Isxxifaanoosi Shuchchan Cadettiis

HAGAN gulbbatida bitanee Isxxifaanoosa. I Yesuusassi ammanettida erissiyo ashkkara. SHin haꞌꞌi a bolli aybi gakkiiddi deꞌiyaakko beꞌa! Ha asati wogga shuchchatun a caddiiddi deꞌoosona. Ha keehi iitabaa a bolli oottana gakkaanashin eti Isxxifaanoosa ixxidoy aybissee? Ane beꞌoos.

Isxxifaanoosi maalaalissiya malaatata oottanaadan Xoossay a maaddiiddi takkiis. Ha asati hegaa dosokkona; qassi i asaa tumaa tamaarissiyo gishshau, hegan aara palamettidosona. SHin Xoossay Isxxifaanoosayyo daro eratettaa immin, ha asati wordduwaa tamaarissiiddi deꞌiyoogaa qonccissiis. Hegee eta ubba kaseegaappekka haa yiilloyiis. Yaatiyo gishshau, a oyqqidi, a bolli wordduwaa markkattiya asata ehiidosona.

Qeesetu halaqay Isxxifaanoosa: ‘Hageeti giyobi tumee?’ yaagidi oychchiis. Isxxifaanosi Geeshsha Maxaafan baasettida loꞌꞌo haasaya haasayidi oyshaa zaariis. I haasaya wurssettan, beni wode iita asati Yihooway kiittin hananabaa yootiyaageeta ay keena ixxidaakko yootiis. Hegaappe i: ‘Inttekka he asatu mala. Intte Xoossaa ashkkaraa Yesuusa worideta, qassi Xoossaa higgiyaukka azazettibeekketa’ yaagiis.

Hegee haymaanootiyaa kaalettiya asata keehippe yiilloyiis! Eti hanqquwan suullidi manddidosona. SHin Isxxifaanoosi pude xoqqu gi xeellidi: ‘Xeellite! Saluwan Yesuusi Xoossaappe ushachcha baggan eqqidaagaa beꞌayis’ yaagiis. He wode, ha asati bantta hayttaa bantta kushiyan tuccidi Isxxifaanoosakko woxxi biidosona. Eti a oyqqidi katamaappe gaxi goochchi kessidosona.

Yan eti bantta maayuwaa kessidi, Saaꞌoola giyo wodallay naagana mala immidosona. Saaꞌoola beꞌay? Hegaappe, he asatuppe amaridaageeti Isxxifaanoosa shuchchan caddiyoogaa doommidosona. Neeni beꞌiyoogaadan Isxxifaanoosi gulbbatidi Xoossaa: ‘Yihoowau, ha iita oosuwaassi eta qaxxayoppa’ yaagidi woossiis. Etappe amaridaageeti haymaanootiyaa kaalettiyaagetun cimettidoogaa i erees. Hegaappe Isxxifaanoosi hayqqiis.

Issi uri ne bolli iitabaa oottiyo wode, ayyo haluwaa kiyanau malay, woy Xoossay haluwaa kiyanaadan oychchay? Isxxifaanoosinne Yesuusi hegaadan oottibookkona. Eti banttassi iita gidida asatussikka kehidosona. Ane eta leemisuwaa kaallanau baaxetoos.