Loꞌꞌo Naꞌaanne Iita Naꞌaa

ANE Qaayeelanne Aabeela xeella. Eti naaꞌꞌaykka diccidi gitatidosona. Qaayeeli goshshanchcha gidiis. I kattaa, ayfiyaa miyo mittaanne ataakilttiyaa oottees.

Aabeeli ba dorssata heemmiyaagaa. I dorssa marata naagiyoogaa dosees. Eti diccidi gitatin, Aabeeli gamꞌꞌennan wude dorssaa heemmiyaagaa gidiis.

Issi gallassi Qaayeelinne Aabeeli Xoossaassi imotaa ehiidosona. Qaayeeli ba oottido kattaappe amaridaagaa ehiis. Aabeeli qassi ba dorssatuppe daro loꞌꞌuwaa ehiis. Yihooway Aabeelaaninne a imotan ufayttiis. SHin Qaayeelaaninne a imotan ufayttibeenna. Aybissakko eray?

Hegee Aabeela imotay Qaayeelaagaappe loꞌꞌo gido gishsha xalaalaassa gidenna. Aabeeli loꞌꞌo asa gidiyo gishshataassa. I Yihoowanne ba ishaa siiqees. SHin Qaayeeli iita asa; i ba ishaa siiqenna.

Yaatiyo gishshau, Qaayeeli ba qofaa laammana koshshiyoogaa Xoossay yootiis. SHin Qaayeeli siyennan ixxiis. Xoossay Aabeela appe aattidi dosido gishshau i keehippe yiillotiis. Hegaa gishshau, Qaayeeli Aabeela ‘Ane dembbaa boos’ yaagiis. Hegan banttarkka deꞌishin, Qaayeeli ba ishaa Aabeela shociis. I keehippe shocido gishshau Aabeeli hayqqiis. Qaayeeli oottidobay keehippe iitaba gidennee?

Aabeeli hayqqikkokka, Xoossay hanno gakkanau a hassayees. Aabeeli loꞌꞌo asa; Yihooway a mala loꞌꞌo asaa mule dogenna. Yaatiyo gishshau, issi gallassi Xoossaa Yihooway Aabeela deꞌuwau zaaridi ehaana. He wode Aabeeli mule hayqqenna. I ha saꞌaa bolli merinau deꞌana danddayees. Aabeela mala asatuura erettanaagee loꞌꞌoba gidennee?

SHin Xoossay Qaayeela mala asatun ufayttenna. Hegaa gishshau, Qaayeeli ba ishaa wori simmin, Xoossay a bantta soo asaappe haahosaa biidi deꞌanaadan oottiyoogan qaxxayiis. Qaayeeli haakkidi hara heeran deꞌanau biiddi ba michchotuppe issinno ekkidi biis; akka assi machcho gidaasu.

Hegaappe guyyiyan, Qaayeelinne a machchiyaa naata yelidosona. Addaamenne Hewaani naati haraatikka attumaageeti maccaageeta ekkidosona; etikka naata yelidosona. Gamꞌꞌennan saꞌan daro asay deꞌiyoogaa doommiis. Ane etappe amaridaageetubaa tamaaroos.