SHEMPPUWAA HEEZZA
Xoossay Saꞌau Halchchidoy Aybee?
Xoossay asaa naatussi halchchidoy aybee?
Xoossaa maataa bolli ayba oyshay denddidee?
Sinttappe saꞌan deꞌoy ay mala gidanee?
1. Xoossay saꞌau halchchidoy aybee?
XOOSSAY saꞌau halchchidobay tumuppe maalaalissiyaaba. Yihooway, saꞌay payyanne ufayttiya asan kumana mala koyees. Geeshsha Maxaafay, “Xoossai . . . Edene giyoosan gannatiyaa kase tokkiis;” qassi i “xeellanau lo77iya, maanaukka mal77iya ubba qommo mittaa . . . mokissiis” yaagees. Xoossay koyro bitaniyaanne a maccaasiyo, Addaamanne Hewaano medhdhi simmidi, eta he loꞌꞌiya sohuwan wottidi: “Yelettite; corattite; ha sa7aa kumitenne haarite” yaagiis. (Doomettaabaa 1:28; 2:8, 9, 15) Yaatiyo gishshau, Xoossaa halchchoy asay naata yelanaadaana, gannatiyaa aassidi saꞌaa ubbaa gattanaadaananne mehiyaanne doꞌaa haaranaadaana.
2. (a) Xoossay saꞌau halchchidobay polettanaagaa aybin eriyoo? (b) Geeshsha Maxaafay, merinau deꞌanay ay mala asa gidiyoogaa yootii?
2 Xoossaa Yihooway, asaa gannate saꞌan wottanau halchchido halchchoy polettanaba neeyyo milatii? Xoossay: “Taani giidoogaa taani . . . oottana” yaagiis. (Isiyaasa 46:9-11; 55:11) Ee, Xoossay ba halchchidobaa polanaagee attenna! I ‘biittaa giigissidoogee, asi deꞌanaadaanappe attin, coo medhdhibeennaagaa’ yootees. (Isiyaasa 45:18) Xoossay saꞌan ay mala asay deꞌana mala koyidee? Qassi eti he sohuwan ay keena wodiyaassi deꞌana mala koyidee? Geeshsha Maxaafay hegau zaaruwaa immiiddi: “Xilloti biittaa laattananne yan merinau de7ana” yaagees.—Mazamure 37:29; Ajjuutaa 21:3, 4.
3. Ha wodiyan saꞌan ayba azzanttiya hanotati deꞌiyoonaa? Hegee ayba oyshata denttii?
3 Hagee biron polettibeennaagee qoncce. Asay haꞌꞌi harggeesinne hayqqees; ubba issoy issuwaara waretteesinne issoy issuwaa worees. Issi moorettidabi deꞌees. Gidoppe attin, saꞌay haꞌꞌi nuuni beꞌiyoogaa mala gidanaadan Xoossay halchchibeennaagee tuma. Yaatin aybi merettidee? Xoossaa halchchoy ayssi polettibeennee? Metoy doommidoy saluwaana gidiyo gishshau, asi xaafido ayba taarike maxaafinne hegaa nuuyyo yootana danddayenna.
ISSI MORKKEE DENDDIIS
4, 5. (a) SHooshshan goꞌettidi Hewaano haasayissiday tumuppe oonee? (b) Issi wode ammanettida loꞌꞌo asa gidida uri laamettidi waani kayso gidana danddayii?
4 Geeshsha Maxaafan koyro maxaafay, Edene ataakiltte sohuwan Xoossaara eqettiyoogaa qoncciyan beessida, Xoossaa morkkiyaabaa yootees. I ‘shooshshaa’ geetettiis; shin i tumu shooshsha gidenna. Geeshsha Maxaafan wurssetta maxaafay i ‘xalahe halaqaa [Dabloosa] woikko Seexaanaa giyoogee, . . . sa7a ubbaa balettiyaagaa’ gidiyoogaa qonccissees. I, ‘beni shooshshaakka’ geetettiis. (Doomettaabaa 3:1; Ajjuutaa 12:9) Ha wolqqaama kiitanchchay woykko ayfiyan beettenna ayyaana meretay, issi hiillanchcha uri ba cenggurssay matan deꞌiya asa milatiya ashangguluutiyaappe kiyiyaaba milatissiyoogaadan, shooshshan goꞌettidi Hewaano haasayissiis. Xoossay asaayyo saꞌaa giigissido wode, he ayyaana meretay deꞌiyoogee sirissenna.—Iyyooba 38:4, 7.
5 Gidikkonne, Yihooway medhdhido ubba meretati polo gididaashin, Dabloosa woykko “Seexaanaa” medhdhiday oonee? Qanttan, Xoossaa naata gidida, wolqqaama ayyaana meretatuppe issoy bana Dabloosa oottiis. Hegee waanidi hanana danddayidee? Ha wodiyankka, issi wode ammanettida loꞌꞌo asa gidida uri, laamettidi kayso gidana danddayees. Waanidi hegaadan hanii? He uri issi bala amoy ba wozanan diccanaadan oottana danddayees. I hegaabaa qoppiyoogaa aggennan ixxikko, he bala amoy keehippe wolqqaamana danddayees. Hegaappe injjee beettiyo wode, qoppiiddi takkido ba bala amuwaa polana danddayees.—Yaaqooba 1:13-15.
6. Wolqqaama ayyaana meretanne Xoossaa naꞌa gididaagee waanidi Seexaananne Dabloosa gididee?
6 Seexaanaa Dabloosa xeelliyagan haniday hegaa. Addameenne Hewaana naata yelanaadaaninne saꞌay eta zerettan kumanaadan Xoossay etau yootiyo wode, i siyidaba milatees. (Doomettaabaa 1:27, 28) Seexaanay: ‘Asaa naati ubbay Xoossaayyo goynniyoogaa aggidi taayyo goynnana danddayoosona!’ yaagidi qoppidoogee qoncce. Yaatiyo gishshau, a wozanan bala amoy dicciyoogaa doommiis. Wurssettan, Xoossaa xeelliyaagan worddobaa yootidi Hewaano cimmiis. (Doomettaabaa 3:1-5) Hegaa oottiyoogan i Dabloosa gidiis; hegau birshshettay “Sunttaa Mooriyaagaa” giyoogaa. Hegaadankka i “Seexaanaa” gidiis; hegau birshshettay “Eqettiyaagaa” giyoogaa.
7. (a) Addaameenne Hewaana aybissi hayqqidonaa? (b) Addaame zeretta ubbay cimiyoynne hayqqiyoy aybissee?
7 Seexaanaa Dabloosi worddottiyoogaaninne cimmiyoogan, Addaameenne Hewaana Xoossaassi azazettennaadan oottiis. (Doomettaabaa 2:17; 3:6) Hegaappe denddidaagan, Xoossay eti azazettana xayikko gakkiyaabaa odidoogaadan, wurssettan hayqqidosona. (Doomettaabaa 3:17-19) Addaamee nagaraa oottido wode ayyo polotettay paccido gishshau, a zeretta ubbay appe nagaraa laattiis. (Roome 5:12) Hanotaa, buddeenaa tigiyo bashiyan leemisana danddayettees. Bashiyaa bolli zaꞌoy deꞌikko, an tigido buddeena ubbay waanii? Ubba buddeenaa bollikka zirimoy woykko zaꞌuwaa malaatay merettees. Hegaadankka, ubba asay Addaameppe polotettaa pacaa “zaꞌuwaa” laattiis. Asay ubbay cimiyoyinne hayqqiyoy hegaassa.—Roome 3:23.
8, 9. (a) Seexaanay ayba qoncce gidida mootuwaa denttidee? (b) Xoossay ba bolli makkalidaageeta sohuwaara xayssibeennay aybissee?
8 Addaamanne Hewaano Xoossaa bolli nagaraa oottanaadan kaalettido wode, Seexaanay makkalatettaa kaalettidoogee qoncce. I hegan, Yihooway haariyo hanotaa xeelliyaagan oyshaa denttiis. Seexaanay hegaadan giyo wode, ‘Xoossaa haaroy iita. I worddoteesinne bau haarettiyaageeta loꞌꞌobaa diggees. Xoossay haariyoogee asaayyo koshshenna. Eti loꞌꞌobaanne iitabaa banttau shaakki erana danddayoosona. Qassi eti taassi haarettiyoogee etassi loꞌꞌo’ yaagiyoogaa mala. Hegaa mala cashsha mala mootuwaa Xoossay waatidi shatimmaneeshsha? Issoti issoti Xoossay he wode makkalanchchata worana bessees giidi qoppoosona. SHin hegee Seexaanay denttido oyshaa zaaranee? Hegee Xoossaa haaroy suure gidiyoogaa boxooxissanee?
9 Paci baynna Yihoowa pirdday, makkalanchchata i sohuwaara woranaadan oottenna. I Seexaanaa mootuwaa bessiya ogiyan shatimmanaunne Dabloosi worddanchcha gidiyoogaa boxooxissanau, wodiyaa immana koshshiyoogau qofaa qachchiis. Yaatiyo gishshau Xoossay, asay Seexaanan sugettiiddi guutta wodiyaassi asaa haaranaadan qofaa qachchiis. Yihooway hegaa ayssi oottidaakkonne he denddida yohuwaa giigissanau i ayssi hegaa keena wodiyaa immidaakko, ha maxaafaa SHemppuwaa 11n tobbana. Gidikkonne, haꞌꞌi hagaadan giidi qoppiyoogee bessiyaaba: Addaameenne Hewaana etassi ayba loꞌꞌobanne oottibeenna Seexaanaa ammanidoogee bessiyaabee? Banttau deꞌiya ubbabaa immida Yihoowa, eti meqetti baynna worddanchcha giidi ammanidoogee bessiyaabee? Nena gidiyaakko ay oottuutee?
10. Yihooway Seexaanaa oyshau zaaruwaa immanaadan maaddiyaabaa neeni waatada oottana danddayay?
10 Nuna ubbaa ha wodiyan hegaa mala oyshati xeelliyo gishshau, he oyshata qoppiyoogee loꞌꞌo. Ee, neenikka Yihooway Seexaanaa oyshaayyo zaaruwaa immanaadan maaddiyaabaa oottiyo injjiyaa demmadasa. Yihooway nena haaranaadan doorada, Seexaanay worddanchcha gidiyoogaa bessiyaabaa oottana danddayaasa. (Mazamure 73:28; Leemiso 27:11) Biilooniyan qoodettiya ha saꞌaa asaappe hegaa mala dooruwaa dooridaageeti keehi guuttata gidiyoogee azzanttiyaaba. Hegee, tumuppe Geeshsha Maxaafay ha saꞌaa haariyay Seexaanaa gidiyoogaa tamaarissii? yaagiya issi keehi koshshiya oyshaa denttees.
HA ALAMIYAA HAARIYAY OONEE?
11, 12. (a) Seexaanay Yesuusa paaccido issi paacee, ha saꞌaa haariyay Seexaanaa gidiyoogaa waatidi qonccissii? (b) Ha saꞌaa haariyaagee Seexaanaa gidiyoogaa boxooxissiya harabi aybee?
11 Ha alamiyaa haariyaagee Seexaanaa gidiyoogaa Yesuusi mule siribeenna. Seexaanay issi wode issi maalaalissiya ogiyan, “sa7an de7iya kawotetta ubbaanne eta bonchchuwaa” Yesuusa bessiis. Seexaanay hegaappe guyyiyan, “Neeni taayyo gulbbatada goinnikko, taani hagaa ubbaa neeyyo immana” yaagidi qaalaa geliis. (Maatiyoosa 4:8, 9; Luqaasa 4:5, 6) Ane issibaa qoppa. He kawotettata haariyaagee Seexaanaa gidennaakko, hegee Yesuusa paacciyooba gidana danddayii? Ha saꞌaa kawotettati ubbay Seexaanaaba gidiyoogaa Yesuusi kashi gibeenna. Etayyo wolqqaa immidaagee Seexaanaa gidennaakko, Yesuusi hegaadan gaanaagee tuma.
12 Maalaalissiya yuniverssiyaa Medhdhidaagee, ubbaappe wolqqaama Xoossaa Yihoowa gidiyoogee qoncce. (Ajjuutaa 4:11) Gidikkonne, Geeshsha Maxaafay awaaninne ha alamiyaa haariyay Xoossaa Yihoowa woykko Yesuus Kiristtoosa geenna. Ubba, Yesuusi Seexaanaa qoncciyan, ‘saꞌaa haariyaagaa’ yaagidi xeesiis. (Yohaannisa 12:31; 14:30; 16:11) Geeshsha Maxaafay Seexaanaa Dabloosa, ‘ha saꞌaa Xoossaa’ yaagidikka xeesees. (2 Qoronttoosa 4:3, 4) Kiitettida Kiristtaanee Yohaannisi, ha eqettiyaagaa woykko Seexaanaa xeelliyaagan: ‘Mule saꞌay xalahe halaqan haarettees’ yaagiis.—1 Yohaannisa 5:19.
SEEXAANAA ALAMEE WAANI XAYANAAKKO
13. Ooratta alamee keehi koshshidoy aybissee?
13 Issi layttay aadhdho payduwan, alamee deꞌanau kaseegaappekka haa metiya soho gidi gidi bees. Alamee olettiya wotaaddaratun, ammanettenna polotikaa asatun, iita gididi loꞌꞌo milatiya haymaanootiyaa kaalettiyaageetuuninne danuwaa oottiyoogan zozzidaageetun kumiis. Kumetta alamee giigana danddayennaagaa gidiis. Geeshsha Maxaafay, Xoossay ba olaa Armmageedoonan iita alamiyaa xayssana wodee matattidoogaa bessees. Hegee geeshsha ooratta alamiyau ogiyaa dooyana.—Ajjuutaa 16:14-16.
14. Xoossay Ba Kawotettan Haariyaagaa gidanaadan dooridoy oonee? Hegee hananaappe kase woygettidi odettidee?
14 Xoossaa Yihooway saluwan deꞌiya Ba Kawotettan woykko aysuwan Haariyaagaa gidanaadan dooridoy Yesuus Kiristtoosa. Adussa wodiyaappe kase Geeshsha Maxaafay: “Na7i nuuyyo yelettiis! Attuma na7i nuuyyo imettiis! Kawotettai a hashiyan wodhdhana; a sunttai . . . Sarotettaa Halaqaa” geetettana. A kawotettaa daruwaunne a sarotettau zawai de7enna” yaagidi yootiis. (Isiyaasa 9:6, 7) Yesuusi ha kawotettaa xeelliyaagan bana kaalliyaageetussi: “Ne kawotettai yo; ne shenee saluwan hanidoogaadan, sa7ankka hano” yaagidi woossanaadan tamaarissiis. (Maatiyoosa 6:10) Nuuni takkidi ha maxaafan beꞌanaagaadan, Xoossaa Kawotettay ha alamiyaa kawotettata ubbaa mata wode xayssana; yaatidi i ba huuphe eta ubbaa sohuwaa oyqqana. (Daaneela 2:44) Hegaappe gannate saꞌan, Xoossaa Kawotettay haarana.
OORATTA ALAMEE MATATTIIS!
15. ‘Ooratta saꞌay’ aybee?
15 Geeshsha Maxaafay: “SHin nuuni Xoossai immana giido ooratta saluwaanne ooratta sa7aa xilloi de7anasaa naagoos” yaagidi ammanttiyaabaa yootees. (2 PHeexiroosa 3:13; Isiyaasa 65:17) Issitoo issitoo Geeshsha Maxaafay ‘saꞌaa’ yaagiyoy saꞌaa bolli deꞌiya asaa malaatanaassa. Yaatiyo gishshau, xillotettay deꞌana ‘ooratta saꞌay’ issippetettan deꞌiya, Xoossan nashettiya asaa malaatees.
16. Banan nashettiyaageetussi Xoossay immanau qaalaa gelido alꞌꞌo woytoy aybee? Hegaa demmanau nuuni ay oottana bessii?
16 Yesuusi, Xoossan nashettiya asati mata wode yaana ooratta saꞌan “merinaa de7uwaa” woytuwaa demmanaagau qaalaa geliis. (Marqqoosa 10:30) Hayyanaa ne Geeshsha Maxaafan Yohaannisa 3:16nne 17:3 kessada, merinaa deꞌuwaa demmanau nuuni ay oottana bessiyaakko Yesuusi yootidoogaa nabbaba. Haꞌꞌi mata wode yaana Gannate saꞌan, Xoossaappe he maalaalissiya woytuwaa ekkanau giday deꞌiyoogeeti demmana ufayssiya anjjuwaa Geeshsha Maxaafan xeella.
17, 18. Saꞌan ubbasan sarotettaynne woppatettay deꞌanaagaa waanidi ammanana danddayiyoo?
17 Iitatettay, olay, danoynne kobabay xayana. “Iitaa oottiyaageeti . . . de7okkona; . . . SHin ashkketi biittaa laattana.” (Mazamure 37:10, 11) Xoossay, ‘Sa7aa gaxaa gakkanaassi de7iya olaa teqqiyo’ gishshau sarotettay deꞌana. (Mazamure 46:9; Isiyaasa 2:4) Hegaappe guyyiyan ‘xillotettay daayana; aginay xayana gakkanaassi sarotettay darana’—hegee, sarotettay merinau deꞌana yaagiyoogaa!—Mazamure 72:7.
18 Yihoowassi goynniyaageeti sarotettan woppu giidi deꞌana. Beni wode, Israaꞌeeleti Xoossaassi azazettido wode ubban sarotettan woppu giidi deꞌidosona. (Wogaabaa 25:18, 19) Gannatiyankka hegaadan woppu giidi deꞌanaagee ayba ufayssiyaabee!—Isiyaasa 32:18; Mikkiyaasa 4:4.
19. Xoossay ehiyo ooratta siraatan kattay kumanaagaa aybin eriyoo?
19 Kattay qaxuhatiyoogee attana. Mazamuriyaa yexxiyaagee: “Biittan daro kattai mokko; dereti kattan kamettona” yaagidi yexxiis. (Mazamure 72:16) Xoossaa Yihooway ba geeshsha asata anjjananne ‘biittay kattaa mokkana.’—Mazamure 67:6.
20. Kumetta saꞌay gannate gidanaagaa ammanana danddayiyoy aybissee?
20 Kumetta saꞌay gannate gidana. Kase nagaranchcha asatun moorettida biittan loꞌꞌiya ooratta keettati keexettananne gadeti oosettana. (Isiyaasa 65:21-24; Ajjuutaa 11:18) Wodiyaappe wodiyan, kumetta saꞌay Edene ataakiltte sohuwaadan araddanne loꞌꞌiyaagaa gidana gakkanaashin, murutaa immiya biittay aakki aakki baana. Xoossay ‘ba kushiyaappe yeggidi, paxa de7iyaageeta ubbaa amuwaa aliyoogaa’ mule aggenna.—Mazamure 145:16.
21. Asaanne doꞌaa giddon sarotettay deꞌanaagaa bessiyay aybee?
21 Asaanne doꞌaa giddonkka sarotettay deꞌana. Doꞌaynne mehee issippe heemettana. Ubba guutta naꞌikka ha wodiyan qoho gattiya doꞌatussi he wode yayyenna.—Isiyaasa 11:6-9; 65:25.
22. Sahoy waananee?
22 Sahoy xayana. Yesuusi saluwan deꞌiya Xoossaa Kawotettan Haariyaagaa gidiyoogaadan, i saꞌan deꞌiiddi oottidoogaappe keehi aadhdhiya hanotan harggiyaageeta pattana. (Maatiyoosa 9:35; Marqqoosa 1:40-42; Yohaannisa 5:5-9) Hegaappe guyye “ooninne, ‘Taani harggais’ yaagenna.”—Isiyaasa 33:24; 35:5, 6.
23. Denddoy nu wozanaa ufayssiyaagaa gidanay aybissee?
23 Hayqqida nu siiqoti mule hayqoy baynna hidootay deꞌiyo deꞌuwau denddana. Xoossay hassayiyo, hayquwan xiskkida asati ubbay deꞌuwau denddana. Ubba “worddoikka xilloikka haiquwaappe denddana”.—Oosuwaa 24:15; Yohaannisa 5:28, 29.
24. Gannate saꞌan deꞌanaagan neeyyo aybi siyettii?
24 Nuna Medhdhida Gitaa, Xoossaa Yihoowabaa tamaaranaunne ayyo haggaazanau dooriyaageeta sinttappe ayba ufayssiya wodee naagii! Yesuusi baappe miyyessan kaqettida iitabaa oottida bitaniyaassi: “Neeni tanaara gannatiyan de7ana” yaagidi qaalaa gelido wode, malaatidoy sinttappe saꞌan yaana Gannatiyaa. (Luqaasa 23:43) Ha ubba anjjoy a baggaara polettanau deꞌiyo Yesuusabaa, nuuni gujjidi tamaaranau koshshees.
GEESHSHA MAXAAFAY TAMAARISSIYOOBAA
▪ Xoossay saꞌaa gannate oottanau halchchido halchchoy polettana.—Isiyaasa 45:18; 55:11.
▪ Ha wodiyan alamiyaa haariyaagee Seexaanaa. —Yohaannisa 12:31; 1 Yohaannisa 5:19.
▪ Mata wode yaana ooratta alamiyan, Xoossay asaa daroban anjjana.—Mazamure 37:10, 11, 29.
[Sinttaa 30n diya misiliyaa]
Seexaanay, babaa gidennaakko alamiyaa kawotettata ubbaa waatidi Yesuusassi immana danddayii?