Eray?

Woocetti xaafettida benibay Geeshsha Maxaafaara waani maayettii?

YERUSALAAMEN, Baybil Landis Muuzemiyan, Kiristtoosi yelettanaappe kase 700 layttaappenne 600 layttaappe gidduwan wocetti xaafettida issi shuchchay deꞌees. He shuchchay Israaꞌeelan Kebroona katamaappe darin haakkennaasan deꞌiya mooganawu goꞌettiyo gonggoluwaappe beettiis. Woocetti xaafettidabay hagaadan gees: “Yahweh Sabaꞌoti Hagava naꞌaa Hagafa qanggiis.” Ha woocetti xaafettidabay Geeshsha Maxaafay yootiyoobaara waani maayettii? He shuchchay Xoossaa sunttay Yihoowa woy Yahweh gidiyoogaa bessees; Ibraawettuwan xaafettida YHWH giyo pitalee beni wode loytti erettiyaabanne galla galla goꞌettiyooba. Asay demmidi he gonggolotun qosido woocetti xaafettida harabatikka deꞌoosona. Xoossaa sunttay godaa bolli xaafettido ogiyaa gujjin A buzo sunttaa eti darotoo xaafidosona.

Jorjjiyan deꞌiya Yuniversttiyaa dottoriyaa Rachela Naabalsa he woocetti xaafettidabaa xeelliyaagan hagaadan gaasu: “Ha woocetti xaafettidabatun YHWH giyo sunttay daro sohuwan deꞌees. Hegee nuna darobaa tamaarissees. . . . [Geeshsha Maxaafay] yootiyoobatinne wocetti xaafettidabati yootiyoobati Israaꞌeela asaynne Yihudaa asay YHWH giyo sunttaa bantta deꞌuwan xoqqu ootti xeelliyoogaa bessoosona.” Ibraawetto pitaliyan xaafettida YHWH giyo Xoossaa sunttay shaꞌan qoodettiya sohotun Geeshsha Maxaafan deꞌees. Darotoo buzo sunttay Xoossaa sunttaa bessiyaaba.

Woocettida shuchchan “Yahweh Sabaꞌot” giyo qaalaa birshshettay “olanchchatu Xoossaa Yihoowa” giyoogaa. Yaatiyo gishshawu, beni wodiyan asay Xoossaa sunttaanne “olanchchatu Xoossaa Yihoowa” giyo qonccissuwaa darotoo goꞌettidaba milaatees. Hegee koyro Ibraawettuwan Xaafettida Geeshsha Maxaafan 283 sohuwan “olanchchatu Xoossaa Yihoowa,” giya qofaara maayettees; hegaappe dariya baggay Isiyaasa, Ermmaasanne Zakkaariyaasa maxaafan deꞌees.