Geeshsha Maxaafaa Galla Galla Pilggiyoogaa Giyo Bukleetiyaappe Goꞌettaydda Deꞌay?

Geeshsha Maxaafaa Galla Galla Pilggiyoogaa giyo bukleetiyaappe he gallassawu doorettida xiqisiyaanne hegan deꞌiya qofaa nabbabiyoogee ayyaanaaban neeni meeze oottidobee? Oottennaba gidikko, hegaa meeze oottana danddayay? Daroti gallassi oottiiddi he qofaa wotti denttidi qoppanawu hegaa maallado nabbaboosona. (Yaas 1:8; Maz 119:97) Xiqisiyaappe neeni waana loytta goꞌettana danddayay? Hanotaa akeekanawu he xiqisiyaa yuushuwan deꞌiya qofaa nabbaba. He xiqisiyan qonccida maaraa loytti qonccissiya Geeshsha Maxaafan deꞌiya taarikiyaa qoppanawu baaxeta. Yaatada ne deꞌuwan he maaraadan ootta. Xoossaa Qaalay neeni issibaa kuuyanaadan oottiyo wode, hegee ne deꞌuwaa kaalettananne nena keehi maaddana.—Maz 119:105.

Kumetta alamiyan deꞌiya Beeteele keettaa asay Geeshsha Maxaafaa Galla Galla Pilggiyoogaa giyo bukleetiyaappe qanꞌꞌe saatiyan nabbabees. Mata layttatun, hegeetuppe daro haasayati JW Brodkastingiyan PROGRAAMETANNE HANIDABAA giyaagan kiyidosona. Hegeetuppe issuwaa woy daruwaa mata wode neeni beꞌidoy awudee? Haasayatuppe issoti issoti neessi keehi koshshiyaabata gidennan waayi aggana. Leemisuwawu, neeni kuuyiyooban Looxe taarikee nena waati maaddana danddayii?

HA SAꞌAA SIIQOPPITE (1YOH 2:15), GIYO BIIDUWAA BEꞌITE; YAATIDI KAALLIDI DEꞌIYA OYSHATA ZAARITE:

• Ha Maallado Goynuwaa haasayawu denddo gidida Geeshsha Maxaafay yootiyo maaray awugee?

• Ha saꞌaa woy saꞌan deꞌiyaabaa siiqiyoogee gattiyo qohuwaa Looxe taarikee waati qonccissii?—Doo 13:12; 14:12; 19:3, 12, 13, 24-26

• Nuuni ha saꞌaa woy saꞌan deꞌiyaaba gidennan, Yihoowa siiqiyoogaa waati bessiyoo?