Eray?

Koyro xeetu layttan, Xoossaa garuwan oottiya kahineti yarshshettida mehetu suuttaa waatiyonaa?

BENI Israaꞌeelan kahineti Xoossaa garuwan deꞌiya yarshshiyosan layttan layttan daro shaꞌu mehiya yarshshoosona. Koyro xeetu layttan deꞌida, taarikiya xaafe gidida Ayhuda bitanee Josefesi, Paasikaa gallassi 250,000​ppe dariya dorssay yarshshettiyo gishshawu, daro suuttay gukkiyogaa yootiis. (Wog. 1:10, 11; Qoo. 28:16, 19) He ubba suuttay waanii?

Saynttistteti Heeroodisi keexxido Xoossaa garuwan goggiyabay biyosaa demmidosona; he garoy 70 M.Ln., xayana gakkanaashin takkiis. He sohoy suuttay Xoossaa garuwappe goggidi kiyiyo soho gidiyogee erettidaba.

Yarshshiyosay awudekka geeshsha gidanaadan maaddida naaꞌꞌubata ane beꞌoos:

• Yarshshiyosaappe garssaara deꞌiya ollata: Ayhudatu higgetanne wogata qonccissiya, 200 M.Lppe simmin xaafettida issi beni maxaafay yarshshiyo sohuwappe gukkiyabati goggidi biyo hanotaabaa yootees. He maxaafay yootiyogaadan, yarshshiyo sohuwan issi bagga gaxan naaꞌꞌu ollati deꞌoosona. Yarshshuwappe gukkiya suuttaynne yarshshiyo sohuwa geeshshido haattay he ollatun gelidi Qediroona Zanggaaraa gakkanawu deꞌiya waaruwara goggidi bees.

  Biittaa bookkidi xannaꞌiyageeti he beni maxaafan odettidaban maayettoosona. Ayhudatu taarikiya yootiya issi maxaafay biittaa bookkidi xannaꞌiyageeti yarshshettida mehetu suuttaynne haattay yarshshiyo sohuwappe goggidi kiyiyo sohota Xoossaa garuwa matan demmidoogaa qonccissees.

• Keehi daro haattaa: Yarshshiyosaappe garssa baggaa geeshshanawunne suuttay goggidi baanaadan tiganawu kahinetussi keehi daro haattay koshshees. Kahineti hegawu koshshiya haattaa katamaappe demmoosona. Haattay waarotuura goggidi katamaappe yarshshiyosaa bees, qassi dagattiyonne eelliyo sohoti deꞌoosona. Joosef Patrik giyo saynttisttee, “Xoossaa garoy deꞌiyo sohuwa geeshshiyo haattaa demmanawunne geeshshido haattaa yeddanawu hegaa mala makkisettidabay he wode hara garuwawu baynnaba milatees” yaagiis.