Yihoowa Markkati Birshshido Geeshsha Maxaafay Deꞌꞌii?
Yihoowa Markkati xannaꞌanawu dumma dumma Geeshsha Maxaafaa birshshettata goꞌettoosona. Gidikkokka, Ooratta Alamiyaa Geeshsha Maxaafaa Birshshettay deꞌiyo qaalatun A goꞌettiyoogaa dosoos. Ayssi giikko, he birshshettay Xoossaa sunttaa goꞌettees, koyro qofaa laammibeenna, qassi qoncce.
Xoossaa sunttaa goꞌettees. Geeshsha Maxaafaa attamissida issoti issoti A xaafissidaagaa bonchchennan aggidosona. Leemisuwawu, issi Geeshsha Maxaafaa birshshettan, hegaa giigissiyoogan amaridabaa ootti maaddida 70ppe dariya asaa sunttay xaafettiis. SHin A xaafissida, Xoossaa Yihoowa sunttay he Geeshsha Maxaafan mule baawa!
Hara baggaara, Geeshsha Maxaafay beni xaafettiyo wode Xoossaa sunttay deꞌiyo shaꞌan qoodettiya soho ubban Ooratta Alamiyaa Birshshettan zaarettidi xaafettiis, shin hegaa birshshida konttee erettenna.
Koyro qofay laamettibeenna. Geeshsha Maxaafaa koyro qofaa laammibeenna birshshettati ubbata gidokkona. Leemisuwawu, issi birshshettay Maatiyoosa 7:13 hagaadan gees: “Unꞌꞌo penggiyaara gelite; ayssi giikko, siꞌooliya penggee aaho; yaa efiya ogeekka wayssenna.” Gidoppe attin, koyro xaafettida Geeshsha Maxaafay he sohuwan “bashshaa” geesippe attin “siꞌooliyaa” geenna. Geella birshshiyaageeti “siꞌooliyaa” giya qaalaa goꞌettidoy, iitati siꞌooliyaa taman merinawu xuugettoosona giidi ammaniyo gishshataassa gidana. SHin he qofay Geeshsha Maxaafaara maayenna. Yaatiyo gishshawu, Ooratta Alamiyaa Birshshettay, “Unꞌꞌo penggiyaara gelite; ayssi giikko, bashshawu efiya penggee aaho; ogeekka woggaa” yaagidi suure yootees.
Qoncce. Loꞌꞌo birshshettay qofaa laammennaagaa xalla gidennan, akeekanawu metenna, qoncce gidana bessees. Issi leemisuwaa beꞌa. Kiitettida PHawuloosi Roome 12:11n, sittan birshshiyo wode “ayyaanan penttiyoogaa” giya qaalaa goꞌettiis. Ha wodiyan asay hegaa loytti akeekenna gishshawu, Ooratta Alamiyaa Birshshettan akeekanawu metenna ogiyan birshshettiis. He xiqisee Kiristtaaneti “ayyaanan suullana” koshshees geetettiis.
Ooratta Alamiyaa Birshshettay Xoossaa sunttaa goꞌettiyoogaa, koyro qofaa laammennaagaanne qoncce gidiyoogaa xalla gidennan, miishsha qanxxisennan asawu imettiyoogankka dummatees. Hegaappe denddidaagan, shammanawu danddayenna asaykka, Geeshsha Maxaafaa ba qaalan nabbabana danddayees.