Nabbabiyaageetu Oyshaa

Yesuusi Qeese Ubbatu Halaqaa gididoynne, ooratta maachchay oosuwan peeꞌiyoogaa doommidoy awudee?

Yesuusi 29 M.Ln xammaqettido wode, I Qeese Ubbatu Halaqaa gididoogaa naqaashay bessees. Nuuni hegaa waati eriyoo? Yesuusi xammaqettido wode, yarshshiyoosan leemisettida Xoossaa “sheniyan” bana yarshshanawu koyiyoogaa bessiis. (Gal. 1:4; Ibr. 10:5-10) Yesuusi xammaqettiyo wode leemiso gidida he yarshshiyo sohoy doommiis. Leemiso gidida he yarshshiyoosay ayyaana beeta maqidasiyaa shaaho gidiyo gishshawu, ayyaanaa beetamaqidasee he gallassan eqqidoogaa eroos.—Maa. 3:16, 17; Ibr. 5:4-6.

Gita ayyaana beeta maqidasiyan haggaaziya qeese ubbatu halaqay koshshees. Hegaa gishshawu, Yesuusi qeese ubbatu halaqaa gidanaadan Yihooway ‘geeshsha ayyaanaaninne wolqqan’ A tiyiis. (Oos. 10:37, 38; Mar. 1:9-11) SHin, Yesuusi hayqqanaappenne hayquwaappe denddanaappe kase Qeese Ubbatu Halaqaa gidanaadan sunttettidoogaa waati erana danddayiyoo? Aaroonanne appe kaallidi oottiya qeese ubbatu halaqatu leemisoy ha oyshaa zaaruwaa demmanaadan nuna maaddana.

Yihooway Muuseyyo immido Higgee yootiyoogaadan, Ubbaappe Aadhdhiya Geeshsha Sohuwaa gelana danddayiyay qeese ubbatu halaqaa xalla. Geeshsha Sohuwaanne Ubbaappe Aadhida Geeshsha Sohuwaa shaakkiya magalashoy deꞌees. Qeese ubbatu halaqay Nagaraa Atto Giissiyo Gallassan he magalashuwaa kanttidi gelees. (Ibr. 9:1-3, 6, 7) Aarooninne appe kaallidi oottiya qeese ubbatu halaqati Ubbaappe Geeshsha Sohuwaa gelissiya magalashuwaa kanttanaappe kase tiyettidosona. Hegaa gishshawu, Yesuusikka hayqqanaappenne saluwaa baanaappe kase “magalashuwaa baggaara, hegaa giyoogee ba bollaa baggaara” kanttanawu, Qeese Ubbatu Halaqaa gididi tiyettana bessees. (Ibr. 10:20) Hegaappe denddidaagan, Kiitettida PHawuloosi Yesuusi “qeese ubbatu halaqa” gididoogaa, qassi ‘ubbaappe aadhdhiyaagaanne bali bainnaagaa gididanne asi oottibeenna dunkkaaniyaa’ kanttidi “saluwa” gelanaagaa yootiis.—Ibr. 9:11, 24.

Ooratta maachchay oosuwan peeꞌiyoogaa doommidoy awudee? Yesuusi saluwaa biido wodenne nu gishshawu ba polo deꞌuwaa yarshsho oottidi shiishshido wode he ooratta maachchaa oosuwan peeshshiyo oosuwaa doommiis. Yaatin he wode hanidabati aybee?

Koyruwan, Yesuusi Yihoowa sintti shiiqiis; naaꞌꞌanttuwan, Yesuusi ba yarshshuwaa waagaa Yihoowawu shiishshiis; qassi wurssettan, Yihooway gukkida Yesuusa suuttaa waagaa eeno giidi ekkiis. Hegeeti polettanaappe kase oorattaa maachchay oosuwan peeꞌiyoogaa doommibeenna.

Yihooway Yesuusa yarshshuwaa ha gallassan ekkiis giidi Geeshsha Maxaafay yootenna. Hegaa gishshawu, oorattaa maachchay ha gallassan oosuwan peeꞌiyoogaa doommiis giidi qonccissana danddayokko. SHin, Yesuusi PHenxxaqosxxe gallassaappe tammu gallassaa kasetidi saluwaa biidoogaa eroos. (Oos 1:3) He qantta wodiyaappe issuwan Yesuusi ba yarshuwaa waagaa Yihoowawu shiishshin I ekkiis. (Ibr 9:12) PHenxxaqosxxe galla 33 M.Ln hanidabaappe ooratta maachchay oosuwan peeꞌiyoogaa doommidoogaa nuuni eroos. (Oos. 2:1-4, 32, 33) Yihooway hegaa ekki simmin, oorattaa maachchay oosuwan peeꞌiyoogaa doommiis.

Xaaxi waaxi xeelliyo wode, ooratta maachchay oosuwan peeꞌiyoogaa doommidoy gukkida Yesuusa suuttaa waagaa Yihooway ekki simmiinaanne tiyettidaageeti he maachchaappe goꞌettiyoogaa doommiina. Hegaappe simmin, Qeese Ubbatu Halaqaa Yesuusi, ooratta maachchawu gaannatiyaagaa gididi oottees.—Ibr. 7:25; 8:1-3, 6; 9:13-15.