Bolla Gididi Heemmiyaagaappe Yiida Dabddaabbiyaa
Siiqo Ishatoonne Michetoo:
“Nuuni Xoossaa woossiyo wode inttena hassayidi, intteyyo ubbaayyo ubba wode Xoossaa galatoos. Nuuni nu Xoossaa, nu Aawaa sinttan ammanuwan intte oottido oosuwaanne, siiquwan intte daafurido daafuraa, qassi Xoossai intteyyo nu Godaa Yesuus Kiristtoosa baggaara immana giidoogaa ekkanau gencciyo genccaa ubba wode hassayoos.” (1 Tas. 1:2, 3) Ha xiqisee nuuni inttebaa qoppiyoobaa loytti qonccissees! Nuuni inttebawunne intte oottiyo loꞌꞌobawu Yihoowa galatoos. Aybissi?
Zillaytti, Xoossaa Kawotettaara gayttidaagan, ‘ammanuwan intte darobaa oottidetanne siiquwan keehi daafurideta.’ Intteppe daroti kaseegaappe loytti haggaazanawu dumma dummabaa oottideta. Issoti issoti Kawotettaabaa aassiyaageeti keehippe koshshiyo heeri biidi haggaazideta; ubba harati hegaadan oottanawu kare biitti biideta. Harati qassi dabaaban markkattiyoogan kaseegaappe loytti haggaazideta. Daroti Godaa Kahuwaa wodiyan, woradaa xomoosiyaagee yiyo aginan, woy Naase 2014 dumma zamachaa wodiyan kaafiya aqinye gididi haggaazideta. Intte hanotay dumma dumma gidikkokka, intte Yihoowayyo wozanappe woykko kumetta shemppuwaappe oottiyoogaa akeekida; hegawu inttena galatoos. (Qol. 3:23, 24) Tumakka, ‘ammanuwan intte oottidobay’ nuuni Yihoowa galatanaadan denttettiyaaba!
Ayyaanaabaa oosuwawu goꞌettiyo keettata keexxiyo wode “siiquwan intte daafurido daafuraa” gishshawukka inttena nashshoos. Yihoowa asaa qooday gujji gujji biyo gishshawu, hegaa mala keettay keehi koshshees. (Isi. 60:22) Ane qoppite; zillaytti, aassiyaageetu xoqqa qooday 8,201,545; qassi Geeshsha Maxaafaa xannaꞌissiyo asaa qooday amakaayiyan aginan aginan 9,499,933. Aassiyaageetu qooday dicciiddi deꞌiyo gishshawu, daro macara biirota aassana woy bottokonana koshshees. Hara daro Kawotettaa Addaraashay koshshiyoogeekka qoncce! Hegaadankka, nu xuufiyaa birshshiyaageeti asay he doonaa haasayiyo heeran deꞌanaadaaninne yan oottanaadan xuufiyaa birshshiyo biirotakka kumetta saꞌan keexxana bessees.
Yaatiyo gishshawu, ‘Hegaadan keexxiyo oosuwaa maaddanawu ay oottana danddayiyaanaa?’ giidi nuna oychana danddayoos. Nuuppe issoti issoti he oosuwaa ootti maaddana danddayoos. Qassi keexxi maaddiyo eray deꞌin aggin, ha keehi koshshiya oosuwaa nu duretettan maaddana danddayoos. (Lee. 3:9, 10) Xoossaa dunkkaaniyaa keexxiyo wode, Israaꞌeelati hegawu gididi palahiyaabaa immido gishshawu Muusee eti harabaa gujjidi eheennaadan yootiis. (Kes. 36:5-7) Geeshsha Maxaafan deꞌiya hegaa mala qofay nu wozanaa denttettiyoogee qoncce. Ha keehi koshshiya geeshsha oosuwaa oottanawu intte ‘siiquwan daafuriyo daafuraa’ beꞌiyoogeekka nuuni Yihoowa galatanaadan oottiyaaba!
Ammanuwaa paacciyaabay gakkiyo wode nu ishantti genccidi deꞌiyoogaa beꞌiyoogee keehi ufayssiyaaba. Leemisuwawu, Tohossa Kooriyan deꞌiya nu siiqo ishatubaa qoppite. Polotikan ooyyoonne exatenna gishshawu, he biittan deꞌiya yelaga ishantti 1950ppe haa simmin qashettiiddinne birshshettiiddi takkidosona. Daro layttawu nu ishati hegaa genccidi yeeqennan deꞌidosona. Eta genccay nu ammanoy minnanaadan oottees!
Erttiran, nu heezzu ishati qashettoosappe 20 layttay aadhiis. Nu michonttanne eta naata gujjin, harati qassi hegaappe guutta wodiyawu qashettidosona. Eta birshshissanawu daro baaxetida; shin hanno gakkanawu danddayettibeenna. Gidikkokka, nu ishantti bantta ammanuwan genccidosona. Eti keehi barchetikkokka, mule yeeqibookkona. He ammanettida ishantta nu woosan ubbatoo hassayoos.—Roo. 1:8, 9.
Intteppe daroti intte ammanuwaa gishshawu qashettibeennaagee qoncce. SHin intteppe daroti layttay sugiyo wode gakkiya metuwaa, harggiyaa, ammanenna aqo laggiyaappe woy dabbuwaappe gakkiya yedetaanne intte xallay eriyo hara metuwaa gencciiddi deꞌeeta. Gidikkokka, Yihoowayyo ammanettidi oottiiddi deꞌeeta! (Yaaq. 1:12) Inttena nashshoos. Intte ammanettidi gencciyoogaa beꞌiyoogee nuuni Yihoowa galatanaadan oottiya hara gaaso.
Ee, intte ammanuwan oottido oosoy, siiquwan daafurido daafuraynne gencciyo genccay nuuni ‘Yihooway keha gidiyo gishshawu, a galatanaadan’ oottees. (Maz. 106:1, NW) Inttena ubbaa wozanappe siiqoos; qassi intte Yihoowayyo merinawu haggaazanaadan i intteyyo wolqqaa immanaadaaninne inttena minttanaadan Yihoowa woossoos.
Intte ishantta,
Yihoowa Markkata Bolla Gididi Heemmiyaagaa