Nabbabiyageetu Oyshaa

Yihoowi mata wode kawotettatu wozanan wottana ‘qofay’ aybee?

Ajjuutaa 17:16, 17y gita waayiya doomettaabaa hagaadan gees: “Neeni beꞌido tammu kacetinne doꞌay shaaramuxiyo ixxana, iyyo deꞌiya ubbabaa ekkirggananne O kalloyana; eti I ashuwa mirggana, qassi O muleera taman xuuggana. Ayssi giikko, Xoossay ba qofaa eti oottanaadan, ee, Xoossaa qaalay polettana gakkanaashin, eti bantta kawotettaa doꞌaayyo immiyogan bantta issi qofaa oottanaadan, I hegaa eta wozanan wottiis.” Yihoowi kawotettatu wozanan wottiyo ‘qofay’ worddo haymaanootiya xayssiyogaa gidiyogee kase nu xuufetun odettiis.

Shin he qofaa laammana koshshiis. Yihoowi kawotettatu wozanan wottana ‘qofay’ “eti bantta kawotettaa doꞌaayyo” immanaagaa. Hegee waani hananaakko akeekanawu kaalliya oyshatu zaaruwa beꞌana.

Ha hiraagay obaa yootii? ‘Shaaramuxiya’ ‘Gita Baabiloonokka’ geetettawusu; A saꞌan deꞌiya worddo haymaanooteta ubbaa qonccissawusu. ‘Zoꞌo doꞌay’ Kawotettatu Issippetettaa qonccissees. He dirijjitee alamiyan sarotettaa ehaanawu 1919n koyro eqqiis; qassi he wode Kawotettatu Waattaa Maabaraa geetettees. (Ajj. 17:3-5) ‘Tammu kaceti’ doꞌawu exatiya kawotettata ubbaa qonccissoosona.

Shaaramuxeenne zoꞌo doꞌaa giddon deꞌiya gaytotettay aybee? Shaaramuxiya zoꞌo doꞌaa ‘toggaasu’; hegee A doꞌaa kaafiyogaanne ba koyidobaa ootissiyogaa bessees.

Shaaramuxiya waananee? Doꞌaynne tammu kaceti “shaaramuxiyo” keehi ‘ixxidi’ ibaa ubbaa ekkirgananne A ay keena iitakko ubbawu bessana. Yaatidi eti O xayssana; hegee Yihoowi hanana giidoba. (Ajj. 17:1; 18:8) Worddo haymaanootetu wurssettay hegaa. Gidoppe attin, hegee hananaappe kase, Yihoowi hegaappe kase hani erennabaa kawotettata ootissana.

Yihoowi kawotettata ay ootissanee? I tammu kacetu wozanan “ba qofaa” wottana; hegeekka “eti bantta wolqqaanne maataa [zoꞌo] doꞌaayyo” woy Kawotettatu Issippetettawu immanaadan oottana. (Ajj. 17:13) Hegee woygiyogaakko qoppa. Asaa kawotettati bantta wolqqaanne maataa doꞌawu immanawu banttawu kuuyanee? Akkay! Eti hegaa oottanaadan denttettanay Xoossaa gidiyogaa hiraagay qonccissees. (Lee. 21:1; Isiyaasa 44:28ra gatta xeella.) Hegee loddan hanenna! Hegee qoppennan hanana. Hegaappe simmin, doꞌay worddo haymaanooteta ubbaa muleera xayssana.

Sinttappe aybi hanana giidi naagana danddayiyoo? Nuuni kawotettati loddan loddan Kawotettatu Issippetettaa loytti kaafiyogee oduwan odettana giidi naagana koshshenna. Nuuni naagana danddayiyobay hagaa: Akeekennan, Yihoowi kawotettati ubbay bantta maataa doꞌawu immanaadan oottana. Yaaniyo wode, nuuni gita waayee doommana haniyogaa erana. Mata wode akeekennan ubbabay laamettiyo gishshawu, he wode gakkanaashin “beegottidinne nu suure qofaa naagidi deꞌoos”!—1 Tas. 5:6.