Muuseenne Aarooni Paaroonaara Gayttidosona

MUUSEE Gibxxe gakkido wode, ba beꞌido malaatata ubbaa ba ishaa Aaroonassi yootiis. Muuseenne Aarooni he malaatata Israaꞌeeleta bessido wode, asay ubbay Yihooway etaara deꞌiyoogaa ammaniis.

Hegaappe simmin, Muuseenne Aarooni Paaroonakko biidosona. Eti ayyo: ‘Israaꞌeela Xoossaa Yihooway, “Eti heezzu gallassa ogiyaa biidi bazzuwan taayyo goynnanaadan ta asaa yedda” yaagees’ yaagidosona. SHin Paarooni: ‘Taani Yihoowa ammanikke; Israaꞌeeletakka yeddikke’ yaagiis.

Asay Yihoowayyo goynnanau giidi, bantta oosuwappe shemppanau oychchido gishshau, Paarooni yiillotiis. Hegaa gishshau, kaseegaappekka deexo oosuwaa eti oottanaadan wolqqanttiis. Israaꞌeeleti bantta deꞌoy haa iitidoogau Muusa gaaso oottidosona; Muuseekka hegan azzaniis. SHin i hirggenna mala Yihooway ayyo yootiis. Yihooway: ‘Paarooni ta asaa yeddanaadan ta oottana’ yaagiis.

Muuseenne Aarooni Paaroonaara gayttanau simmidi biidosona. He wode eti issi malaataa bessidosona. Aarooni ba gatimaa saꞌan olin, wogga shooshsha kiyiis. SHin Paaroona shareechchotikka bantta gatimaa gatimaa saꞌan olin, eta gatimaykka shooshsha kiyiis. SHin, Aaroona shooshshay he shareechchotu shooshshata miyaagaa beꞌa! Paarooni haꞌꞌikka Israaꞌeeleta yeddibeenna.

Yaatiyo gishshau, Yihooway Paaroonayyo timirtte immiyo wodee gakkiis. I hegaa waati oottidaakko eray? Gibxxetu bolli 10⁠u boshaa, woykko wolqqaama metuwaa ehiyoogaana.

Daro boshati gakki simmin, Paarooni Muusekko kiittidi: ‘Ha boshaa teqqa; yaatikko ta Israaꞌeeleta yeddana’ yaagiis. SHin boshay eqqiyo wodiyan, Paarooni ba qofaa laammibayees. Asaa yeddibeenna. Wurssettan, 10⁠tta boshay gakki simmin, Paarooni Israaꞌeeleta yeddiis.

He 10⁠u boshaa ubbaa eray? Kaalliya sinttaa ne kessin etabaa ane tamaaroos.