Yelagatoo —Intte Deꞌuwan Ay Oottanau Qoppidetii?
I SSI yelaga naꞌiyaa, “Taani keehippe ufayssiya deꞌuwaa deꞌanau koyays” yaagaasu. Neenikka hegaa mala deꞌuwaa deꞌanau koyiyoogee erettidaagaa. SHin “keehippe ufayssiya” deꞌuwaa waana deꞌana danddayay? Hegaa mala deꞌoy, daro miishshaa demmiyoogaaninne dureyiya oosuwaa oottiyoogan, giishin hanidi hannanniyoogan beettees giidi, eradooneenne TV prograameti, qassi gaazeexatinne maxeeteti, hegaadankka ne laggetinne ubba nena tamaarissiyaageetikka yootana danddayoosona.
SHin Geeshsha Maxaafay, aquwan mannannanau daafuriyoogee “carkkuwaa oiqqanau yedettiyoogaa mala” gidiyoogaa yootiyoogan yelagata zorees. (Eranchchaa 4:4) Hegau issi gaasoy, duretanaunne hayttatanau danddayiya yelagati guutta gidiyo gishshataassa. Hegaa demmidaageetikka darotoo keehippe qohettidosona. Keehippe xoqqa timirttiyaa tamaarida Ingglize biittan deꞌiya issi yelagay, “Aquwan duretiyoogee, dooyidi xeelliyo wode a giddon aybinne baynna mela saaxiniyaa mala” yaagiis. Oosoy issi issitoo dureyanaunne bonchettanaadan oottanau danddayiyoogee tuma. SHin neeyyo “ayyaanaaban koshshiyaabaa” kunttanau danddayenna. (Maatiyoosa 5:3, NW) Hegaa bolli qassi, 1 Yohaannisa 2:17y ‘ha saꞌay aadhana’ yaagidi zorees. Neeni ha alamiyan hanada hannannikkokka, hegee gamꞌꞌiyaaba gidenna.
Eranchchaa 12:1y, “Ne yelagatettaa laittan nena Medhdhidaagaa qoppa” yaagidi yelagata zoriyoy hegaassa. Ee, ne deꞌuwan neeni oottana danddayiyo aybippenne aadhiyaabi, Xoossaa Yihoowayyo oottiyoogaa. SHin kasetada, Xoossaassi oottanau neeni koshshiya gidaa kunttana bessees. Xoossau oottiyaagaa waana gidana danddayay? Xoossau oottiyoogee ay ay gujjii?
Yihoowa Markka Gidanau Gidaa Kunttiyoogaa
Koyro, Xoossau oottiyo koshshaa neeni dichana bessees; nena yelidaageeti Kiristtaane gidikkokka, he koshshay coo beettenna. Neeni Yihoowaara buzo dabbotaa medhana bessees. Issi yelaga naꞌiyaa, “Yihoowaara buzo dabbotaa medhanau woosay maaddees” yaagaasu.—Mazamure 62:8; Yaaqooba 4:8.
Roome 12:2y neeni ekkana bessiyo hara tangguwaa qonccissees. “Xoossai koyiyoobi, lo77obi, a ufaissiyaabinne qassi kumettabi aibakko” erana mala yootees. Neeni tamaaridobaappe siriyoobi deꞌii? Hegaadaana gidikko, Geeshsha Maxaafaa zoriyaa kaallada, neeni tamaaridobati tuma gidiyoogaa ne huuphe pilggada ‘era’! Geeshsha Maxaafaanne Geeshsha Maxaafan baasettida xuufeta nabbaba. Gidikkokka, Xoossaabaa tamaariyoogee guugge eraa demmiyoogaa xalla gidenna. Neeni nabbabidobaa wotta denttada qoppanau wodiyaa imma; hegaadan oottiyoogee wozanan wottanau maaddees. Hegee neeni Xoossaa siiqiyoogan dichaa bessanaadan denttettees.—Mazamure 1:2, 3.
Naaꞌꞌanttoy, neeni tamaaraydda deꞌiyoobaa demmido injjiyan haratuyyo, issippe tamaariyaageetuyyokka gidin yootanau mala. Sooppe soo biidi sabbakiyoogee hegaappe kaallada neeni ekkana tanggo. Neeni sabbakiyo wode issi issitoo nenaara issippe tamaariya naati gayttana danddayoosona; koyro heeran hegee nena yashshana danddayees. SHin Geeshsha Maxaafay nuuni ‘wonggeliyaa mishiraachuwan yeellatenna’ mala minttettees. (Roome 1:16) Deꞌuwaanne hidootaa demmanaadan oottiya kiitaa gattaydda deꞌaasa! Hegan yeellatiyo gaasoy aybee?
Nena yelidaageeti Kiristtaane gidikko, neeni etaara he oosuwan shaahettennan aggakka. SHin neeni etaara sooppe soo baada aynne qaattennan simmiyoogaappe woy maxeetetanne tiraktteta immiyoogaappe aadhiyaabaa oottana danddayay? Sooppe soo baada ne huuphe yootanaunne demmido asa Geeshsha Maxaafaa goꞌettada tamaarissanau danddayay? Danddayennaba gidikko, nena yelidaageetuppe woykko gubaaꞌiyan deꞌiya ayyaanaaban gastta urappe maaduwaa demma. Xammaqettennan mishiraachuwaa aassiyaagaa gidanaayyo koyettiyaabaa kunttanau halcha!
Wurssettan, ne huuphiyaa geppana koyaasa; hegaa giyoogee, he wodiyaappe doommada Xoossaayyo oottanau qaalaa gelaasa giyoogaa. (Roome 12:1) SHin ne huuphiyaa geppiyoogee ne xallay erin attiyaaba gidenna. Ubbaykka atotettaa demmanau asau ‘markkattana’ mala Xoossay koyees. (Roome 10:10) Xammaqettiyo wode, neeni kasetada ne ammanuwaa qaalan qonccissaasa. Hegaappe haattan xammaqettaasa. (Maatiyoosa 28:19, 20) Xinqqatee gita tanggo gidiyoogee erettidaagaa. Gidikkokka, taappe koyettiyaabaa oottennan agganaakkonne gaada guyye gooppa. Wolqqaa immanaadan Xoossan ammanettiyaaba gidikko, i neeni minnada eqqanaadan maaddiya, ‘ubbaappe aadhiya wolqqaa’ immana.—2 Qoronttoosa 4:7; 1 PHeexiroosa 5:10.
Neeni xammaqettiyo wode, Yihoowa Markkatuppe issuwaa gidaasa. (Isiyaasa 43:10) Hegee, neeni ne deꞌuwaa goꞌettiyo ogiyan gita laamiyaa oottanaadan denttettana koshshees. Ne huuphiyaa geppiyoogee ‘nena yegga bayiyoogaa’ gujjees. (Maatiyoosa 16:24) ‘Kawotettaa kaseyanau’ gaada, neeni issi issi halchidobatanne demmanau amottiyoobata agga bayanau danddayaasa. (Maatiyoosa 6:33) Ne huuphiyaa geppiyoogeenne xammaqettiyoogee hegaadan oottiyo daro injjiyaa medhees. Hegeetuppe amaridaageeta kaallidi beꞌoos.
Xoossaayyo Kumetta Wodiyan Oottiyo Injjeta
● Aqinyetettay he injjetuppe issuwaa. Aqinye gididi aassiya uri, haratussi leemiso gidiya xammaqettida ura gidishin, aginaa giddon guuxxiis giishin 70u saatiyaa mishiraachuwaa sabbakanau ba hanotaa giigissidaagaa. Haggaazuwan daro saatiyaa aattiyoogee sabbakiyoogaaninne tamaarissiyoogan neeni qarattanaadan maaddees. Daro aqinyeti, bantta xinaateti xammaqettida Yihoowa Markkata gidanaadan maaddiyoogan ufayssaa demmoosona. Hegaa mala ufayssaa demissana danddayiya hara ay oosoy deꞌii?
Daro aqinyeti bantta deꞌuwaassi koshshiyaabaa demmanau, guutta saate oosuwaa oottoosona. Daroti hegaa kaseti qoppidi, timirtte keettan woykko banttana yelidaageetuppe kushe hiillaa tamaaroosona. Neeni naaꞌꞌantto xekka timirttiyaa wurssidoogaappe guyyiyan, hara gujo korssiyaa tamaariyoogee loꞌꞌo gidiyoogaa neeninne nena yelidaageeti qoppiyaaba gidikko, ne koshshay daro miishshaa demmanaassa gidennan, haggaazaydda ne huuphiyaa kaafanaunne geella kumetta wodiyaa haggaaziyaagaa gidada oottanaassa gidiyoogaa dogoppa.
Gidikkokka, issi aqinyee waannayidi xeelliyoy ba oottiyo oosuwaa gidennan, ba haggaazuwaa. Hegee harati deꞌuwaa demmanaadan oottiya ooso! Aqinye gidanau ayssi halchikkii? Aqinyetettay darotoo hara maataassi injjiyaa medhees. Leemisuwau, issi issi aqinyeti Kawotettaa aassiyaageeti keehippe koshshiyo heeri maaddanau boosona. Harati kare biittaa qaalaa tamaaridi, bantta biittan deꞌiya hara qaalaa haasayiya asay deꞌiyo gubaaꞌiyan woykko ubba hara biitti biidi oottoosona. Ee, aqinyetettay gita anjjuwaa demmiyo deꞌo oge!
● Kawotettaa Mishiraachuwaa Yootiyaageetu Timirtte Keettay he injjetuppe issuwaa. Naaꞌꞌu aginawu giigida ha timirttee gooba aqinyeti bantta heeraappe harasan Kawotettaabaa yootiyaageeti keehi koshshiyo sohuwan haggaazanaadan loohissiyo timirtte. Hegee eti saꞌꞌan ooppenne aaruwan Yihoowawu oottida Yesuus Kiristtoosa leemisuwaa kaallidi, “Hekko, tana kiitta” yaagoosona giyoogaa mala. (Isiyaasa 6:8; Yohaannisa 7:29) Diccido heeraappe haahosaa biidi haggaazanawu, kaseegaa keena injjetenna deꞌꞌuwaa deꞌanawu eeno gaana koshshennan aggenna. He heeraa wogay, carkkuwaa hanotaynne qumay kase meezetoogaappe keehi dumma gidana danddayees. Qassi ooratta qaalaa tamaarana koshshennan aggenna. Ha timirtte keettay machibeenna ishatinne gelibeenna michoti, qassi aqo oyqqida Kiristtaaneti hegaa mala sohuwan haggaaziyoogan Yihoowa dirijjitiyan darobaa oottanawu maaddiya eeshshay deꞌiyoogeeta gidanaadan maaddees; eta layttay 23ppe 65 gakkanaassi gidana bessees.
● Beeteele Oosoy Yihoowa Markkatu macara biirotuppe issuwan dosan oottiyo ooso. Beeteele keetta asa gididi oottiyaageetuppe issoti issoti Geeshsha Maxaafan baasettida xuufeta attamiyo oosuwan shaahettoosona. Harati he oosuwaa kaafiyaabaa, giishin keettaanne oosuwau goꞌettiyo miishshata loyttoosona; woykko Beeteele keettaa asau koshshiyaabaa oottoosona. Ha ubba oosoy Yihoowaassi oottiyo geeshsha ooso. Hegaa bolli, Beeteelen deꞌiyaageeti bantta oottiyoobay ayba gidikkokka, hegee alame yuushuwan deꞌiya daro ishatanne michota goꞌꞌiyaaba gidiyoogaa eriyo gishshau ufaytoosona.
Issi issitoo dumma eray deꞌiyo ishati Beeteele oosuwau shoobettoosona. Gidikkokka, daroti Beeteele gelidi loohoosona. Beeteelen deꞌiyaageeti oottiyoy aquwaa demmanaassa gidenna; eti banttayyo giigiya quman, deꞌiyo keettaaninne issi issibau goꞌettanaayyo imettiya guutta miishshan ufayttidi deꞌoosona. Beeteele keettaa asa gidida issi yelagay ba oosuwaa xeelliyaagan kaallidi deꞌiyaagaa giis: “Keehippe ufayssees! Oosuwaa prograamee deexxiyaaba gidikkokka, hagan oottiyoogan taani daro anjjuwaa demmaas.”
● Keexxiyo oosoy issi uri macara biirotanne Kawotettaa Addaraashata keexxiyoogaa maaddanaadan oottees. Keexxiyo oosuwaa oottiyaageeta giyoogeeti he oosuwan maaddoosona. Hagee geeshsha oosotuppe issuwaa gidishin, Solomona beeta maqidasiyaa keexxidaageetu oosuwaara issi mala. (1 Kawotu 8:13-18) Keexxiyo oosuwaa oottiyaageetussi koshshiyaabawu giigida giigissoy, Beeteele keettaa asaassi giigidaagaara issi mala. Ha ishatinne michoti Yihoowaassi sabaa ehiya oosuwan shaahettiyo gita maataa demmidosona!
Kumetta SHemppuwaappe Yihoowayyo Ootta
Neeni deꞌuwaa goꞌettana oge ubbaappe aadhiya loꞌꞌo ogee, Yihoowayyo oottiyoogaa. Halchada kumetta wodiyan Xoossaayyo oottanau ayssi qoppikkii? Kumetta wodiyan Xoossaayyo oottiyoogaa xeelliyaagan, nena yelidaageetuura, gubaaꞌiyaa cimatuuranne woradaa bollaara geeddiyaagaara tobba. Beeteele gelanau woykko Kawotettaa Mishiraachuwaa Yootiyaageetu Timirtte Keettan loohanau koyikko, heezzu gallassa gita shiiquwaa wodetun mazggabettanau koyiyaageetussi giigida shiiquwan beettana danddayaasa.
Ubba asay he gidaa kunttanau woy kumetta wodiyaa oottanau danddayennaagee qoncce. Issi issitoo payyatettaa hanotay, miishshaa hanotaynne so asaa aawatettaa kiyiyoogee oottana danddayiyooban zawaa medhees. Gidikkokka, bantta huuphiyaa geppida Kiristtaaneti ubbay kaallidi deꞌiya Geeshsha Maxaafaa azazuwaa kaallana bessees: “Neeni Godaa ne Xoossaa ne kumetta wozanaappe, ne kumetta shemppuwaappe, ne kumetta qofaappe siiqa.” (Maatiyoosa 22:37) Ne hanotay paqqadiyo, danddayettiya ubbabaa oottanaadan Yihooway koyees. Ne hanotay ay gidikkokka, Yihoowayyo oottiyoogaa ne deꞌuwan waannaba ootta. Xoossaayyo oottiyo oosuwan shocana danddayiyo hoolliyaa kessa. Ee, “ne yelagatettaa laittan nena Medhdhidaagaa qoppa”—yaatikko, neeni merinau anjjettana!