Geeshsha Maxaafaa Birshshettaa Maarata

Qaala ubbaa mise qaalan birshshiyogee nabbabiya asi koyro doonatun xaafettidabawu keehi matattiya qofaa akeekanaadan oottees giidi issoti issoti qoppana danddayoosona. Shin ubbatoo hegaadan hanenna. Aybissakko amaridabaa beꞌa:

• Naaꞌꞌu doonatu seeray, qaalatu qoodaynne qofaa qashettay issi mala gidenna. Ibraawettuwa eranchchay (profeeseree), S. R. Driveri doonati “dummatiyoy seeraanne kochchaa xallaana gidennan, . . . qofaa qashettankka” dummatiyogaa xaafiis. Dumma dumma doonatun dumma dumma ogetun qoppana koshshees. Eranchchay Driveri, “Hegaappe denddidaagan dumma dumma doonatun qofay qashettiyo ogee issi mala gidenna” yaagiis.

• Qaalatu qoodaaninne seeran ha wodiyan ay dooninne Geeshsha Maxaafay xaafettido Ibraawettuwara, Aramattuwaranne Giriikettuwara issi mala gidenna; hegaa gishshawu, Geeshsha Maxaafaa qaalata ubbaa mise qaalan birshshiyogee qofay qonccennaadan, haray atto issi issitoo he qofay balettanaadan oottana danddayees.

• Issi qaalaa woy issi qofaa birshshettay geluwadan geluwadan dummatana danddayees.

Birshshiya asi koyro xaafettido doonaa qaalaa mise qaalan issi issisan birshshana danddayikkonne, keehi naagettidi oottana bessees.

Qaala ubbaa mise qaalan birshshiyogee waati balettana danddayiyakko amarida leemisota beꞌa:

• Geeshsha Maxaafan ‘xiskkuwa’ qassi “xiskkiis” giya qaalati coo xiskkuwakka hayquwa xiskkuwakka malaatanawu gelidosona. (Maatiyosa 28:13; Oosuwa 7:60) Ha qaalati hayquwa malaatanawu geliyo wode, ha wodiyan nabbabiya urawu kirqqi geenna mala, Geeshsha Maxaafaa birshshiyageeti “hayquwan xiskkiis” woy “hayqqiis” gaana danddayoosona.—1 Qoronttoosa 7:39; 1 Tasalonqqe 4:13.

• Kiitettida Phawuloosi Efisoona 4:14n goꞌettido qofay “asaa ceeriya kaassan” geetettidi mise birshshettana danddayees. Ha beni wode leemisoy ceeriya (usuppun sinttatun woocido burcce mittaa) kaaꞌiyo wode asaa balettiyo meeziya malaatees. Daro doonatun mise birshshikko, ha qofay akeekettenna. ‘Asatu cimuwan’ giidi birshshiyo wode ha qofay qoncce.

• Giriikettuwa mise birshshettan “ayyaanan penttite” giya qofay Roome 12:11n deꞌees. He mise birshshettay qofaa maara qonccissenna gishshawu, Wolayttattuwan “ayyaanan suullite” geetettidi birshshettiis.

• 

  Darotoo “bantta ayyaanan hiyyeesa gididoogaa eriyaageeti anjjettidaageeta” geetettidi birshshettida qofaa Yesuusi Deriya Bolli Tamaarissidoban yootiis. (Maatiyosa 5:3, Wolayttatto Geeshsha Maxaafaa) Shin daro doonatun ha qofaa mise birshshettay akeekettenna. “Bantta ayyaanan hiyyeesa” giidi birshshiyogee issi issi doonatun yuushshi qoppennaagaa woy minnennaagaanne murttennaagaa malaatana danddayees. Shin Yesuusi asay ufayttanaadan oottiyabay asatettawu koshshiyabaa demmiyogaa gidennan, Xoossaa kaaletoy etawu koshshiyogaa akeekiyogaa gidiyogaa he sohuwan eta tamaarissiis. (Luqaasa 6:20) Hegaa gishshawu, “ayyaanaabaa saamettiyageeti” giyogeenne hegaa mala birshshettay koyro doonan xaafettida qofawu gamma birshshetta.—Maatiyosa 5:3.

• “Qanaate” geetettidi birshshettida Giriiketto qaalaa qofay daro sohotun Wolayttatto qaalaa qofaara, hegeekka, mata laggee ammanettibeenna gishshawu yiillotiyogaa woy haratussi deꞌiyaban eta miqqaynniyogaa malaatees. (Roome 13:13) Gidoppe attin, he Giriiketto qaalay loꞌꞌobaakka malaatees. Leemisuwawu, Xoossaanne ayyo goynniyogaa Yesuusinne Xoossaayyo ammanettiya harati “siiqiyogaa” woy “yeemottiyogaa” malaatanakka danddayees.—Yohaannisa 2:17; 2 Qoronttoosa 9:2.

• 

  Maatiyosa 6:17n darotoo “somꞌꞌuwa” geetettidi birshshettida Giriiketto qaalay geluwadan geluwadan daro ogiyan birshshettees. He qaalay gelido hanotaadan ‘meraa’ geetettana woy issi ura malaatana woy hara ogetun birshshettana danddayees.—Maatiyosa 16:3; Yihudaa 16.

Ha qofay Geeshsha Maxaafaa birshshettay beni xaafettido doonaa issi qaalaa ubbasan issi mala qaalan birshshiyogaa xalla gidennaagaa bessees. Birshshiya asi koyro xaafettido doonaa qofaa birshshiyo doonan loytti qonccissiya qaalata dooranawu yuushshi qoppana bessees. Qassi nabbabanawu metenna mala, birshshiyo doonaa seeraadan qofaa qashuwa giigissana koshshees.

Hegaadankka, issi uri qaalata bawu koyidoogaadan laammana bessenna. Issi qofaa xaaxi waaxin bawu milatidaagaadan qanttidi Geeshsha Maxaafaa birshshiya asi waanna qofaa geellayana danddayees. Waatidi? Birshshiya asi koyro xaafettido doonaa qofay bawu gelidoogaadan balabaa gujjanawu woy koyro qofan deꞌiya keehi koshshiyabaa agganawu danddayees. Hegaa gishshawu, Geeshsha Maxaafaa qantti birshshiyogee metootennan nabbabettana danddayikkonne, he yeda birshshettay nabbabiya asi gamma yohuwa issi issitoo akeekennaadan oottana danddayees.

Birshshiya asi ba haymaanootiyan tamaaridobay birshshettaa moorana danddayees. Leemisuwawu, Maatiyosa 7:13n, ‘Bashshawu efiya ogee woggaa’ yaagees. Issoti issoti Giriiketto qaalaa suure birshshettaadan ‘bashshaa’ giyogaa aggidi, “siꞌooliya” giidi birshshidosona; hegee eti bantta haymaanootiyan tamaaridobaa gaasuwana gidana.

Geeshsha Maxaafay goshshanchchati, henttanchchati moliya oyqqiyageetinne hegaa mala asati ubbatoo haasayiyo qaalatun xaafettidoogaakka birshshiya asi qoppana bessees. (Nahimiya 8:8, 12; Oosuwa 4:13) Hegaa gishshawu, loꞌꞌo Geeshsha Maxaafaa birshshettay wozanaa suure asi oonikka qofaa akeekanaadan maaddees. Daro asay erenna qaalaappe sohuwara akeekettiya, asay eriyo qoncce qaalatun birshshiyogee loꞌꞌo.

Geeshsha Maxaafaa ha wodiyan birshshida daroti Xoossaa sunttay, Yihoowi beni kushiyan xaafettida Geeshsha Maxaafan deꞌikkonne, gaasoy baynnan bantta shenen he sunttaa gelissibookkona. (Gujobaa A4 xeella.) Daro birshshettatun he sunttay “Godaa” giyagaa mala bonchcho sunttan laamettiis, qassi issi issi birshshettati haray atto Xoossaayyo sunttay deꞌiyogaakka genttoosona. Leemisuwawu, issi issi birshshettatun Yesuusa woosan Yohaannisa 17:26y, “Taani eti nena eranaadan oottaas,” qassi Yohaannisa 17:6y, “Neeni tau immidoogeeta nenaara eretissaas” yaagees. Shin Yesuusa woosawu gamma birshshettay, “Taani etawu ne sunttaa erissaas,” qassi “Neeni tawu [immidoogeetuyyo] . . . taani ne sunttaa erissaas” yaagees.

Ooratta Alamiya Birshshettay koyro Inggilizettuwan birshshettidaagaa kochchooruwan odettidoogaadan: “Nuuni Geeshsha Maxaafaa qofaa qanttidi birshshokko. Ha wodiya Inggilizettuwa leemisotun danddayettiyo wodenne mise qaalatun birshshiyogee qofaa afuluuqidi genttana xayikko, nuuni ubbasan danddayettida keenan qaalata mise qaalan birshshanawu baaxetida.” Hegaa gishshawu, Ooratta Alamiya Geeshsha Maxaafaa Birshshettaa Konttee koyroogaa milatiya qaalatuuninne qofan birshshanawu, hegaadankka siyiyo wode ufayssenna woy qofaa genttiya qaalatun birshshennaadan yiggi xeellanawu baaxetiis. Hegaappe denddidaagan, Geeshsha Maxaafay nabbabanawu metenna; hegaa bollikka, Xoossay kaalettin xaafettida qofay laamettibeennaagaa nabbabiya asi ammanettana danddayees.—1 Tasalonqqe 2:13.