UNꞌꞌISSIYAABAY KUMIDO ALAMIYAN

1 | Ne Payyatettaa Naaga

HEGEE KEEHI KOSHSHIYOY AYBISSEE?

Metoy woy daafabay nu payyatettaa daro ogetun qohana danddayees.

Metiyaabay gakkiyo wode asay unꞌꞌettees. Qassi adussa wodiyawu unꞌꞌettiya asay darotoo sahettees.
Qoppennan gakkiya daafabay sahettiya daro asay issi kutti hosppitaaliyaa baanaadan oottiyo gishshawunne gidiyaagaa keena xalee yan deꞌennan aggana danddayiyo gishshawu asaa loytti maaddanawu hosppitaalee metootanaadan oottana danddayees.
Daafabay asay qumaanne xaliyaa mala keehi koshshiyaabata shammanawu metootanaadan oottana danddayees.

Neeni Erana Koshshiyaabay Aybee?

Wolqqaama sahoynne unꞌꞌettiyoogee neeni balabaa kuuyanaadan oottana danddayees. He kuuyidobay neeni ne payyatettawu maaddiyaabaa oottennaadan diggana danddayees. Hegaappe denddidaagan, neeni keehi sahettana danddayaasa.
Neeni ne payyatettaa naagana xayikko, harggee keehi goobana woy ubba woranakka danddayees.
Neeyyo loꞌꞌo payyatettay deꞌikko, unꞌꞌissiyaabay kumido ha alamiyankka loꞌꞌobaa kuuyana danddayaasa.
Neeni dure woy hiyyeesa gidikkokka, ne payyatettaa naaganawu koshshiyaabata oottana danddayaasa.

Haꞌꞌi Ay Oottana Danddayay?

Danddayettiyo wode ubban, akeekanchcha uri gakkana danddayiya qohuwaa akeekidi, hegaappe naagettanawu bawu danddayettida ubbabaa oottees. Ne payyatettaa naaganawukka hegaadan oottana danddayaasa. Leemisuwawu, ne bollaanne ne keettaa geeshshatettaa naagiyoogee nena harggee oyqqennaadan woy oyqqikkokka goobennaadan ubbatoo maaddana danddayees. Harggidi tuggatiyoogaappe kasetidi naagettiyoogee loꞌꞌo.

“Taaninne ta keettaayyiyaa nu bollaanne nu keettaa geeshshatettaa naagiyoogee akkamettanawunne xaliyaa shammanawu daro miishshaa kessennaadan nuna maaddiis.”—Andresa.a

a Ha maxeetiyan issi issi asatu sunttay laamettiis.

WAANA NAAGETTANA DANDDAYAY? Maaddiya Zoriyaa

Unꞌꞌissiyaabay merettiyo wode, kaallidi deꞌiyaabata oottiyoogan ne payyatettaa naagana danddayaasa

NE GEESHSHATETTAA UBBATOO NAAGA

Geeshshatettaa ubbatoo naaga

Geeshsha Maxaafay yootiyoobaa: “Cincca asi iitaa be7idi, qosetti aattees.” (Leemiso 22:3) Ne payyatettaa qohana danddayiyaabata shaakka eranawunne hegeetuppe naagettanawu baaxeta.

Qumaa maanaappe kase woy sheeshsha keettaappe simmiyo wode ne kushiyaa saamunaaninne haattan ubbatoo loytta meecetta.
Ne keettaanne so giddon neeni darotoo bochchiyo sohotanne miishshata ubbatoo loytta geeshsha.
Asappe asa oyqqiya harggiyan sahettiya uraara neessi danddayettida ubban gayttennaadan naagetta.

BOLLAWU MAADDIYA QUMAA MA

Bollawu maaddiya qumaa ma

Geeshsha Maxaafay yootiyoobaa: “Ba bollaa ixxiya asi mulekka baawa; shin . . . ooninne ba bollaa mizeesinne naagees.” (Efisoona 5:29) Nuuni miyoobaanne uyiyoobaa loytti naagettiyoogan nu bollaa siiqiyoogaa bessoos.

Daro haattaa uya.
Dumma dumma ataakilttetanne mittaa ayfeta ma.
Modhdhuwaa, maxiniyaanne sukkaariyaa darissada mooppa.
Ushshaa likkiyaappe aattada uyoppa; qassi sijaaraa woy jallissiyaabata goꞌettoppa.

“Nuuni harggiyaappe naagettanawu, bollawu maaddiya qumaa maanawu baaxetoos. Hegaadan oottana xayikko, akkamettanawu daro miishshaa kessana danddayoos. SHin, nuuni nu miishshaa kessiyoy nu bollawu maaddiya qumaa shammanaassa.”—Karlosa.

BOLLAA MINTTIYAABAA OOTTA, QASSI LOYTTA SHEMPPA

Bollaa minttiyaabaa ootta

Geeshsha Maxaafay yootiyoobaa: “Daafuraaninne carkkuwaa oiqqanau yedettiyoogaa mala jaaman daafuridi demmiyo naa77u kushebaappe, woppan demmiyo issi kushebai darees.” (Eranchchaa 4:6) Nuuni oosuwaa loytti oottana bessiyoogee tuma; shin gidiyaagaa keena shemppana koshshees.

Bollaa minttiyaabaa ootta. Ubbatoo hemettiyoogan hegaadan oottana danddayaasa. Neeni cimidaba, wolqqaama harggiyaa harggiyaaba woy ne bollay silidaba gidikkokka, bollaa minttiyaabaa oottiyoogee ne payyatettaa maaddana danddayees.
Loytta shemppa

Loytta shemppa. Neeni loytta xiskkana xayikko, unꞌꞌettananne issiban xeelaa wottanawu metootana danddayaasa. Neeni daro wodiyawu loytta shemppana xayikko, wolqqaama harggiyaa harggana danddayaasa.
Neeni woysu saatiyan xiskkana koshshiyaakko kuuyada he saatiyan xiskka. Qassi ubba gallassi issi mala saatiyan xiskkanawunne xiskkuwaappe denddanawu baaxeta.
Xiskkanawu hiittaa kiyada televizhiiniyaa beꞌoppa woy elektronike miishshata goꞌettoppa.
Zinꞌꞌanaappe kase deexxiya qumaa mooppa, qassi ushshaanne tukke malabata uyoppa.

“Ta xiskkiyo hanotay ta payyatettaa maaddiyoogaa woy qohiyoogaa akeekaas. Taani loytta xiskkana xayikko, issi issitoo tana huuphee qoxxeesinne bollay sakkees. SHin taani loytta xiskkiyo wode, oottana koshshiya ubbabaa loyttada oottays. Yaatiyo wode daro wolqqaa demmaysinne darotoo sahettikke.”—Jasttiina.