Paaroona Aymuwaa

NAAꞌꞌU layttay aadhdhiis shin, Yooseefi haꞌꞌikka qasho keettan deꞌees. Eessaa tigiyaagee a hassayibeenna. Hegaappe, issi qammi Paarooni naaꞌꞌu dumma aymuwaa aymottiis; eta birshshettaykka aybakko eranau koyiis. Hagan i xiskkidaagaa beꞌay? Wonttetta galla maallado Paarooni ba eranchcha asata xeesidi, etassi ba aymuwaa yootiis. SHin eti a aymuwaa birshshettaa ayyo yootana danddaybookkona.

Haꞌꞌi wurssettan eessaa tigiyaagee Yooseefa hassayiis. I Paaroonassi: ‘Taani qasho keettan deꞌiyo wode aymo birshshana danddayiya issi bitanee yan deꞌees’ yaagiis. Paarooni sohuwaara Yooseefa qasho keettaappe ehiissiis.

Paarooni ba aymuwaa Yooseefassi yootiiddi yaagiis: ‘Taani laappun orddenne modhdho miizzata beꞌaas. Etappe simmin, laappun laafanne gilqqa miizzata beꞌaas. He gilqqati modhdho miizzata miidosona.

‘Naaꞌꞌantto aymuwan taani laappun loꞌꞌonne muruta tiyati issi anuwan dicciyaageeta beꞌaas. Etappe simmin, taani laappun shoggettidanne shullida tiyata beꞌaas. He shoggettida tiyati laappun loꞌꞌonne muruta tiyata mittidosona’ yaagiis.

Yooseefi Paaroonassi hagaadan giis: ‘Naaꞌꞌu aymotu birshshettaykka issuwaa. Laappun modhdho miizzatunne laappun loꞌꞌo tiyatu birshshettay, laappun layttaa; qassi laappun gilqqa miizzatunne laappun shoggettida tiyatu birshshettay hara laappun layttaa. Lappun daro kalo layttati Gibxxe biittau ubbau yaana; shin laappun kosha layttay hegaa kaallana.’

Hegaa gishshau, Yooseefi Paaroonassi yaagiis: ‘Issi eranchcha asa doorada he laappun kalo layttatun kattaa shiishshanaadan aawatettaa ayyo imma. Yaatikko, yiya guutta kattay mokkiyo laappun kosha layttatun asay namisettenna’ yaagiis.

Paarooni he qofaa dosiis. Kattaa gootaran shiishshanaadan, Yooseefa dooriis. Yooseefi Gibxxe biittan Paaroonappe kaallidi daro erettida asa gidiis.

Hosppun layttappe guyyiyan, koshaa wode, Yooseefi amarida asati yiyaageeta beꞌiis. Eti oonakko eray? Eti Yooseefa bayra ishantta 10⁠ta! Kanaanen, eta son kattay wurana haniyo gishshau, eta aaway Yaaqoobi eta Gibxxe kiittiis. Yooseefi ba ishantta eriis shin eti a eribookkona. Aybissakko eray? Hegee, Yooseefi diccidi gita asa gidido gishshataassanne dumma maayuwaa maayido gishshataassa.

Yooseefi naatettan deꞌiiddi ba ishantti baassi zigganau yiyaageeta beꞌido aymuwaa hassayiis. Hegaa neeni nabbabidoogaa hassayay? Hegaa gishshau, Yooseefi bana Gibxxe kiittidaagee Xoossaa gidiyoogaanne hegeekka loꞌꞌobaassa gidiyoogaa erana danddayiis. Yooseefi ay oottiyaaba neessi milatii? Ane beꞌoos.