Yihoowa Markkati Timirttiyaa Xeelliyo Ogiyaa
Yelidaageetu ubbaagaadan, Yihoowa Markkati bantta naata xeelliyaagan sinttanaabaa qoppoosona. Yaatiyo gishshau, eti timirttiyaa xoqqu oottidi xeelloosona. “Timirttee asay deretettan goꞌꞌiyaagaa gidanaadan maaddana koshshees. Qassi bantta wogaa loyttidi eranaadaaninne keehippe ufayssiya deꞌuwaa deꞌanaadan maaddana koshshees.”
HA QOFY ekettidoy The World Book Encyclopedia geetettiya maxaafaappe gidishin, iqonccissiyoogaadan, naata tamaarissiyo waanna halchotuppe issoy, sinttappe aqo oyqqiyo wode so asau koshshiyaabaa kunttana danddayissiyoogaa gujjiya, galla galla deꞌuwau loohissiyoogaa. Hegee boncho aawatetta gidiyoogaa Yihoowa Markkati ammanoosona. Geeshsha Maxaafay ba huuphe: “SHin baageetuyyo qassi ubbaappe aattidi, ba so asaayyo qoppenna urai oonanne gidikko, he aawi ba ammanuwaa kaddidaagaa. Ammanenna asaappekka aadhdhida iitaa” yaagees. (1 Ximootiyoosa 5:8) Tamaariyo layttati naati bantta deꞌuwan aawatettaa kiyanau giigettanaadan oottoosona. Yaatiyo gishshau, timirttiyaa xoqqu oottidi xeellana koshshiyoobadan Yihoowa Markkatussi siyettees.
“Timirttee asay deretettan goꞌꞌiyaagaa gidanaadan maaddana koshshees. Qassi bantta wogaa loyttidi eranaadaaninne ufayssiya deꞌuwaa deꞌanaadan maaddana koshshees.”—The World Book Encyclopedia
Yihoowa Markkati Geeshsha Maxaafan deꞌiya: “Intte oottiyo ooso ubbaa asau gidennan Godau oottiyoogaadan, wozanappe oottite” yaagiya azazuwaadan deꞌanau baaxetoosona. (Qolasiyaasa 3:23) Hegee timirtte keettaa gujjin, deꞌo macara ubban oosuwan peꞌiya baaso siraata. Hegaa gishshau, Yihoowa Markkati bantta naati loytti xannaꞌanaadaaninne timirtte keettan imettiya oosuwaa minttidi oottanaadan minttettoosona.
“Intte oottiyo ooso ubbaa asau gidennan Godau oottiyoogaadan, wozanappe oottite.”—Qolasiyaasa 3:23
Geeshsha Maxaafay issi uri ba deꞌiyo biittaa higgiyau haarettanaadankka tamaarissees. Yaatiyo gishshau, aappun laytta gakkanau tamaarana koshshiyaakko higgee azaziyo wode Yihoowa Markkati naagoosona.—Roome 13:1-7.
Wodiyaa aattiyo bessiyaabati, yettay, wode demmiyoode oottanau dosiyoobati, bollaa minttanau oottiyoobati, laybireeriyaa woykko muuzeemiyaa beꞌanau biyoogeenne hegaa malabati bessiya timirttiyau koshshiyaabata
Galla galla deꞌuwau loohana koshshiyoogaa xaasayana xayikkonne, Geeshsha Maxaafay timirttiyaa hoollee hegaa xalla geenna; woykko hegee waanna hoolle geenna. Muruta timirttee naati bantta deꞌuwan ufayttanaadan denttettanaunne issippetettaa duussan woppu giidaageeta gidanaadankka maaddana koshshees. Yaatiyo gishshau, Yihoowa Markkati kifiliyan tamaariyooban gujettennabata akeekan dooriyoogee keehippe koshshiyoogaa eroosona. Wodiyaa aattiyo bessiyaabati, yettay, wode demmiyoode oottanau dosiyoobati, bollaa minttanau oottiyoobati, laybireeriyaa woykko muuzeemiyaa beꞌanau biyoogeenne hegaa malabati bessiya timirttiyau koshshiyaabata gidiyoogaa eti ammanoosona. Gujjidikka, bantta naati cimaa bonchanaadaaninne etassi goꞌꞌiyaabaa oottanau injjiyaa koyanaadan eti tamaarissoosona.
Gujo Timirttiyaabaa Woygana Danddayiyoo?
Ooratta tekinolojiyaa gaasuwan oosuwaa demmiyo injjee ubbatoo laamettiiddi deꞌees. Hegaappe denddidaagan, daro yelaga naati loohibeenna oosuwaa oottiyo hanotay merettana danddayees. Yaatiyo gishshau, eta oosuwaa meezeenne eti loohidobay, ubba qassi laamettiya hanotaa meezetiyo abbiyaa demmiyoogee eta keehippe maaddiyaaba. Hegaa gishshau, Awurooppan asay wotti yeggidi eraa koshshaa doommido wodiyaa (Renaissance) xaafee Montaynyee, ‘eray kumido guuggiyaappe eraa goꞌettanau loohida guuggee keha’ giidoogaa mala eray deꞌin, tamaareti gastta asa gidiyoogee keha.
Dure biittatanne hiyyeesa biittata bochiya oosuwaa xayoy, oosuwau koshshiyaagaa keenaa loohibeenna yelagata darotoo hirggissees. Yaatiyo gishshau, higgee azaziyoogaappe aadhiya loohissoy oosuwau koshshiyaaba gidikko, gujo timirttiyaa goꞌꞌaanne hegau giidi yarshshiyoobaa yiggi xeellidi kuuyanaadan yelidaageeti bantta naata kaalettana bessees.
Gidikkokka, injje deꞌuwaa deꞌiyoogee aquwaaban duretiyoogaappe aadhiyaaba gujjiyoogaa maayennan aggekketa. Bantta deꞌuwan oosuwau bichaariya asati mata wodiyan bantta oosuwaappe yedetettiyo wode, bantta deꞌuwan halchoy baynnaageeta gididosona. Issi issi yelidaageeti bantta wodiyaa oosuwan wurssiyo gishshau, bantta so deꞌuwau goꞌettiyo wodiyaanne bantta naati wozannaamanaadan maaddanau etaara aattana danddayiyo wodiyaa coo xayssoosona.
Nuuni tumuppe ufayttiyaageeta gidanaadan danddayissiya, bessiya timirttee aquwaa duretettaappe aadhiyaaba gujjana koshshiyoogee qoncce. Yesuusi: “Xoossaa maxaafai, ‘Asi Xoossai haasayiyo qaala ubban de7anaappe attin, oitta xalaalan de7enna’ yaagees” yaagiis. (Maatiyoosa 4:4) Kiristtaane gidiyoogaadan, Yihoowa Markkati kandduwaa maaratanne ayyaanaabaa eeshshata dichiyoogeenne aquwaaban koshshiyaabaa kunttanau giigettiyoogee keehippe koshshiyoogaa akeekoosona.