Xoossaa Dabboti Gannatiyan Deꞌana

Gannatee haꞌꞌi nu deꞌiyo alamiyaa mala gidenna. Xoossay saꞌay metuwan, kayyuwan, sahuwaaninne tuggan kumana mala mule koyibeenna. Sinttappe Xoossay saꞌaa gannate oottana. Gannatee ay malataneeshsha? Geeshsha Maxaafay giyoobaa ane beꞌoos:

Loꞌꞌo asaa. Gannatee Xoossaa dabboti deꞌiyo soho gidana. Eti issoy issuwaassi loꞌꞌobaa oottana. Eti Xoossaa xillotetta ogiyaadan deꞌana.—Leemiso 2:21.

Kumi palahiya kattaa. Gannatiyan namisi deꞌenna. Geeshsha Maxaafay: ‘Biittan daro kattay mokkana’ yaagees.—Mazamure 72:16.

Injje keettaanne ufayssiya oosuwaa. Gannate biittan, ubba keettaa asaassi eta keettay deꞌana. Ubba asay ba oottiyo oosuwan tumu ufayssaa demmiyaagaa gidana.—Isiyaasa 65:21-23.

Saꞌa yuusho sarotettaa. Olettiya asinne olan hayqqiya asi deꞌenna. Xoossaa Qaalay: “[Xoossay] sa7aa gaxaa gakkanaassi de7iya olaa teqqees” yaagees.—Mazamure 46:8, 9.

Loꞌꞌo payyatettaa. Geeshsha Maxaafay: “[Gannatiyan] deꞌiya ooninne ‘Taani harggayiis’ yaagenna” yaagidi hidootaa immees. (Isiyaasa 33:24) Qassi, ooninne wobbenna, qooqenna, tullennanne duudenna.—Isiyaasa 35:5, 6.

Sahoy, kayyoyinne hayqoy xayana. Xoossaa Qaalay: “Haiqoinne kayyoi woi waasoinne sahoi de7enna. Aissi giikko, ceegabai xayiis” yaagees.—Ajjuutaa 21:4.

Iita asay mule xayana. Yihooway “Iitati biittaappe xoqollettana; ammanettennageetikka shodettidi xayana” yaagidi qaalaa geliis.—Leemiso 2:22.

Asay issoy issuwaara siiqettananne bonchchettana. Pirddaa pacay, huqqunnay, yaarettiyoogeenne ixoy deꞌenna. Asay Xoossaa xillotetta ogiyaara moggottidi issippetettan deꞌana.—Isiyaasa 26:9.