Yaaqooba Soo Asay Gibxxen Deꞌanau Biis

YOOSEEFI baayyo siyettiyaaba teqqi oyqqana danddaybeenna. Ba ashkkarati ubbay sooppe kiyanaadan yootiis. Yooseefi ba ishanttu xallaara attido wode, yeekkiyoogaa doommiis. I ayssi yeekkiyaakko eti eribeenna gishshau, a ishantti ay keena dagammidaakko qoppana danddayoos. Wurssettan i: ‘Taani Yooseefattennee. Ta aaway hanno gakkanaassi paxa deꞌiiyye?’ yaagiis.

A ishantti keehippe dagammido gishshau, haasayana danddaybookkona. Eti yayyidosona. SHin Yooseefi: ‘Hayyanintta taakko haa shiiqite’ yaagiis. Eti shiiqin i: ‘Taani, intte Gibxxe biittau bayzzido intte ishaa Yooseefa’ yaagiis.

Yooseefi etassi kehatettan haasayiiddi yaagiis: ‘Tana intte hagau bayzzido gishshau azzanoppite. Asaa shemppuwaa ashshanau tana Gibxxe kiittiday tumuppe Xoossaa. Paarooni tana Gibxxe biitta ubbaa haariyaagaa oottiis. Yaatiyo gishshau, haꞌꞌi eesuwan guyye ta aawaakko biidi hegaa ayyo yootite. I haa taakko yiidi deꞌanaadan yootite’ yaagiis.

Hegaappe guyyiyan, Yooseefi ba kushiyaa ishanttu bolli wottidi, eta ubbaa qoommidi yeriis. Paarooni Yooseefa ishantti yiidoogaa siyidi Yooseefassi: ‘Eti hagaappe para gaariyaa ekki biidi, bantta aawaanne bantta soo asaa ekkidi haa yona. Taani Gibxxen deꞌiya ubbaappe loꞌꞌo sohuwaa etassi immana’ yaagiis.

Etikka hegaadan oottidosona. Yooseefa aaway ba soo asaa ubbaara Gibxxe yiido wode, Yooseefi aara gayttishin hagan beꞌana danddayaasa.

Yaaqooba soo asay keehi corattiis. Gibxxe biido wode, Yaaqoobi, a naatinne a naatu naati muleera 70. SHin eta maccaasatikka deꞌoosona; geella daro ashkkaratikka deꞌana danddayoosona. Hageeti ubbay Gibxxen deꞌiyoogaa doommidosona. Xoossay Yaaqooba sunttaa Israaꞌeela giidi laammido gishshau, eti Israaꞌeeleta geetettidosona. Nuuni takkidi beꞌanaagaadan Israaꞌeeleti Xoossaayyo keehippe dumma asa gididosona.