Ta Hagaadan Haniyoogee Saruwaanee?

KAYYOTTIDA issi bitanee hagaadan yaagidi xaafiis: “Ta diccidoy Ingglize biittaana gidiyo gishshau, azzaniyoogaa asau erissennaadan tamaarada diccaas. Wottadara gididi oottida ta aaway, issibay sakkido wode achchaa daxxidi, ‘Yeekkoppa!’ giidoogaa hanno gakkanaukka hassayayiis. Ta aayyiya tananne ba hara naata yerido woy qoommido wodiya hassayikke (nuuni muleera oyddu naata). Ta aaway hayqqiyo wode tau layttay 56. Keehippe azzanaas. Gidikkokka, koyro wode yeekkana danddayabeykke.”

Issi issi wogatun, asay bana azzanttidabaanne ufayssidabaa qoncceyanau metoottenna. Etassi ufayssi woy azzanoy siyettiyoogaa, hara asay erana danddayees. Hara baggaara qassi, issi issi alamiya heeratun, leemisuwau huuphessa Awuroppaninne Inggilize biittan, asay, ubba qassi attumaageeti, banttana ufayssidabaa woy azzanttidabaa qonccissennaadan, banttana gakkidabaa coꞌꞌu giidi aattanaadaaninne genccanaadan hanidi diccoosona. Gidoppe attin, intte siiqiyo asi hayqqin, kayyottiyoogaa qoncciyan erissiyoogee balee? Geeshsha Maxaafay hegaa xeelliyaagan woygii?

Geeshsha Maxaafay Yeekkidosona Giyo Asata

Geeshsha Maxaafay arshsho Meediteraaniya heeran deꞌida, bantta ufayssaanne azzanuwaa loytti qonccissiya Ibraawe asatun xaafettiis. Geeshsha Maxaafay bantta azzanuwaa qoncciyan bessida daro asatu leemisuwaa oyqqiis. Kawuwaa Daawiti a naꞌay Amnooni hayqqin azzaniis. Ubba ‘yibbaata yeeho yeekkiis.’ (2 Sameela 13:28-39) Ubba a sohuwan wolqqan kawotana koyida ammanettenna naꞌay Abeseloomi hayqqido wodekka kayyottiis. Geeshsha Maxaafay hagaattuwa yaagees: “Yaagin kawoi [Daawiti] daroppe azzaniis; gimbbiyaa penggiyaa huuphen de7iya keettaa gelidi yeekkiis; kawoi biiddi, ‘Aayye ta na7au Abeseloomaa! Ta na7au! Ta na7au Abeseloomaa! Ne gishshaa taani haiqqarkkinaashsha! Aayye ta na7au Abeseloomaa! Ta na7au!” yaagidi yeekkiis. (2 Sameela 18:33) Daawiti, hara ay aawukka gidin ba naꞌau azzaniyoogaadan azzaniis. Yelidaageeti, bantta naatu gishshaa hayqqiyakko aappunttoo amottidonaa! Guutta naati yelidaageetuppe kasetidi hayqqiyoogee, asay naagennaba.

Yesuusi, i siiqiyo Alꞌꞌaazari hayqqido wode waanidee? Duufuwaakko matattiiddi yeekkiis. (Yohaannisa 11:30-38) Hara wode, Magddala Mairaama Yesuusi moogettosaa baada yeekkaasu. (Yohaannisa 20:11-16) Geeshsha Maxaafay hayquwaappe dendduwabaa yootiyoogaa eriya issi Kiristtaanee, hayqqidaageeti deꞌiyo hanotaa xeelliyaagan Geeshsha Maxaafay odiyoogaa geeshshi erennaageetudan, wozanaa bayidi kayyottennaagee qoncce. SHin issi tumu Kiristtaanee, hayquwaappe denddoy deꞌiyoogaa eriyaaba gidikkokka, asa gidiyo gishshau, ba siiqoti hayqqiyo wode kayyotteesinne yeekkees.—1 Tasalonqqe 4:13, 14.

Yeekkana Bessi woy Aggana Bessii?

Ha wodiyan deꞌiya nuunishin, waanana bessii? Qoncciyan azzaniyoogaa metiyaabadan woy yeellayiyaabadan xeelleetii? Hagaa xeelliyaagan zoriyaa immiyaageeti woygiyoonaa? Ha wodiyan eti shiishshiyo qofay darotoo, beni wode xaafettida Geeshsha Maxaafan deꞌiya asappe gidenna aaro eraa qonccissees. Nu azzanuwaa qoncceyanaappe attin qottana bessenna; yaagoosona. Hagee eti azzanidoogaa Geeshsha Maxaafay odiyo beni wode ammanettida asata, hegeetikka, Iyyooba, Daawitanne Ermmaasa hassayanaadan oottees. Eti bantta azzanuwaa qottibookkona. Hegaa gishshau, asaappe shaahettiyoogee eratetta gidenna. (Leemiso 18:1) Azzanoy heera wogaadaaninne issi heeran aakkidi deꞌiya hayimaanotiya ammanuwaadan dumma dumma ogiyan qonccana danddyiyoogee tuma.a

Intte yeekkanau koyiyaaba gidikko shin? Yeekkiyoogee asaa naatu meretan deꞌiyaaba. Qassi Alꞌꞌaazari hayqqido wode Yesuusi ‘ba wozanan daro mishettidi afuxxoogaa’ qoppite. (Yohaannisa 11:33, 35) Siiqiyo asi hayqqiyo wode yeekkiyoogee oorattabaa gidennaagaa hegan bessiis.

Kayyottiya asaa — Siiqiyo asi hayqqiyo wode kayyottiyoogee wottin deꞌiyaabee

Raahelo geetettiya i naꞌiya SIDS (Sudden Infant Death Syndrome woykko qoppennan yiira naatu bolli gakkiya hayquwaa) giyo harggiyan hayqqido Aan geetettiya aayyeebay hegee tuma gidiyoogaa bessees. I azinay yaagiis: “Garamissiyaagee Aano gidin tana gidin issoykka baliyan yeekkibooko. Hara ubbay yeekkiis.” Aana hegaa qonccissayida yaagaasu: “Ee, shin taani nu naaꞌꞌaassikka gididi aadhdhiya keena yeekkaas. Azzanttiya hanotay gakkido guutta wodiyaappe guuyyiyan, issi gallassi tarkka son deꞌayida keehippe kayyottaas. Gallassa muliya yeekkaas. SHin hegee tana maaddidoogaa ammanettays. Hegaappe guuyyiyan tau kehidaba milattiis. Ta naꞌiya hayqqin yeekkoogee bessiyaaba. Kayyottiya asay yeekkanaadan oottana koshshees gaada ammanayiis. Hara asay ‘yeekkoppa’ yaagiyoogee erettidaba; gidikkokka, hegee aynne goꞌꞌiyaaba gidenna.”

Issoti Issoti Kayyottido Ogiyaa

Issoti issoti siiqiyoogeeti hayqqido wode waanidonaa? Leemisuwassi, Juwanitibiba xeella. Guutta naatu hayqoy waatiyakko erausu. Ichchashutoo boshshetaasu. Simmada haranttuwaa shaaraasu. Kaamiyaa daafay gakkido gishshau hosppitaaliyaa biido wode, a hirggidoogee erettidaba. Naaꞌꞌu saaminttaappe guyyiyan, wode gakkennan maarotaa oyqettaasu. Sohuwaara issi Kilo graame kumenna—Baaneesa yeletaasu. “Keehippe ufayttaas” yaagada Juwanita hassayausu. “Wurssettan aayo gidaas!”

SHin i ufayssay gamꞌꞌibeenna. Oyddu gallassaappe guyyiyan Baaneesa hayqqaasu. “Keehippe kayyottaas. Aayotettay taappe akeekennan ekkettiis. Tau paci deꞌiyoobadan siyettiis. Soo yaada Baaneesiyo nuuni giigissido kifiliyaanne taani iyyo shammido maayota beꞌiyoogee keehi kayyoyiis. Kaalliya naaꞌꞌu aginaassi a yelettido gallassa qoppaas. Ay asaarakka gidin gayttada aybanne oottanau koyabeykke” yaagada Juwanita hassayausu.

Hagee likkiyaappe aadhhdida azzanoo? Hara asay akeekanau metootana danddayiyaaba gidikkokka, Juwanitidan hegaa malabay gakkidoogeeti, yiira naatu hayqoy, issi wode etaara deꞌidi hayqqida asau kayyottiyoogaadan michchiyoogaa yootoosona. Issi naꞌay bana yelidaageetun siiqettiyoy, biron yelettanaappekka kase. Aayyeera dumma gayttotettay deꞌees. He yiiray hayqqiyo wode, aayyiyaa keehi gita asi hayqqdoogaattuwa qoppausu. Hagee haraatikka akeekana bessiyaaba.

Yiilloynne Bana Mooranchcha Oottiyoogee Waati Qohana Danddayiyaakko

Hara aayyiyaa ba 6 laytta naꞌay yelettanaappe kase doommida wozanaa harggiya gaasuwan qoppennan hyqqidoogaa odaydda bau siyettidaba qonccissaasu. “Bolli bollan siyettiya daro hanotaa aattaas—jalliyoogaa, asa ammanennan ixxiyoogaa, tana mooranchcha kessiyoogaa, ta azinaanne haakimiyaa bolli naꞌaa hanotay qofissiyaaba gidiyoogaa akeekibeenna gishshau yiillottiyoogaa.”

Yiilloy kayyottiyogaassi hara malata gidana danddayees. Haakimeenne narsseti hayqqidaagaassi oottana bessiyaagaa keena oottibookkona; giyoogan yiillottiyoogaa gidana danddayees. Woy balabaa haasayidaba woykko oottidaba milatiya dabbota woy laggeta hanqqettiyoogaa gidana danddayees. Issoti issoti hayqqida uray ba payyatettaa shenehoo giidoogau yiillotoosona. Istteela: “Ta azinay ba payyatettaa naagidabaa gidiyaakko, hayqqennaagaa eriyo gishshau, a bolli keehi yiillotoogaa hassayaas. Keehippe sahettiis; shin haakimiyaa zoriyaa shenehoo giis.” Issitoo issitoo qassi paxa deꞌiyaageeti hayqqida uray oottiyoobay etau gujjetto gishshau, hayqqidaageetun yiillotoosona.

Issoti issoti yiillottoogee, etau moorodan siyettees hegaa giyoogee, yiillottiyo gishshau bantta bolli pirddana danddayoosona. Haraati bantta siiqotu hayquwaassi bantta huuphiya gaasodan xeelloosona. “Sohuwaara haakime keettaa efiidaakko” woy “hara haakime keettaa efiiddaakko” woy “ba payyatettaa loytti naaganaadan oottidaakko, hayqqana danddayenna shin” yaagidi banttana moornachchadan xeelloosona.

Aayyiyaa ba naˈaa idimmidoogaa hassayawusu — Naꞌa hayqoy keehippe michchiyaaba; yelidaageeta wozanappe qarettidi minttettiyoogee maaddana danddayees

Issotuyyo issotuyyo banttana mooranchchadan xeelliyo hanotay, eti siiqiyo asi qoppennaaninne naagennan deꞌishin hayqqidaba gidikko, wolqqaamana danddayees. Hayqqida uraa hanqqettido woy aara ooyettido wodiya qoppiyoogaa doommoosona. Woy hayqqida urau oottana bessiyaabaa oottibeennabadan qoppiyoogaa doommana danddayoosona.

Unddenna wodiyaassi gamꞌꞌiya daro aayotu kayyoy, naatu hayqoy yelidaageetussi, ubba qassi aayotussi azzaniiddi daro wodiya gamꞌꞌanaadan oottees; giya daro eranchchatu qofaa bessiyaaba.

Intte Aqo Laggee Hayqqiyo Wode

Aqo laggiyaa hayqoy, ubba qassi issippe darobaa oottidi aattidaba gidikko, hara keehippe kayyoyiyaabaa. Issippe deꞌido deꞌoy, hemetay, oosoy, allaxxiyoogeenne issoy issuwaara maadettiyoogee simmidi deꞌana danddayenna giyoogaa.

Eunikka ba azinay wozanaa daafuraappe denddidaagan qoppennan hayqqido wode hanidabaa odausu. “Koyro saaminttan ta asatettay oottiyoogaa aggidabadan jallaas yaagaasu. Haray atto singgiyooba gidin malꞌꞌiyaba woy cammiyaba gidin shaakka erana danddayabeykke. Gidoppe attin, ta guuggee hara asatettaappe shaahettidabadan siyettiyoogaa aggibeenna. Haakimeti CPR giyo ogiyaaninne xaliyan a deꞌuwaa takkissanau baaxettiyo wode aara takko gishshau, a hayquwaabaa ammanada ekkanau metotabeykke. Gidikkokka, issi kaamee kakaa doonaappe kunddiyo wode aynne oottana danddayenna hanotan xeelliyo wode siyettiyaagaadan azzanaasinne mishettaas.”

A yeekkadee? “Ee keehippe yeekkaas; ubba minttettiya qofaa oyqqida daro dabddaabbeta nabbabiyo wode yeekkaas. Ubbaa huuphen huuphen nabbabiyo wode yeekkaas. Hegaadan oottidoogee he gallassaa minna aadhdhanaadan maaddiis. SHin asay zaari zaaridi haꞌꞌi ne waanay yaagi oychchiyo oyshay aynne minttettana danddaybeenna. Keehippe azzanidoogee oossinne qoncce.”

Eunikko minnanaadan maaddiday aybee? “Erennan ta deꞌuwaa deꞌiyoogaa doommana gaada kuuyaas” yaagausu. “Gidikkokka, deꞌuwaa keehippe dosiya ta azinay tanaara deꞌennaagaanne deꞌuwan issippe ufayttennaagaa qoppiyoogee haꞌꞌikka azzanttees.”

“Intte Oottiyoobaa Haraati Sugin Oottoppite . . . ”

Leavetaking—When and How to Say Goodbye geetettiya maxaafaa xaafidaageeti hagaadan zoroosona: “Intte qoppanaunne oottanau koshshiyaba haraati sugin oottoppite. Issi asi azzaniyo hanotay hara asaagaappe dummatees. Haraati intte keehippe kayyottiyoogaa woy bessiya ogiyan kayyottennaagaa qoppanau woy hegaa inttessi yootanau danddayoosona. Hegaa etayyo atto giitenne dogite. Intte huuphiya wolqqanttidi hara asaa woy heeran deꞌiya azzaniyo meeziyaa kaallanau koyiyoogee, intteyyo siyettiyaaba zaarettidi payyatetta wodiyaadan oottanau bessiyo dichchaa qanttees.”

Issi asi azzaniyo hanotay hara asaagaappe dummattiyoogee qoncce. Ubba asaayyo, issi azzaniyo hanotay haraappe giiga giidi zoriiddi deꞌokko. Gidikkokka, azzanida asi merettida ooratta hanotaa meezetanau waayettiyo wode, metoy merettees. He wodiyan qarettiya laggetu maadoy koshshana danddayees. Geeshsha Maxaafay: “Laggee mule wodekka siiqees; ishaikka metuwaa wode maaddanaassi yelettees” yaagees. Hegaa gishshau, maaduwaa oychchanau, asau odanaunne yeekkanau yayyoppite.—Leemiso 17:17.

Issi siiqiyo uray hayquwan shaahettiyo wode kayyottiyoogee, deꞌiyaabanne intte kayyuwaa haraatuyyo qoncciyan bessiyoogeekka bala gidenna. Gidikkokka, zaaruwaa koshshiya hara oyshati deꞌoosona: ‘Ta kayyottiyoogaappe waana minettana danddayiyanaa? Tana mooranchcha oottiyoogeenne yiillottiyoogee saruwaanee? Ha hanotaa waata xoona kiyana danddayiyaanaa? Kayyuwaanne mishuwaa gencca aattanau aybi maaddanee?’ Kaalliya timirttee hageetanne hara oyshata zaarana.

a Leemisuwaassi, Nayjjeeriyaa biittan deꞌiya Yoorubaa sheeshsha gidida asay, shemppoy ashuwaa maayidi simmidi yees yaagidi ammaniyo wogay deꞌees. Hegaa gishshau, issi aayyiya ba naꞌay hayqqiyo wode, keehippe kayyottiyoy guutta wode xalaalaassa. Yoorubaa asay “Haattay gukkiisippe attin, gosee meqqibeenna” yaagiyo meeze deꞌees. Hagee Yoorubatu ammanuwadan gidikko, haattaa tikkiyo gosee woykko aayyiya hara naꞌa,—geella hayqqida naꞌaa hara ogiyan yelana danddayausu yaagiyoogaa. Yihoowa Markkati shemppoy hayqqenna qassi shemppoy ashuwaa maayidi simmees yaagiya, Geeshsha Maxaafan baasettibeenna, worddo qofaappe pulttida wogatanne mala ammanota kaallokkona.—Eranchchaa 9:5, 10; Hizqqeela 18:4, 20.

Kayyottiyo Wodiyaanne Hanotaa

“Wodiyanne hanotaa” giya qaalay kayyottiyo dumma halchchoynne ogee deꞌees giyoogaa gidenna. Kayyottiyo hanotay issi asappe hara asan dummatanau, bolli bollan gidanaunne guutta woy daro wodiyaa ekkanau danddayees. Ha qonccissoy ubbaa wurssi oyqqibeenna. Hara azzaniyo hanotaykka deꞌana danddayees. Hagaappe garssaara deꞌiyaageeti issi uray kayyottiyoogaa malaatana danddayiyaabata.

Koyro siyo wode: Dagamaa, ammanennan ixxiyoogaa, tuma malatennaagaa, jalliyoogaa, bana mooranchcha oottiyoogaa, yiillottiyoogaa.

Yibbattidi kayyottiyoogee hageeta gujjana danddayees: Dogiyoogaanne xiskkuwaa xayiyoogaa, keehippe xalaliyoogaa, qoppennan amalee laamettiyoogaa, akeekaanne qofaa xayiyoogaa, qoppennan yeekkiyoogaa, qumaa miyo koshay dummattiyoogaappe denddidaagan laafiyoogaa woy orddiyoogaa, payyatettay paccoogaa bessiya dumma dumma malaatata, akataa xayiyoogaa, oosuwan laafatettaa bessiyoogaa, hayqqida asa elunchchan—qoppiyoogaa, beꞌiyoogaa woy siyiyoogaa; hayqqidaagee naꞌa gidikko, gaasoy baynnan aqo laggiyaa ixxiyoogaa.

Minettiyo wodiyaa: Aara aattido ufayssiya wodiya hassayidi azzaniyoogaa; hayqqida uray keehi ufayttido wodiya, haray atto aara miicci kaaꞌido wodiya hassayiyoogaa.

Aayota Kayyoyiya—Boshaanne Uluwan Hayqqida Naꞌaa Yeliyoogaa

Moona hara naati iyyo deꞌiyaaba gidikkone, uluwan deꞌiya naꞌiyo yeliyo wodiya keehippe naagaasu. Ubba yelana wodiyaappekka kase, o “kaassiya, haasayissiyanne ibaa aymottiyo” naꞌa.

Aayeninne yelettibeenna naꞌaa giddon deꞌiya gayttotettay keehi mino. Moona hagaadan yaagausu: “Raaheli Aana taani uluwan wotto maxaafaa phonqqada oliyaaronne tana qammi xiskkuwaappe beegottissiyaaro. Siiquwaaninne kehatettan a tana yimppido, qakkido koyro gallassaa haꞌꞌikka hassayayiis. A qaaxxiyo wode ubban taani hegaa mala ufayssaa ufayttaas. Hagaadan ta o loytta ero gishshau, a sahettonne harggo wodiyakka shaakka eraas.”

Moona ba taarikiyaa kaallada yaagausu: “Haakimee aynne maaddana danddayenna wode gakkanaassi tana ammanibeenna. Taani azzanenna mala odiis. A hayqqidoogaa eridoogau aynne sirabeykke. Qoppennan iita hanotan aadhdha wodhdhaasu. Wonttetta gallassi hayqaagaasu.”

Hagaa mala hanotay Mooni xalaalan gakkidaba gidenna. Fridmaanonne Graadisteno geetettiya xaafeti Surviving Pregnancy Loss giya maxaafan, Amerkka biitta xallan issi miiloone gidiya maccaasay boshettiyoogaa qonccisidosona. Saꞌa yuushuwan deꞌiya qooday keehi daro gidiyoogee qoncce.

Issi maccaasiya boshettiyo wode woy uluwan hayqqida naꞌaa yeliyo wode, keehippe azzaniyoogaa—geella ba deꞌo laytta ubban azzaniyoogaa daro asay erenna. Leemisuwau, ha wodiyan cimida Beeronikka, boshettido wodeta, ubba qassi uddufun agginaa paxa deꞌada, wurssettan hayqqa yelettayida 6 kilo giraame gidida naꞌiyo hassayausu. Naaꞌꞌu saaminttaa muumiya hayqqida naꞌiyo uluwan tookkaasu. “Hayqqida naꞌa yeliyoogee issi aayessi keehippe azzanttiyaabaa” yaagaasu.

Hagaa mala aayotu azzanuwaa, haray aatto hara maccaasaykka darotoo akeekenna. Ba naꞌay boshan hayqqido maccaasiya hagaadan xaafaasu: “Hagaa mala hanotay tanan gakkanaappe kase ta laggeti ay mala tuggaa aattidaakko aynne ta erennaagaa tanan gakkida waayiyaappe tammaraas. Kase taani haraatu tuggaa erennaagaadan haꞌꞌi haraatikka ta tuggaa erennaba malatees.”

Kayyottiya aayeessi hara metoy qassi, iigaa keena i azinay azzanenna giyo qofaa. Issi keettayiyaa hagaadan yaagaasu: “He wode ta keettaawaa hanotan keehi yiillotaas. Taani shaaharidobanne assi milatibeenna. Ta ay keena azzanidaakko erana danddayibeenna. I keehippe azzanidoy ta hirggaassappe attin, ta kayyuwaassa gidenna.”

Hagaa mala hanotay issi azinaappe naagettiyaaba; shaahara gidida maccaasiya uluwan deꞌiya naꞌaara iyyo deꞌiya gayttotettay ay malakko banan beꞌibeenna. Gidikkokka, ikka hayqqidaagau azzanees. Dumma dumma hanotana gidikkokka, azinaynne machchiyaa metoy naaꞌꞌaa bollikka gakkidaba gidiyoogaa akeekiyoogee koshshiyaaba. Naaꞌꞌaykka waani kayyottiyaakko issoy issuwau yootana koshshees. Azinay qoncciyan kayyottana xaykko, machchiyaa qarettenna asadan xeellana danddayausu. Afuxxiyoogan, qoppiyooganinne qoommettiyoogan minettite. Ubba wodiyaappekka haꞌꞌi issoy issuwaassi koshshiyoogaa bessite. Ee, azinatoo qarettiyoogaa bessite.

Qoppennan Gakkiya Yiira Naꞌa Hayquwaa—Hegaa kayyuwaappe Minettiyoogaa

Qoppennan gakkiya yiira naꞌa hayqqoy keehippe azzanttiyaaba. Aykko baynna payya milatiya naꞌay, issi gallassi zinꞌꞌidosaappe denddennan attees. Hagee hanees giidi mule naagiyooba gidenna; yelidaageeti deꞌishin yiira naꞌay hayqqees giidi ooni qoppii? Aayessi zawi baynna siiquwau kane gidida naꞌay qoppennan a zawi baynna kayyuwaa kayyottanau gaaso gidees.

Banttana keehippe mooranchcha oottiyoogaa doommoosona. Yelidaageeti oottennan aggidobay deꞌiyaabadan, naꞌaa hayquwau gaaso gididabadan qoppoosona. Bantta huuphiya hagaadan oychchoosona, ‘Naꞌay hayqqennaadan ay oottana danddayishin attidee?’b Issi issi hanotan azinay maccaasiyo gaasoy baynnan coo qoppennan bala oottidabadan xeellana danddayees. I oosuwau kiyidi biyo wode, naꞌay saronne payya. Soo i simmiyo wode, hayqqidi ba hiixan zinꞌꞌiis! A machchiyaa ay oottayida takkadee? He wode a awan deꞌay? Azinaynne machchiya bantta giddon unꞌꞌissiyaabi merettennaadan, ha shemppissenna oyshatuyyo zaaruwaa demmanaunne sirissiya qofata xayssana koshshees.

Kayyottanau gaaso gididabati, kasetidi erettibeennabatanne erettanau danddayettennabata. Geeshsha Maxaafay: “Taani saloppe garssaara harabaakka be7aas; hegeekka, eesotiya wottanchchati ubba wode xoonokkona; woikko mino olanchchatikka ubba wode olan xoonokkona; woikko aadhdhida eranchchati ubba wode qumaa demmokkona; woikko cinccati ubba wode duretokkona; woikko tammarida asati ubba wode sabettokkona; shin ubbaikka qaadainne [qoppennan gayttiyaabaynne NW] wodee oottoogaadan hanees” yaagees.—Eranchchaa 9:11.

Issi keettaa asaassi naꞌi hayqqiyo wode haraati waati maaddana danddayiyoonaa? Naꞌaa hayquwan kayyottida issi aayyiya hagaadan zaaraasu: “Issi laggiya yaada, ta aynne geennan, keettaa ubbaa pittaasu. Haraati nuussi qumaa kattidosona. Issoti issoti qassi ayba qaalanne haasayennan qoommidi minttettidosona. Taani kayyoyidaba denttada haasayana koyabeykke. Hanidabaa zaara zaara denttada haasayana koyabeykke. Ta mooridobay deꞌiyaaba milatana gakkanaashin, bessenna oyshaa oyshettana koyabeykke. Taani naꞌaassi aayo; tau danddayettiyaabaa gidin, ta naꞌaa ashanau aybanne oottennan aggikke.”

b Qoppennan Gakkiya Yiira Naatu Hayquwaa (SIDS) yaagiyoogee, darotoo issi agginaappe biidi usuppun aggina naatun gakkiya, payya milatiya naati gaasoy erettennan coo hayqqiyo hanotassi imettida sunttaa. Issi issi hanotan naꞌaa gufantti zinꞌꞌissiyoogaappe bonggoyidi woykko miyyiyan zinꞌꞌissikko ha metoy gakkenna geetettees. Gidikkokka, SIDS gakkiyo oge ubbaa teqqiya zinꞌꞌissiyo ogee baawa.