A2
Ha Birshshettan Erettida Yohota
Giriikettuwan Xaafettida Geeshsha Maxaafaa Ooratta Alamiya Birshshettay 1950n Inggilizettuwan kiyiis, qassi kumetta Geeshsha Maxaafaa Ooratta Alamiya Birshshettay Inggilizettuwan 1961n attamettiis. Hegaappe simmin, koyro xaafettido doonatuppe likke birshshettikkonne nabbabanawu metenna ha Geeshsha Maxaafaa birshshettaa 300ppe dariya doonatun daro miiloone asay nabbabidi goꞌettiis.
Ooratta Alamiya Geeshsha Maxaafaa Birshshettaa Konttee ha wodiyan nabbabiya asi wozanappe ufayttanaadan oottiya ogiyan birshshana koshshiyogaa akeekees. Hegaadan oottanawu, ha halchchota qoppidosona:
Ha wodiyan akeekettiya qaalatun birshshiyogaa. Nabbabiya asi kase Wolayttattuwan birshshettida Geeshsha Maxaafan deꞌiya issi issi qaalata akeekanawu metootees. Hegaa mala sohotun, ha birshshettan ha wodiyan akeekettiya qaalati gelidosona. Leemisuwawu, “loꞌꞌo milatiya iitati” giya qofay asay darotoo geennaba. Hegaa gishshawu, “shollooreti” geetettiis. (Maatiyosa 6:2) Qassi Amaarattuwappe ekettida, “ashkkaray” giya qaalay issi issitoo ‘keettaa ayssiyagee’ geetettiis.—Luqaasa 12:42.
Beni Ibraawettuwaninne Giriikettuwan “zerettaa” giya qaalay kattaa zerettaa, asa naꞌaa woy zerettaa woy attuma asa zerettaa malaatana danddayees. Shin he qaalay geluwadan “naata” geetettidikka birshshettiis.—Maatiyosa 22:24; Yohaannisa 8:37.
Yesuusa worido ogiyabay odettiyosan kase birshshettan “misimaariyan xishidosona” geetettidaagee A misimaariya bolli xishidoba milatissiyo gishshawu “baxxannidosona” geetettidi birshshettiis.—Maatiyosa 27:31, 35; Roome 6:6.
Geeshsha Maxaafan deꞌiya amarida qaalati qonccidosona. Hara Geeshsha Maxaafaa birshshettatun deꞌiya issi issi qaalata nabbabiya asi akeekana mala qonccissana koshshees. Leemisuwawu, “Shiꞌool” giya Ibraawetto qaalaynne “Hedes” giya Giriiketto qaalay asi ubbi moogettiyo sohuwa malaatanawu Geeshsha Maxaafan gelidosona. He qaalata daro asay erenna, qassi Giriiketu haysiyan odettiyagaadan “Hedes” naaꞌꞌu birshshettay deꞌiyo qaala. Hegaa gishshawu, Geeshsha Maxaafaa xaafidaageeti qoppidoogaadan naaꞌꞌu qaalatikka “Duufuwa” geetettidi birshshettidosona. Ha birshshettan tohossan “Hedes” giyagee deꞌees.—Oosuwa 2:27.
Nefesh giyo Ibraawetto qaalaanne pisiikihi giyo Giriiketto qaalaa birshshiya daroti “shemppuwa” giyo meezee deꞌees. “Shemppuwa” giyo qaalaa daro bala birshshettaappe denddidaagan, ayyaanay kaalettin Geeshsha Maxaafaa xaafidaageeti koyro doonan xaafettida ha qaalata waati gelissidaakko nabbabiya asi akeekanaadan hegee maaddees. He qaalati geluwadan geluwadan (1) asa, (2) asa deꞌuwa, (3) deꞌuwan deꞌiyabata, (4) asa qaaqqaanne amuwa, woy issi issitoo (5) hayqqidaageetakka malaatana danddayoosona. Hegaa gishshawu, ha koyro xaafettido doonaa qaalati geliyosan deꞌiya birshshettaadan birshshettidosona.—Zaarettido Wogaa 6:5; Mazamure 131:2; Leemisota 2:10; Maatiyosa 22:37.
Hegaadankka, Ajjuutaa 2:23 mala xiqisetun “kilahuwa” giya qaalay leemiso gididi geliis; he sohotun waanna xuufiyan “gomppan qoppiyobaa” geetettidi, tohossa qofan mise birshshettay geliis.
Ibraawettonne Giriiketto doonaagaadan, Wolayttattuwankka “wozanay” qanttaa ashuwa malaatikkonne leemisokka gidiyo gishshawu, waanna xuufiyan darotoo wozanaa geetettiis. Gidoppe attin, qofay akeekettenna guutta sohotun qonccidi birshshettiis. Leemisuwawu, Oosuwa 21:13y, “Intte ayssi yeekkeetiinne taani murttidoban tana shugissanawu ayssi maleetii?” yaagees, qassi “ta wozanaa shugissanawu” giya mise birshshettay tohossa qofan geliis. Hegaadankka, leemisuwawu, “modhdhuwa,” “ashuwa,” qassi “kaciya” giyo qaalati geluwadan geluwadan birshshettidosona. (Doomettaabaa 45:18; Shiishshiyagaa 5:6; Iyyooba 16:15) “Geeshsha Maxaafaa Qaalatu Qonccissuwa” giddon hegeetuppe amaridaageeti qonccidosona.
Kalallidi nabbabettees. Geeshsha Maxaafan kase birshshettida issi issi maxaafatu sunttay daro erettenna gishshawunne keehi qonccenna gishshawu laamettiis. Leemisuwawu, “Eranchchaa” giyogee “Shiishshiyagaa,” qassi “Siiquwa Sabaa” giyogee “Solomona Mazamuriya” geetettidosona. Qofaa likke birshshikkonne nabbabanawu metennaadan baaxetida. Yaatanawu, koyro doonaa qaalati gelana koshshiyosan Wolayttattuwan nabbabanawu metennaadan oottidi xaafida. “Eeli, Eeli, lama sabaqitaanii?,” “Xaalitaa, qumi,” qassi “Akelddaama” giyogeetu mala qaalata hegaadan oottida.—Maatiyosa 27:46; Marqqoosa 5:41; Oosuwa 1:19.
Maccaanne attumaa shaakkiya likke qaalatun birshshiyogaa. Koyro doonaa qaalatudan maccaa woy attumaa qonccissiyogee issi issitoo qofaa genttana danddayees. Coraa yootiyo wode, Ibraawettoykka Giriikettoykka attuman odees; gidoppe attin, attumaa, maccaa woy naaꞌꞌaakka malaatana danddayees. Leemisuwawu, koyro xaafettido doonan “Israaꞌeela attuma naata” giyo wode Yaaqooba 12 attuma naata malaatana danddayikkonne, darotoo kumetta Israaꞌeela deriya, attumaakka maccaakka malaatees. (Doomettaabaa 46:5; Kessaabaa 35:29) Hegaa gishshawu, ha birshshettan kumetta deriya malaatanawu “Israaꞌeela asaa” geetettiis.
Ha Geeshsha Maxaafaa birshshettan xiqiseta ubbaa woosan keehi naagettidinne Ooratta Alamiya Geeshsha Maxaafaa Birshshettaa Konttiya koyroogaa wozanappe bonchchidi birshshidosona.
Ha birshshettan hara erettida yohota:
Ha Geeshsha Maxaafaa birshshettan tohossa qofati deꞌoosona. Tohossa qofati kallidi deꞌiyagaadan shaahettoosona:
“Woykko” Ibraawettuwappe, Aramattuwappe woy Giriikettuwappe issi mala qofan birshshana danddayiyo ogiya bessees.—Maatiyosa 5:3, “saamettiyageeti” giyagan tohossa qofaa.
“Woykko geella” Haniya birshshetta gidikkonne dummatiya qofaa birshshiyo ogiya.—Luqaasa 8:29, “qurphphu oottidi oyqqees.”
“Mise.” Ibraawetto, Aramatto woy Giriiketto qaalaa mise qaalan birshshiyogaa, woy koyro doonaa qofaa ano birshshettaa.—Maatiyosa 11:10, “neeppe sinttawu.”
Birshshettaanne gayttiya qofaa Gujobaaninne Qaalatu Qonccissuwan deꞌiya maaddiya qofaa.—Maatiyosa 5:22, “Gaannabiya.”
Sintta baggan deꞌiya, “Xoossaa Qaalaa Erissiyo Qofaa” giyagaa giddon Geeshsha Maxaafan koyro tamaariyobati deꞌoosona. Xoossaa Qaalay wuri simmin kaallidi “Geeshsha Maxaafaa Maxaafatu Kesuwa,” “Geeshsha Maxaafaa Qaalatu Kesuwa,” qassi “Geeshsha Maxaafaa Qaalatu Qonccissuwa” giyageeti deꞌoosona. Nabbabiya uri Geeshsha Maxaafan gelidoogaadan doorettida qaalata akeekanaadan Qaalatu Qonccissoy maaddees. Gujobaa A giddon hageeti deꞌoosona: “Geeshsha Maxaafaa Birshshettaa Maarata,” “Ha Birshshettan Erettida Yohota,” “Geeshsha Maxaafay Hanno Gakkanawu Waani Naagettidee?,” “Giriikettuwan Xaafettida Geeshsha Maxaafan Xoossaa Sunttaa,” “Yesuusi Saꞌan Deꞌiyo Wode Hanida Waannabata,” qassi Geeshsha Maxaafaa minnidi xannaꞌiya asa maaddiya karttata, sanxxarazhetanne harabata.
Xoossaa Qaalaa waanna qofaa giddon maxaafatu ubban shemppuwa shemppuwa qofaa gidduwa qonccissoynne hegaara gayttida xiqiseti deꞌoosona; nabbabiya asi he maxaafaa gidduwa qanttan eranawu hegee maaddees.