimatettaa gaasuwan wolqqaa xayi xayi bees. (Era. 12:1-7) Issi issi biittan, issi issi cimati deꞌiyoy eta xeelliyoosaana gidiyo gishshawu, sooppe soo haggaaziyo wode darotoo aassiyaageeti eta demmokkona. Aaway woy aayyiyaa cimiyo wode naati bantta soo efiyoogee meeze gidido issi issi biittankka hanotay hegaa mala. Xeelliyosan deꞌiya cimatinne harati yaa haa qaaxxanawu woy issi issibaa hassayanawu metootiyaaba gidikkokka, eti Yihoowabaa tamaarana, akeekananne a siiqana danddayoosona. Nuuni ‘ufayssiya hidootaa’ mishiraachuwaa etawu waati yootana danddayiyoo?—Tii. 2:13, NW.
2. Cima asaa xeelliyoosay awan awan deꞌiyaakko waati erana danddayiyoo?
2 Doommiyoogaa: Hegaa mala sohoti awan awan deꞌiyaakko silkkiyaa mazggafan koyidi erana danddayettees. Hegaa mala sohuwaa biidi oychana danddayiya ishata haggaazuwaa xomoosiya ishay doorana danddayees. Loytti halchiyoogan, qassi Yihoowa maaduwan darotoo asaa citan Geeshsha Maxaafaa xannaꞌissana danddayettees.—Lee. 21:5; 1 Yoh. 5:14, 15.
3, 4. (a) Nuuni citan xannaꞌissana koyiyoogaa ooyyo yootana koshshii? (b) Xannaꞌissiyo hanotaara gayttida issi issibata waati qonccissana danddayiyoo?
3 Hegaa mala sohotun deꞌiyaageeta xinaatiyaa doomissiyo ogee issisaappe harasan dummatees. Daro oosanchati deꞌiyo, qassi cimida darota xeelliyo sohuwan, alaafiyaa haasayissana koyiyoogaa imattaa mokkiyaagawu kasetidi yootiyoogee loꞌꞌo. Qassi cimida guutta asaynne eta xeelliya naaꞌꞌu woy heezzu asati deꞌiyoosan, eti deꞌiyo keettaa godaa haasayissiyoogee loꞌꞌo gidana danddayees.
4 He naaꞌꞌu hanotankka Geeshsha Maxaafaa nabbabananne hegaa tobbana koyiya asaa intte maaddana koyiyoogaa yootite. Saaminttan saaminttan 30 daqiiqa gidiyaagaa citan Geeshsha Maxaafaa tobbana koyiya uri deꞌiyaakkonne oychite. Hegaadan xannaꞌissanawu dumma dumma xuufeta goꞌettana danddayettees; shin daro ishati Geeshsha Maxaafaa Taariketa Tamaariyo Maxaafaa, qassi Saꞌan Deꞌida Asa Ubbaappe Aadhiya Gita Asa giya maxaafaa daroti dosiyoogaa akeekidosona. He maxaafata alaafiyaa bessana danddayaasa. Ay gallassi, woqqu saatiyan, qassi awan shiiqanaakko alaafiyaara zorettidi, yan deꞌiya ubbay beꞌiyoosan he prograamiyaa wottana danddayettees. Intte Yihoowa Markka gidiyoogaa yootanawu guyye gooppite. Qassi intte tamaarissiyoy haymaanootebaa gidennan, Geeshsha Maxaafaabaa gidiyoogaakka alaafiyawu yootiyoogee loꞌꞌo.
5. Xinaatee maaddiyaagaanne ufayssiyaagaa gidanaadan waatana danddayettii?
5 Xannaꞌissiyoogaa: Intte he sohuwan deꞌiya hanotaadan xannaꞌissiyo gishshawu, darin unꞌꞌettoppite, qassi akeekancha gidite. Xinaatiyaa kaalettiya ishay xannaꞌissanawu goꞌettiyo xuufiyaa daruwaa ehaana koshshees; qassi wurssettan hegaa shiishshana koshshees. Issotu issotuyyo gita pitaliyan xaafettidaagaa ehaana danddayees. Hara wode oottiyoogaadan, menttota nabbabidi oyshaa oychin asay ba qofaa yootana danddayees. Nabbabanawu koyiyaanne loytti nabbabiya uri menttota woy xiqiseta nabbabana danddayees. Xannaꞌissiyo wode pashkka, siiqiyaageetanne hanotay giigana giidi qoppiyaageeta gidite. Alaafiyaa oychidi, Geeshsha Maxaafaa xoqqu oottidi xeellanaadan maaddiya woy Geeshsha Maxaafan deꞌiya issi taarikiyaappe tamaariyoobaa qonccissiya, Yihoowa Markkati giigissido biiduwaa issi issitoo bessana danddayeeta. Xinaatiyaa doommiyo wodenne kuuyiyo wode qantta woosaa woossana danddayettees. Ubba issi issi ishati mazamuriyaa yexxiyoogaakka tamaarissidosona.
6. Issi uri eqettiyaaba gidikko waatana danddayiyoo?
6 Xannaꞌissiyo wode, nabbabidobaa woy qonccissidobaa etappe issi uri eqettiyaaba gidikko shin? Hegaa mala urawu akeekan zaarite. (Qol. 4:6) A oyshawu zaaro gidiya xiqisiyaa yootidi qanttan qonccissana danddayeeta. Yaatanawu injjetennaba gidikko, a qofaa akeekidoogaa yootidi, xinaatiyaa wurssi simmin aara he allaalliyaa buzo tobbanaagaa yootiyoogee loꞌꞌo.
7. Issi uri oyshaa oychiyaaba woy gujjidi eranawu koyiyaaba gidikko, ay oottana danddayiyoo?
7 Yan deꞌiya asatuppe issoy oyshaa oychana woy gujjidi eranawu koyiyoogaa yootana danddayees. Hegaadan haniyo wode issi michiyaa, “Hegee loꞌꞌo oysha. SHin hegee ne oysha gidiyo gishshawu, nabbabiyoobaa wurssiyo wode nu naaꞌꞌay hegaa issippe tobbana” gawusu. Koyiyaageeta hara wode Geeshsha Maxaafaa buzo xannaꞌissana danddayettees.
8. Citan xannaꞌissiyo wodenne huuphiyan huuphiyan issi uraa xannaꞌissiyo wode hegaara gayttidabaa waati qoodana koshshii?
8 Hegaadan citan xannaꞌissiyo wode, ubbatoo xinaatiyaa koyro doomissida Yihoowa Markkati xannaꞌissiyaakko loꞌꞌo. He sohuwan deꞌiya ishati haggaazido saatiyaa qoodana danddayoosona. Xannaꞌissiyoogeeti aggennan xannaꞌanaagee erettikko, xinaatiyaa kaalettiya ishay xannaꞌissido payduwan issi zaareto oyshaa, qassi aginaa wurssettan issi Geeshsha Maxaafaa xinaatiyaa qoodana danddayees. Yan deꞌiya, akeekananne tamaarana danddayiyaageeta huuphiyan huuphiyan Geeshsha Maxaafaa xannaꞌissiyo wode, hara wode meezetidoogaadan saatiyaa, zaareto oyshaanne xinaatiyaa qoodana danddayoos.
9, 10. Citan xannaꞌissiyaageeti ay mala eeshshay deꞌiyoogeeta gidana koshshii? Qonccissa.
9 Sinttawu Sugiyoogaa: Citan xannaꞌissiyo wode kasetidi gallassaanne saatiyaa keeriyoogee loꞌꞌo. Yan deꞌiyaageetinne hara oosanchati xinaatee keerido wodiyan doommin keerido wodiyan polettana, qassi ishati aggennan xannaꞌissana giidi qoppana danddayoosona. (Maa. 5:37) Yaatiyo gishshawu, murttana, minnidi oottana, qassi ubbabaa maara oottana bessees. Citan xannaꞌissiyo wode loytti xannaꞌissana danddayiya naaꞌꞌu aassiyaageeti xinaatiyaa kaalettiyoogee loꞌꞌo gidiyoogaa hanotaappe akeekida. (Era. 4:9, 10) Asay corattidi deꞌiyoosaa aassiya daroti biyoogee loꞌꞌo gidana danddayees.
10 Kehiyoogeenne etayyo qoppiyoogeekka koshshiyaaba. (Pili. 2:4) Koyro buussan, yan citan Geeshsha Maxaafaa xannaꞌiya ubbaara erettite. Eta sunttaa xaafi oyqqite; xannaꞌissanawu zaarettidi baanaappe kase eta sunttaa hassayite. Danddayanchanne qarettiyaageeta gidiyoogee ubba asay ufayttanaadaaninne pashkkanaadan oottees.
11. Citan xannaꞌissiyaageeti yan deꞌiyaageetu so asaanne he sohuwan oottiyaageeta bonchiyoogaa waati bessana danddayiyoonaa?
11 Qassi, yan deꞌiyaageetu so asaanne he sohuwan oottiyaageeta bonchiyoogeenne etayyo kehiyoogee daro loꞌꞌo. Xannaꞌissiyo prograamiyaa yootoogaappe guyyiyan, alaafiyaara zorettennan deꞌiiddi hegaa laammana bessenna. Issi issitoo, xannaꞌissiyo ogiyaara gayttidaagan ba qofaa yootanaadan alaafiyaa oychite. Intte xannaꞌissiyo wode yan deꞌiyaageetu dabboti yiyaaba gidikko, etaara gayttanawu malite. Yaatidi, intte eta Geeshsha Maxaafaa xannaꞌissiyoy aybissakko yootite. Intte cima asatuyyo keehi qoppiyoogaakka yootite. Etikka intte xannaꞌissiyo wode ezgganaadan shoobbite.
12, 13. Xeelliyoosan deꞌiyaageetuyyo markkattiyoogee loꞌꞌo ayfe demissiyoogaa bessiyaabaa yoota.
12 Demmido Ayfiyaa: Hegaadan oottiyoogan loꞌꞌo ayfee beettiyoogaa yuuyidi xomoosiyaageetinne gubaaꞌeti yootiyoobaappe akeekoos. Leemisuwawu, issi heeran koyro gallassi tobbiyo wode 20 gidiyaageeti shiiqidosona. Hegaappe denddidaagan, usuppunati huuphiyan huuphiyan Geeshsha Maxaafaa xannaꞌiyoogaa doommidosona. Guyyeppe, hegeetuppe issinniyaa xammaqettaasu. Qassi harasan xannaꞌiya, layttay 85 gidido issi maccaasiyaa hegaa heeran deꞌiya gubaaꞌiyan shiiqiyoogaa doommada, xammaqettana koyiyoogaa yootaasu. Issisan qassi, he sohuwawu aawatettay deꞌiyoogeeti yan issi issibaa loyttanawu halchidi, Yihoowa Markkati citan xannaꞌissiyoogee attanaadan qoppido wode, yan deꞌiyaageeti alaafiyaa eqettidosona! Yaatin, xannaꞌissiyoogaa zaarettidi doommin 25ppe biidi 30 gidiya asay shiiqiyoogaa doommiis.
13 Xeelliyoosan deꞌiyaageeta nuuni siiquwan oyqqiyoogee eta xallaa gidennan haratakka ufayssiyaaba. Leemisuwawu, yan oottiyaageeti ishati citan xannaꞌissiyoosaa yiidi bantta qofaa yootiyoogee meeze gididaba. Xeelliyoosan deꞌiyaageeta nuuni maaddanawu oottiyoobay heeran deꞌiya asay nubaa loytti akeekanaadankka maaddees. (1 PHe. 2:12) Ishantti xannaꞌissiyoy aybissakko issi alaafiyawu yootin, i, “Yaatin ayssi sohuwaara doommibeekketii? Awude doommuuteetii?” yaagidi oychiis. Issi alaafiyaa qassi hagaadan gaasu: “Xeelliyoosan deꞌiyaageeti ubbay hegaadan xannaꞌanaadan koyays. Hegee Yihoowa Markkati asaa naxan tamaarissanawu oottiyo oosuwaappe issuwaa.” Hawayen deꞌiya hegaa mala dirijjitee Yihoowa Markkati oottido loꞌꞌobaa gishshawu etawu galataa woraqataa immiis.
14. Xeelliyoosan deꞌiyaageetuyyo markkattana koshshiyoy aybissee?
14 Yihooway cimati bana galatanaadan shoobbees. (Maz. 148:12, 13) Xeelliyoosan deꞌyiaageetikka he shoobettidaageetu giddon deꞌoosona. Mishiraachuwaa siyidi goꞌettana danddayiya cimata xeelliyo, hegaa mala sohoy intte haggaazo moottan deꞌii? Gubaaꞌe cimatinne hegaadan xeelliyo sohotu alaafeti maaddin, yan deꞌiyaageetuyyo mishiraachuwaa loytti yootana danddayoos. Nuuni layttan sugidaageeta balennaba gidikko, Yihoowa leemisuwaa kaalliyoogaa bessoos.—Maz. 71:9, 18.