“Yihooway Tana Dogibeenna”

Taani 1983n yelettaas. Ta deꞌuwan koyro heeran, taani payya naꞌa; shin taayyo tammu laytta gidiyo wode ta bolla ubban tana keehi sakkiyoogaa doommiis. Naaꞌꞌu layttaappe guyyiyan, issi galla guuran hiittaappe denddiyo wode qaaxxana danddayabeykke. Taani ay keena baaxetikkonne ta gedee qaaxxana danddayibeenna. He gallassaappe doommada, taani zaarettada hemettabeykke. Ta harggee taani diccennaadankka oottiis. Haꞌꞌikka taani guutta naꞌa keena.

Taani sahettada sooppe kessaa agga simmin guutta aginatuppe guyyiyan naaꞌꞌu Yihoowa Markkati nu soo yiidosona. Asi tana oychchanawu yiyo wode darotoo qosettanawu malays, shin he gallassi he macca asatuura haasayanawu eeno gaas. Eti Gannatiyaabaa yootiyo wode, tawu layttay ichchashaa gidiyo wode siyidobaa hassayaas. He wode, Surinama heeran deꞌiya Jetiro giyo misoonaawee aginaappe issitoo nu heeraa yiidi ta aawaa Geeshsha Maxaafaa xannaꞌissees. Jetiroy tawu daro kehiis. Taani A keehi dosays. Qassi, ta aawaa aawaynne aayyiyaa, nu heeran deꞌiya Yihoowa Markkatu shiiquwaa tana issi issitoo efoosona. Yaatiyo gishshawu, he galla tana oychchanawu yiida macca asatuppe issinna, Florenssa taani gujjada tamaarana koyiyaakkonne oychchin eeno gaas.

Florenssa ba azinaa Jasttesaara simmada yaasu; qassi eti tana Geeshsha Maxaafaa xannaꞌissiyoogaa doommidosona. Eti taani nabbabeennaagaa akeekido wode, nabbabiyoogaa tamaaranaadan tana maaddidosona. Amarida wodiyaappe simmin, tarkka nabbabiyoogaa danddayaas. Issi galla, he aqo laggeti Surinaman haggaazanawu maddabettidoogaa tawu yootidosona. Oreelan, Geeshsha Maxaafaa tana xannaꞌissiya issi urinne baynnaagee azzanttiyaaba. SHin, Yihooway tana dogibeennaagee ufayssiyaaba.

Hegaappe simmin takkennan, Floyida giyo dumma aqinyee Oreela yiis; yaatidi I sooppe soo haggaaziiddi tanaara gayttiis. I Geeshsha Maxaafaa xannaꞌiyoogaabaa tawu yootin taani moocu gaas. I, “Ayssi moocu gay?” giidi tana oychchiis. Taani Xoossay Nuuppe Koyiyoy Aybee? giyo brooshuriyaa xannaꞌidoogaanne Merinaa Deꞌuwawu Kaalettiya Eraa giyo maxaafaa xannaꞌiyoogaa doommidoogaa awu yootaas.a Xinaatiyaa essido gaasuwaakka qonccissaas. Floyidi he maxaafaa tana xannaꞌissidi wurssissiis, shin guyyeppe ikka harasan haggaazanawu maddabettiis. Haꞌꞌikka Geeshsha Maxaafaa tana xannaꞌissiya asi xayiis.

Gidoppe attin, 2004n, Giranviliinne Jooshuwa giyo naaꞌꞌu dumma aqinyeti Oreela maddabettidosona. Eti sooppe soo haggaaziiddi tanaara gayttidosona. Eti taani xannaꞌanawu koyiyaakkonne tana oychchin moocu gaas. Eraa giyo maxaafaa koyroppe doommidi tana xannaꞌissanaadan eta oychchaas. Eti taani kase xannaꞌidoogaara issi malabaa xannaꞌissanaakkonne beꞌanawu koyaas. Giranvili nu heeran gubaaꞌe shiiqoti deꞌiyoogaa tawu yootiis. Tammu laytta gidiyaagawu taani sooppe kiya erana xayikkonne shiiquwaa baanawu koyaas. Hegaa gishshawu, Giranvili nu soo yiidi goomman biya wombbaran tana SHiiquwaa Addaraashaa efiis.

Guyyeppe, Granvili Tiꞌokiraase Haggaazo Timirtte Keettan mazgafettanaadan tana minttettiis. I hagaadan giis: “Neeni sila gidikkonne haasayana danddayaasa. Issi galla neeni dere haasayaa haasayaana. Hegee attennaba.” I minttettiyaabaa yootidoogee taani xalanaadan oottiis.

Taani Giranviilaara haggaaziyoogaa doommaas. SHin nu heeran deꞌiya daro ogeti goomman biya wombbaran baanawu injjetokkona. Yaatiyo gishshawu, Giranvili tana he wombbaran uttisidi suganaadan A oychchaas. Hegee tawu keehi injjetiis. Hosppune 2005n, taani xammaqettaas. Hegaappe daro takkennan, SHiiquwaa Addaraashan xuufiyaa kifiliyaaninne cenggurssaa kifiliyan oottanaadan ishantti tana loohissidosona.

Ta aaway 2007n wolwoluwaa daafan hayqqidoogee azzanttiyaaba. Nu soo asay keehi azzaniis. Giranvili nunaara woossiis; qassi minttettiya Geeshsha Maxaafaa xiqiseta nuussi nabbabiis. Naaꞌꞌu layttaappe simmin, hara keehi azzanttiyaabay merettiis; Giranvili wolwoluwaa daafan hayqqiis.

Keehi azzanida nu guutta gubaaꞌiyan gubaaꞌiyawu oottiya issi uraappe attin, gubaaꞌe cimi baawa. Taani keehi siiqiyo ta laggee Giranvili hayqqidoogan keehi azzanaas. Taani kaseegaappe aaruwan Yihoowakko shiiqanaadan I ubbatoo tana maaddiis; qassi tawu koshshiya darobaa immiis. I Hayqqi simmin shiiqido koyro gubaaꞌe shiiquwan Wochiyo Keelaa Xinaatiyawu menttota taani nabbabaas. Taani koyro naaꞌꞌu menttota nabbabaas; shin hegaappe simmin yeekkiyoogaa doommada afuttaa tigaas. Yaatin madirakiyaappe wodhdhaas.

Hara gubaaꞌiyaappe ishantti nuna maaddanawu Oreela yiido wode taani ufayttaas. Qassi macara biiroy Kojo giyo dumma aqinyiyaa maddabiis. Ta aayyiyaanne ta kaalo ishay Geeshsha Maxaafaa xannaꞌidi xammaqettidoogee tana keehi ufayssiis. Guyyeppe, taani Laappune 2015n, gubaaꞌiyawu oottiyaagaa gidada sunttettaas. Amarida wodiyaappe simmin, tawu koyro dere haasayaa haasayaas. He gallassi, Giranvili amarida layttaappe kase, “Issi galla neeni dere haasayaa haasayaana. Hegee attennaba” giidi tawu yootidoogaa qoppada ufayttaasinne yeekkaas.

JW Brodkastingiyaa^® prograametun, taagaa mala hanotan deꞌiya ishanttubaanne michchonttubaa akeekaas. Eti sahettikkonne, darobaa oottana danddayoosonanne ufayttoosona. Taanikka issi issibaa oottana danddayays. Taassi danddayettida ubbaban Yihoowassi loytta oottanawu koyaas. Taani ubba wode aqinye gididoy hegaassa. Qassi Masqqalaa 2019n taani mule qoppabeennabaa siyaas! He aginan, 40 gidiya aassiyaageeti deꞌiyo nu gubaaꞌiyan cima gidada sunttettaas.

Tana Geeshsha Maxaafaa xannaꞌissidanne Yihoowawu haggaazanaadan maaddida siiqo ishanttanne michchontta keehi galatays. Ubbaappe aaruwan, Yihooway tana dogibeenna gishshawu, A keehi galatays.