Yaaqoobassi So Asay Corattiis

ANE hagan deꞌiya so asaa coraa xeella. Hageeti Yaaqooba 12⁠u attuma naata. Ayyo macca naatikka deꞌoosona. Etappe neeni sunttaa eriyoy deꞌii? Ane etappe amaridaageetubaa tamaaroos.

Liya Roobeela, Simoona, Leewanne Yihudaa yelaasu. Raaheela naꞌa yelabeenna gishshau, daro azzanaasu. Hegaa gishshau, ba ashkkariyo Baalo Yaaqoobi ekkanaadan a immin, Baala Daananne Nifttaaleema geetettiya naaꞌꞌu attuma naata yelaasu. Hegaappe guyyiyan, Liyakka ba ashkkariyo Zilppo Yaaqoobassi immin, Zilppa Gaadanne Aseera yelaasu. Wurssettan Liya hara naaꞌꞌu attuma naata, Yisaakooranne Zaabiloona yelaasu.

Wurssettan Raaheelakka issi naꞌa yelaasu. A sunttaa Yooseefa sunttaasu. Yooseefi daro erettida asa gidido gishshau, takkidi abaa darobaa tamaarana. Hageeti Yaaqooba 11 attuma naati, i Raaheeli aawaa Laabaanaara deꞌishin yelettidaageeta.

Yaaqoobi amarida macca naatakka yeliis; shin Geeshsha Maxaafay etappe issinni sunttaa xallaa yootees. I sunttay Diino.

Yaaqoobi Laabaanaara deꞌiyoogaa aggidi, guyye simmidi Kanaane biitti baanau koyiyo wodee gakkiis. Hegaa gishshau, i ba so asaa coraa, daro dorssa wudiyaanne mehe wudiyaa issippe shiishshidi, adussa ogiyaa biyoogaa doommiis.

Yaaqoobinne a soo asay Kanaane gelido guutta wode giddon, Raaheela hara attuma naꞌaa yelaasu. Hegee hanidoy eti ogiyan deꞌishiina. Raaheela keehin waayettada, wurssettan yelaydda hayqqaasu. SHin yelettida guutta naꞌay aynne hanibeenna. Yaaqoobi a Biniyaama yaagidi sunttiis.

Israaꞌeela asay ubbay yiidoy etappe gidiyo gishshau, Yaaqooba 12⁠u attuma naatu sunttaa hassayana koyoos. SHin Israaꞌeela 12⁠u zareti xeesettidoy, Yaaqooba 10⁠u naatunne Yooseefa naaꞌꞌu naatu sunttaana. Ha naati ubbay yeletti simmin Yisaaqi daro wodiyau deꞌiis; qassi naꞌaa naata daruwaa beꞌidoogee a keehi ufayssennan aggenna. SHin a naꞌaa naꞌiyaa Diina waanidaakko ane beꞌoos.