UNꞌꞌISSIYAABAY KUMIDO ALAMIYAN

3 | Ne Siiqiyoogeetuura Dabbotaa Mintta

HEGEE KEEHI KOSHSHIYOY AYBISSEE?

Unꞌꞌissiyaabay kumido alamiyan daroti keehi hirggiyo gishshawu, siiqiyoogeetuura bantta dabbotaa minttokkona.

Daro asati bantta laggetuppe banttana haassoosona.
Aqo laggeti issoy issuwawu kehokkona.
Bantta naata unꞌꞌissiyaabay yelidaageeta darin woy mule qofissenna.

Neeni Erana Koshshiyaabay Aybee?

Nuuni asatettaaninne qofan payya gididi deꞌanaadan laggeti maaddiyo gishshawu, eti keehi koshshoosona.
Alamiyan waayissiyaabay kumidoogaa gaasuwan unꞌꞌettiyoogee qoppibeenna metoy ne soo asaa gakkanaadan oottana danddayees.
Oduwan odettiya unꞌꞌissiyaabaa naati siyiyo wodenne beꞌiyo wode, intte qoppiyoogaappe aaruwan eti yayyana danddayoosona.

Haꞌꞌi Ay Oottana Danddayay?

Geeshsha Maxaafay yootiyoobaa: “Laggee mule wodekka siiqees; ishaikka metuwaa wode maaddanaassi yelettees.”—Leemiso 17:17.

Laggeti nuna maaddananne loꞌꞌobaa zorana danddayoosona. Hegaa mala siiqiya laggeti meto wodiyan gakkiyaabaa minnidi genccanaadan nuna maaddoosona.

WAANA NAAGETTANA DANDDAYAY? Maaddiya Zoriyaa

Unꞌꞌissiyaabay gakkiyo wode, kaallidi deꞌiyaabata oottiyoogan ne siiqiyoogeetuura dabbotaa minttana danddayaasa

NE AQO DEꞌUWAA MINTTA

Ne aqo deꞌuwaa mintta

Geeshsha Maxaafay yootiyoobaa: “Issuwaa gidiyoogaappe naa77a gidiyoogee lo77o . . . Qassi, naa77aappe issoi kunddikko issoi denttees.” (Eranchchaa 4:9, 10) Aqo laggeti, issippe maadettidi xoonanawu kaaꞌiya issi ispportte citan deꞌiya kaassanchchatu malappe attin, issoy issuwaa annaacettiya dumma dumma citan deꞌiyaageetu mala gidana bessenna.

Inttena gakkida metuwaa gaasuwan intte aqo laggiyaa bolli bessennabaa oottennaadan naagettite. Danddayanchcha gidanawu baaxetite.
Guuxxiis giishin saaminttan issitoo, intte metuwaabaa intte aqo laggiyaara haasayite. Intte hegaadan haasayiyoy issoy issuwaa qohanaassa gidennan, metuwaa giigissanaassa gidiyoogaa dogoppite.
Inttena ufayssiyaabaa issippe oottiyo wodiyaa bazzite.
Intte bullachchaa wode woy hara ufayssiya wode denddido pootuwaa beꞌiiddi issippe aattido loꞌꞌo wodiyaabaa qoppite.

“Aqo laggeti ubbaban maayettenna aggana danddayoosona, shin hegee eti issippe oottana danddayokkona giyoogaa gidenna. Aqo laggeti issibaa issippe kuuyananne he kuuyidobaa polanawu issippe oottana danddayoosona.”—Devida.

HARATUURA LAGGETETTAA MINTTA

Haratuura laggetettaa mintta

Ne laggetuppe maaduwaa demmiyoogaa xalla gidennan, eta maaddana danddayiyo ogiyaa qoppa. Neeni harata minttettiyo wode, neeyyo minettaasa.
Ne laggeti waani deꞌiyaakko eranawu ubba galla etappe amaridaageeta oychcha.
Neegaa mala metoy gakkin eti waani xoonidaakko ne laggeta oychcha.

“Gote mala metoy nena gakkiyo wode, laggeti likke ogiyaa kaalettiya malaataa mala. Eti yootiyoobay neeni kase eriyooba gidikkokka, suure ogiyaa eti nena bessana danddayoosona. Laggeti neessi qoppoosona, qassi neenikka etawu qoppiyoogaa eroosona.”—Niikoolo.

NE NAATA KOSHSHIYAABAN MAADDA

Ne naata koshshiyaaban maadda

Geeshsha Maxaafay yootiyoobaa: “Asai ubbai siyanau eesoto; shin [haasayanawu] . . . eesotoppo.” (Yaaqooba 1:19) Koyro heeran, intte naati banttana yashshiyaabaanne qofissiyaabaa yootanawu mammottana danddayoosona; shin danddayan ezggiyoogan eti banttawu siyettiyaabaa yootanaadan maaddana danddayeeta.

Intte naati banttana qofissiyaabaa yayyennan yootanaadan oottite. Issi issi naati, banttana yelidaageetuura uttidi issoy issuwaa xeelliiddi gidennan, qumaa miiddi woy tohuwan issisaa biiddi haasayanawu metootokkona.
Intte naati unꞌꞌettanaadan oottiya oduwaa darotoo beꞌiyaakkonne shaakki erite.
Intte soo asaa qohuwaappe naaganawu intte ay oottidaakko naatussi yootite.
Qoppibeennabay gakkiyo wode oottanabaa halchchite, qassi hegaa intte naatuura meezetite.

“Intte naata haasayissite, qassi banttawu siyettiyaabaa eti yootanaadan oottite. Geella eti banttana yashshiyaabaa, hirggissiyaabaa, woy yiilloyiyaabaa intteppe qosana danddayoosona. Intteyyookka etaagaadan siyettiyoogaa, qassi hegaa intte waani gencciiddi deꞌiyaakko etawu yootite.”—Beetaano.