GEESHSHA MAXAAFAY YOOTIYOOBAA
Kiitanchata
Xuufiyan, misiliyaaninne pilmiyan kiitanchatubay odettees. SHin kiitanchati oonee, qassi eti ay oottiyoonaa?
Kiitanchati oonee?
GEESHSHA MAXAAFAY YOOTIYOOBAA
Xoossay saluwaanne saꞌaa, qassi koyro asata medhanaappe kase, qoppana danddayiya wolqqaama meretata medhiis. Eti asaappe keehi wolqqaama, qassi eti Xoossay deꞌiyoosan deꞌoosona; asi he sohuwaa baananne beꞌana danddayenna. (Iyyooba 38:4, 7) Geeshsha Maxaafay he wolqqaama meretata ‘kiitanchata’ yaagees.—Mazamure 104:4.a
Aappun kiitanchati deꞌiyoonaa? Keehi daro. Xoossaa araataa yuushuwan deꞌiya kiitanchati “sha7aaninne miilooniyan” qoodettoosona. (Ajjuutaa 5:11) Hegee kiitanchati xeetu miilooniyan qoodettoosona giyoogaa!
“Taani xeellada, kawotaa araataa . . . yuuyi aadhdhidi eqqida daro kiitanchchatu cenggurssaa siyaas; eti sha7aaninne miilooniyan paidettoosona.”—Ajjuutaa 5:11.
Kiitanchati beni wode ay oottidonaa?
GEESHSHA MAXAAFAY YOOTIYOOBAA
Kiitanchati darotoo Xoossaa gishshaa haasayidosona, qassi kiitettidosona.b Eti maalaalissiya Xoossaa oosuwaa oottiyoogaakka Geeshsha Maxaafay qonccissees. Xoossay Abrahaama anjjanawunne i ba naꞌaa Yisaaqa yarshshennaadan digganawu issi kiitanchaa kiittiis. (Doomettaabaa 22:11-18) Eexxiya buuraa giddon kiitanchay qonccidi keehi koshshiya kiitaa Muuseyyo yootiis. (Kessaabaa 3:1, 2) Hananabaa yootiya Daaneeli gaammotu ollaa giddon olettido wode, “Xoossai bari kiitanchchaa kiittidi, gaammotu doonaa gorddiis.”—Daaneela 6:22.
“GODAA kiitanchchai buuran, eexxiya tama lacuwaa giddon [Muuseyyo] beettiis.”—Kessaabaa 3:2.
Kiitanchati ha wodiyan ay oottiyoonaa?
GEESHSHA MAXAAFAY YOOTIYOOBAA
Kiitanchati ha wodiyan oottiiddi deꞌiyo ubbabaa erana danddayokko. SHin, eti suure wozanay deꞌiyoogeeti Xoossaabaa loytti eranaadan maaddiiddi deꞌiyoogaa Geeshsha Maxaafay yootees.—Oosuwaa 8:26-35; 10:1-22; Ajjuutaa 14:6, 7.
Yaaqoobi kiitanchati saꞌaappe saluwaa gakkiya ‘gayyiyaa’ bolli giꞌꞌiyoogaanne appe wodhiyoogaa aymuwan beꞌanaadan Yihooway oottiis. (Doomettaabaa 28:10-12) Yaaqoobi ba beꞌidobaappe Xoossaa Yihooway bawu ammanettiya, maadoy koshshiyoogeeta maaddanaadan kiitanchata saꞌaa kiittees giidi qoppennan aggenna; nuunikka hegaadan qoppana danddayoos.—Doomettaabaa 24:40; Kessaabaa 14:19; Mazamure 34:7.
“He aimuwan gayye issoi biittan eqqin, ayyo xeerai saluwaa gakkiyoogan, Xoossaa kiitanchchati gi77ishiininne wodhdhishin be7iis.”—Doomettaabaa 28:12.
a Geeshsha Maxaafay issi issi ayyaana meretati Xoossaa haaruwaa bolli makkalidoogaa yootees; qassi ha iita kiitanchata ‘xalaheta’ yaagees.—Luqaasa 10:17-20.
b Ibraawettuwankka Giriikettuwankka, “kiitanchaa” giyo qaalay “kiitettiyaagaa” giyoogaa.