UNꞌꞌISSIYAABAY KUMIDO ALAMIYAN

2 | Ne Aquwaa Naaga

HEGEE KEEHI KOSHSHIYOY AYBISSEE?

Daro asay koshshiyaabaa demmanawu ubba galla baaxetees. Alamiyan kumida metoy hegee yaa wayssanaadan oottana danddayiyoogee azzanttiyaaba. Aybissi?

Heeran metoy merettiyo wode kattay, keettaa keraynne hegaa mala harabati keehi alꞌꞌoosona.
Daafabay dariyoogee asawu oosoy xayanaadan woy damoozay guutta gidanaadan oottana danddayees.
Daafabay oosuwaa, keettaanne harabaa xayssana danddayees; hegee asay hiyyeesanaadan oottees.

Neeni Erana Koshshiyaabay Aybee?

Ne miishshaa bessiyaagaadan goꞌettikko, daafabay gakkiyo wode waayettennan aggana danddayaasa.
Ubba wode miishshan ammanettana danddayettenna; ne demmiyo miishshaa, ne minjjaanne neeyyo deꞌiyaabaa waagay guuxxana danddayees.
Ufayssaanne so asaa issippetettaa malabata miishshan shammana danddayettenna.

Haꞌꞌi Ay Oottana Danddayay?

Geeshsha Maxaafay Yootiyoobaa: “Miyoobainne maayiyoobai de7ikko, hegee nuuyyo gidana.”—1 Ximootiyoosa 6:8.

Deꞌiyaabay gidana giyoogee darobaa koyennaaagaanne hachchissi koshshiyaabaa demmidi ufaytti deꞌiyoogaa gujjees. Neeyyo deꞌiya miishshay guutta gidiyo wode, hegee ubba keehi koshshiyaaba.

Deꞌiyaabay gidana gaanawu, ne deꞌuwaa sima oottana koshshees. Ne abbiyaappe aadhdhiyaabaa ubbatoo shammiyaaba gidikko, guyyeppe nena daro metoy gakkana danddayees.

WAANA NAAGETTANA DANDDAYAY? Maaddiya Zoriyaa

Unꞌꞌissiyaabay merettiyo wode, kaallidi deꞌiyaabata oottiyoogan ne aquwaa naagana danddayaasa

DARO MIISHSHAA KESSIYOOGAA AGGA

Daro miishshaa kessiyoogaa agga

Neeyyo keehi koshshennabata shammoppa. Nena hagaadan oychcha: ‘Taassi kaamee tumuppe koshshii? Geella issi issibaa gaden tokkiyoogan qumawu daro miishshaa kessennan aggana danddayiyaanaa?’
Issibaa shammanaappe kase, nena hagaadan oychcha: ‘Tumuppe taassi hagee koshshii? A shammanawu gidiya miishshay tawu deꞌii?’
Kawotettay woy hara dirijjiteti maaddiyaaba gidikko, eti maaddanaadan oychcha.

“Nu soo asay issippe shiiqidi nu deꞌuwaabaa haasayida. Daro miishshaa kessanaadan oottiya allaxxiyoobaa aggibayida woy kaseegaappe guuttida. Qassi hiraysiyaabaa shammidi kattiyoogaa doommida.”—Gifta.

AY KEENA MIISHSHAA KESSANAAKKO HALCHCHA

Ay keena miishshaa kessanaakko halchcha

Geeshsha Maxaafay yootiyoobaa: “Mino oosanchchaa halchchoi dureyees; shin eesotiya ubbai hiyyeesana.” (Leemiso 21:5) Ay keena miishshaa kessanaakko halchchiyoogee neeni demmiyo miishshaappe daruwaa kessennaadan maaddees.

Koyruwan, aginan aginan neeni demmiyo miishshaa xaafa oyqqa.
Kaallada, neeni aginan aginan koshshiyaabawu kessiyo miishshaa shaakkada era, qassi neeni miishshaa aybissi aybissi kessiyaakko loytta qora.
Yaatada neeni demmiyoonne kessiyo miishshaa geeddarssa, qassi ne kessiyo miishshay demmiyoogaappe darennaadan ay guuttana woy aggana danddayiyaakko shaakka era.

“Aginan aginan, nuuni demmiyoonne kessiyo miishshaa xaafi oyqqoos. Qoppennan gakkiyaabawunne sinttappe nuuni shammanabawu miishshaa minjjoos. Yaatiyo wode, nuuni demmiyo miishshaa waati goꞌettanaakko kasetidi eriyo gishshawu keehi unꞌꞌettokko.”—Karloosa.

ACUWAN GELOPPA / MIISHSHAA MINJJA

Acuwan geloppa / miishshaa minjja

Daro acuwan gelennaadan loytta halchcha. Danddayettikko, acuwan gelennaadan naagetta. Acuwan geliyoogaappe, shammana koshshiyaabawu miishshaa minjjanawu baaxeta.
Qoppidobawu woy qoppennan gakkiyaabawu sinttappe kessana miishshaa aginan aginan amaridaagaa minjja.

MINNADA OOTTA / NE OOSUWAA AGGOPPA

Geeshsha Maxaafay yootiyoobaa: “Minnidi oottidoban ubban go77ai de7ees.”—Leemiso 14:23.

Minnada ootta / ne oosuwaa aggoppa

Ubbatoo ne oosuwawu loꞌꞌo xeelay deꞌiyoogaa gida. Ne oottiyoy dosiyo ooso gidana xayikkokka, hegee neeni miishshaa demmanaadan maaddees.
Minnada oottiyaagaanne ammanettidaagaa gidanawu baaxeta. Hegee neeni ne oosuwan takkanaadan maaddana danddayees, shin neeni oosuwaappe kiyikkokka, sinttappe oosuwaa demmanawu metootennaadan oottees.

“Oosoy taani dosiyoogaa woy qanxxettiya miishshay ta koyiyoogaa keena gidana xayikkokka, demmidobaa aybanne oottays. Taani taayyo oottiyaabadan, ubbatoo ammanettiyaagaa gidada muruta ooso oottays.”—Dimitra.

Neeni oosuwaa koyaydda deꞌiyaaba gidikko . . .

Minnada koya. Oosuwaa dirijjiteti erissuwaa kessibeennaba gidikkokka, neeni oottana danddayiyo oosoy deꞌiyaakkonne baada oychcha. Neeni oosuwaa koyaydda deꞌiyoogaa ne laggetuyyoonne dabbotuyyo yoota.
Koshshiyaagaadan ne hanotaa laamma. Ubbaban ne koyiyoogaa mala gidida ooso demmennan aggana danddayaasa.