SHaahuwaa 8

Xoossaa Halchchoy Polettanau Biiddi Deꞌees

1, 2. Xoossay tuggaa xayssanau giigissuwaa waati oottidee?

MAKKALIDA asaanne dayidanttatu haaroy daro xeetu layttaassi asaa naata turqquuqissiiddi deꞌiis. Gidikkokka, Xoossay nu tuggaa shenehoo giibeenna. Ubba, daro xeetu layttatu ubban, asaa naata shemppuwa diggida iitatettaappenne tuggaappe shemppissanau giigissuwaa oottiiddi takkiis.

² Edenen makkalabay meretto wode, Xoossay ha biittaa asay deꞌiyo gannate soho oottiya ayssuwaa giigissiyo ba halchchuwaa erissiyoogaa doommiis. (Doomettaabaa 3:15) Takkidi, Xoossay waannayidi a baggaara haasayiyo Yesuusi, ha yiya Xoossaa kawotettaa ba timirttiyau ayfe yoho oottiis. Yesuusi asaa naatussi deꞌiya hidootay Xoossaa Kawotettaa xalla yaagiis.—Daaneela 2:44; Maatiyoosa 6:9, 10; 12:21.

3. Yesuussi saꞌau yiya kawotettaa woygidi xeegidee? Aybissii?

³ Yesuusi he yiya Xoossaa Kawotettay saluwan gididi haariyo gishshau, ‘saluwaa kawotettaa’ yaagidi xeegiis. (Maatiyoosa 4:17) Qassikka, Yesuusi he kawotettaa Kanee Xoossaa gidiyo gishshau, ‘Xoossaa kawotettaa’ yaagidi xeegiis. (Luqaasa 17:20) Aadhdhida xeetu layttatu ubban, Xoossay ba ayyaanan denttettido xaafeti, he kawotettaa yameti oonakkonne qassi he kawotettay ay polanaakko xaafanaadan oottiis.

Saꞌaa Ooratta Kawuwaa

4, 5. Xoossay i doorido Kawoy Yesuusa gidiyoogaa waati bessidee?

⁴ Xoossaa Kawotettaassi Kawo gidiya uri oottiyoobata yootiya daro hiraagata, naaꞌꞌu shaꞌu laytta gidiya wodiyaappe kase poliday, Yesuusa. Saluwaa kawotettaa baggaara asaa naata Haaranaadan Xoossan doorettidaagee Yesuusa gidiyoogee a oosuwan qoncciis. Yesuusi hayqoogaappe guyyiyan, Xoossay a saluwan wolqqaamanne hayqqenna ayyaana mereta oottidi deꞌuwau denttiis. I hayquwaappe denddoogau daro markkati deꞌoosona.—Oosuwaa 4:10; 9:1-9; Roome 1:1-4; 1 Qoronttoosa 15:3-8.

⁵ Hegaappe guyyiyan Yesuusi “Xoossaappe ushachcha baggaara utti aggiis.” (Ibraawe 10:12) Saluwan deꞌiya Xoossaa Kawotettaa Kawo gididi, tangguwaa ekkanau Xoossay aawatettaa immanaashin yan uttidi naagiis. Hagee, Xoossay: “Taani ne morkketa neeni tohuwan yedhdha eqqiyoobaa oottana gakkanaassi, hagan taappe ushachcha baggaara utta” yaagidi Yesuusassi yootido Mazamure 110:1n deꞌiya hiraagaa polo.

6. Yesuusi Xoossaa Kawotettaa Kawo gidanau giday deꞌiyoogaa waati bessidee?

⁶ Yesuusi saꞌan deꞌido wode, hegaa mala sohuwau baassi giday deꞌiyoogaa bessiis. Yedetay gakkinkka baqennan, boree baynna suure duussan Xoossaassi aqiis. Hegaadan oottiyoogan, asi paacee gaakkiyo wode, Xoossaassi ammanettidi deꞌana danddayenna yaagiya Seexaanaa mootoy worddo gidiyoogaa bessiis. Polo asa gidida Yesuusi, ‘naaꞌꞌantto Addaamee,’ Xoossay medhdhido polo asa meretan bali baynnaagaa bessiis.—1 Qoronttoosa 15:22, 45; Maatiyoosa 4:1-11.

7, 8. Yesuusi saꞌan deꞌido wode ay loꞌꞌobaa oottidee? He oosuwan i bessidobay aybee?

⁷ Hanno gakkanau haarida asatuppe, Yesuusi haggaazido guutta layttatu giddon oottido loꞌꞌobatu keenaa oottiday oonee? Yesuusi Xoossay geeshsha ayyaanan immido wolqqan harggidaageeta, wobbeta, qooqeta, tulletanne duudeta pattiis. I ubba hayqqidaageetakka denttiis! Kawotettaa bonchchuwan yiyo wode asaassi saꞌa yuushuwan oottanabaa guuttaara ootti bessiis.—Maatiyoosa 15:30, 31; Luqaasa 7:11-16.

⁸ Yesuusa kaalliya Yohaannisi: “Yesuusi oottido hara darobaikka de7⁠ees; ubbabai huuphiyan huuphiyan xaafettiyaakko, xaafettiya maxaafatuyyo ha mule sa7ai gidanabaa taayyo milatenna” giidoogaadan, i saꞌan deꞌido wode keehi daro loꞌꞌobaa oottiis.—Yohaannisa 21:25.a

9. Suure wozanay deꞌiyoogeeti Yesuusakko corattidi ayssi yiidonaa?

⁹ Yesuusi keha, asaayyo qaretaynne keehi gita siiqoy deꞌiyoogaa. I hiyyeesatanne unꞌꞌoy gakkidoogeeta maaddiis; gidoppe attin, dureta woy xoqqa sohoy deꞌiyoogeetakka shaakkibeenna. Suure wozanay deꞌiyoogeeti, Yesuusi: “Daafuranchchatoo, deexuwaa tookkiyaageetoo, ubbati taakko haa yiite; taani inttena shemppissana. Taani ashkkenne wozanappe kauyyiyaagaa gidido gishshau, ta qambbaran waaxettite; taappe tamaarite; intte shemppuwaukka intte shemppo demmana. Aissi giikko, ta qambbarai giiga; qassi taani inttena toossidoogeekka kaushsha” yaagido shoobiyaassi zaaruwaa immidosona. (Maatiyoosa 11:28-30) Xoossaassi yayyiyaageeti Yesuusakko coratti yiidi, i haariyo wodiya ufayssan naagidosona.—Yohaannisa 12:19.

Issippe Gididi Haariyaageeta

10, 11. Yesuusaara issippe gididi saꞌaa haariyaageeti oonee?

¹⁰ Asaa kawotettan issippe gididi haariyaageeti deꞌiyoogaadan saluwan deꞌiya Xoossaa Kawotettaassikka, issippe gididi ayssiyaageeti deꞌoosona. Yesuusi asaa naatu bolli kawo gididi haariyo wode, aara issippe gididi saꞌaa bolli haariyo maataa demmanaagaa baayyo matattiyaageetussi qaalaa gelido gishshau, aara haariya haraatikka deꞌoosona.—Yohaannisa 14:2, 3; Ajjuutaa 5:10; 20:6.

¹¹ Hegaappe denddidaagan, asaa naatuppe guutta qooday deꞌiyoogeeti, Yesuusaara issippe saluwan deꞌanau hayqquwaappe denddidosona. Asaa naatussi wurenna anjjuwaa ehiya Xoossaa Kawotettay eta ubbaa oyqqidaagaa. (2 Qoronttoosa 4:14; Ajjuutaa 14:1-3) Yaatiyo gishshau, Yihooway aadhdhida wodetu ubban asaa naatussi merinaa anjjuwaa ehiya haaruwau baasuwaa baasiiddi takkiis.

Xoossaappe Gaxi Kiyida Haaroy Xayanau Matiis

12, 13. Haꞌꞌi Xoossaa Kawotettay ay oottanau giigi uttidee?

¹² Aadhdhida xeetu laytta wodiyan Xoossay asaa duussan kalttiya geliis. Ha brooshuriyan SHaahuwaa 9n tobbanaagaadan, Yesuusi ayssiyo Xoossaa Kawotettay 1914n eqqidoogaanne haꞌꞌi Seexaanaa alamiya ubbaa xayssanau giigetti uttoogaa Geeshsha Maxaafaa hiraagay bessees. He Kawotettay Kiristtoosa ‘morkketu bolli haaranau’ giigetti uttiis.—Mazamure 110:2.

¹³ Hagaa xeelliyaagan, Daaneela 2:44n deꞌiya hiraagay: “He kawotu [haꞌꞌi deꞌiyaageetu] laittan, saluwaa Xoossai mulekka kunddenna, hara asaukka [naaꞌꞌantto asi haaranaadan imettenna] kawotettaa [saluwan] essana. He eqqida [Xoossaa] kawotettai he kawotettata ubbaa gaaceretti xaissana; shin i merinau eqqidi daana” yaagees.

14. Asaa haaroy xayiyoogan bettiya issi issi goꞌꞌati awugeetee?

¹⁴ Xoossaappe gaxi kiyida haaroy ubbay muleera xayiyo wode, Xoossaa Kawotettaa haaroy saꞌan kumetta aawatettaa oyqqana. He Kawotettay saluwan gididi haariyo gishshau, asan mule hambbalaashettenna. Haariyo maatay koyro doomettoogaadan, saluwan, Xoossaagaa gidana. Xoossaa haaroy saꞌaa ubbaa haariyo gishshau, ooninne worddo hayimaanotiyan cimettenna woykko goꞌꞌi baynna asaa eratettaaninne polotikkay baasettido qofatun cimettenna. Hegeetuppe issoykka deꞌanaadan koyettenna.—Maatiyoosa 7:15-23; Ajjuutaa, shemppo 17⁠ppe biidi 19.

[Tohossa qofaa]

[Sinttaa 18n deꞌiya misiliyaa]

Yesuusi saꞌan deꞌido wode harggidaageeta pattidoynne hayqqidaageetakka denttidoy ooratta alamiyan ay oottanaakko bessanaassa

[Sinttaa 19n deꞌiya misiliyaa]

Saluwan deꞌiya Xoossaa Kawotettay appe gaxi kiyida ubba haaruwaa gaaceretti xayssana