SHemppuwaa Tammanne Hosppuna
Xinqqatiyaanne Xoossaara Ne Medhdhiyo Dabbotaa
Issi uri Kiristtaane gidanau ayba ogiyan xammaqettii?
Neeni xammaqettiyo gidaa kunttanau ayba tangguwaa ekkana bessii?
Issi asi bana Xoossaassi geppiyoy ayba ogiyaanee?
Xammaqettana bessiyo waanna gaasoy aybee?
1. Toophphiyaa biittan suntta gidida issi bitanee xammaqettanau oychchidoy aybissee?
“HAATTAA hagaa be7a; xammaqettiyoogaa tana diggiyai aibee?” Ha oyshaa oychchidaagee koyro xeetu layttan Toophphiyaa biittan suntta gidida issi bitaniyaa. Piliphphoosa geetettiya Kiristtaanee, yaana geetettida Masee Yesuusa gidiyoogaa assi boxooxissidi yootiis. He bitanee Geeshsha Maxaafaappe tamaaridoban wozanappe denttettidi tangguwaa ekkiis. I xammaqettanau koyiyoogaa bessiis!—Oosuwaa 8:26-36.
2. Xinqqatiyaabaa neeni minttada qoppana bessiyoy aybissee?
2 Neeni ha Maxaafan ha shemppuwaappe kasetiya shemppota issi Yihoowa Markkaara loyttada xannaꞌidaba gidikko, ‘xammaqettennaadan tana diggiyay aybee?’ gaada oychchanau giigettidabadan neessi siyettennan aggenna. Neeni haꞌꞌi, Geeshsha Maxaafay Gannatiyan merinau deꞌanaagaa yootiyo hidootaabaa tamaaradasa. (Luqaasa 23:43; Ajjutaa 21:3, 4) Hayqqidaageeti deꞌiyo hanotaabaa tumaanne dendduwaa hidootaabaakka tamaaradasa. (Eranchchaa 9:5; Yohaannisa 5:28, 29) Neeni geella Yihoowa Markkatuura eta shiiquwan beettaydda takkennaaninne eti tumu haymaanootiyaappe koyettiyaabaa waatidi oosuwan bessiiddi deꞌiyaakko beꞌennan aggakka. (Yohaannisa 13:35) Ubbabaappe aadhdhiyaaba gidida, Xoossaa Yihoowaara buzo dabbotaa dichchiyoogaa geella doommennan aggakka.
3. (a) Yesuusi bana kaalliyaageetussi immido azazoy aybee? (b) Haattan xammaqettiyoogee ayba ogiyan polettii?
3 Neeni Xoossaayyo haggaazana koyiyoogaa waatada bessana danddayay? Yesuusi bana kaalliyaageetussi: “Intte biidi, asa ubbaa tana kaalliyaageeta oottite; . . . eta xammaqite” yaagidi yootiis. (Maatiyoosa 28:19) Yesuusi ba huuphe haattan xammaqettidi hegau leemiso gidiis. A bolli haattay caccafettibeenna; qassi guutta haattay ayyo liiphiyan tigettibeenna. (Maatiyoosa 3:16) “Xammaqa” geetettida Giriike qaalau birshshettay “muukka” yaagiyaagaa. Hegaa gishshau, Kiristtaane xinqqate giyoogee muleera haattan muukettiyoogaa.
4. Haattan xammaqettiyoogee ay bessii?
4 Haattan xammaqettiyoogee Xoossaa Yihoowaara dabbotana koyiya ubba asaappe koyettiyaaba. Xinqqatee neeni Xoossaayyo haggaazanau koyiyoogaa asaa sinttan bessiyo oge. Hegee, neeni Yihooway koyiyoogaa oottanau ufayttiyoogaa bessees. (Mazamure 40:7, 8) Gidikkonne, neeni xammaqettiyo gidaa kunttanau, koshshiya tanggota ekkanau bessees.
ERAANNE AMMANUWAA KOSHSHEES
5. (a) Xammaqettiyo gidaa kunttanau ekkana koshshiya koyro tanggoy aybee? (b) Kiristtaane shiiqoti keehi koshshiyaaba gididoy aybissee?
5 Neeni koyro tangguwaa ekkiyoogaa doommadasa. Waatada? Geella Geeshsha Maxaafaa xannaꞌanau giigida hanotaa kaallada Xoossaa Yihoowabaanne Yesuus Kiristtoosabaa eraa demmiyoogaana. (Yohaannisa 17:3) SHin erana bessiya darobi deꞌees. Kiristtaaneti Xoossaa “sheniyaa eriyo eratettaa [“tumu eraa,” NW]” demmanau koyoosona. (Qolasiyaasa 1:9) Yihoowa Markkatu gubaaꞌiyaa shiiqotun shiiqiyoogee hegau keehi maaddiyaaba. Hegaa mala shiiqotun shiiqiyoogee keehi koshshiyaaba. (Ibraawe 10:24, 25) SHiiqotun ubbatoo shiiqiyoogee Xoossaa eriyoogan neeni gujja gujja baanaadan maaddees.
6. Neeni xammaqettiyo gidaa kunttanau Geeshsha Maxaafaa eraa ay keena demmana bessii?
6 Neeni xammaqettiyo gidaa kunttanu Geeshsha Maxaafan deꞌiya ubbabaa erana koshshennaagee qoncce. Toophphiyaa biittan suntta gidida bitanee amaridaba erees; shin Geeshsha Maxaafan deꞌiya harabata akeekanau ayyo maaduwaa koshshiis. (Oosuwaa 8:30, 31) Hegaadan, neenikka tamaaranabi darobi deꞌees. Ubba neeni Xoossaabaa tamaarada wurssakka. (Eranchchaa 3:11) Gidikkonne, neeni xammaqettanaappe kase baa giishin, Geeshsha Maxaafaa baaso timirtteta erada ammananau bessees. (Ibraawe 5:12) Hegaa mala timirtteti, hayqqida asati deꞌiyo tumu hanotaanne Xoossaa sunttaynne a Kawotettay keehi koshshiyoogaa erada ekkiyoogaa gujjoosona.
7. Geeshsha Maxaafaa xannaꞌiyoogee neeni waatanau maaddana bessii?
7 Gidikkonne, “ammanoi bainnan ooninne Xoossaa ufaissanau danddayenna” gishshau, era xallaykka gidenna. (Ibraawe 11:6) Geeshsha Maxaafay, beni wode Qoronttoosa kataman deꞌiya amarida asati Kiristtaaneti sabbakiyo qaalaa siyido wode, “ammanidi xammaqettidosona” yaagees. (Oosuwaa 18:8) Hegaadankka, Geeshsha Maxaafaa xannaꞌiyoogee i Xoossaa Qaala gidiyoogaa neeni ammananaadan oottana bessees. Geeshsha Maxaafaa xannaꞌiyoogee Xoossay qaalaa gelidobatuuninne Yesuusa yarshshoy nena ashshana danddayiyoogaa neeni ammananaadan maaddana bessees.—Yaasa 23:14; Oosuwaa 4:12; 2 Ximootiyoosa 3:16, 17.
GEESHSHA MAXAAFAA TUMAA HARATUSSI YOOTIYOOGAA
8. Neeni tamaaridobaa haratussi yootanaadan ne wozanaa denttettanabay aybee?
8 Ammanoy ne wozanan dicci dicci biyo wode, tamaaridobaa ne xallau oyqqa uttanaagee neeyyo danddayettennaba gidana. (Ermmaasa 20:9) Haratuyyo Xoossaabaanne a halchchuwaabaa yootanau ne wozanay nena keehippe denttettana.—2 Qoronttoosa 4:13.
9, 10. (a) Neeni Geeshsha Maxaafaa tumaa yootiyoogaa ooppe doommanau danddayay? (b) Yihoowa Markkati oottiyo maaraadan etaara issippe sabbakiyoogan shaahettanau koyikko, neeni ay oottana bessii?
9 Geeshsha Maxaafaa tumaa haratussi yootiyoogaa, ne dabbotussi, ne laggetussi, ne shoorotussinne nenaara oottiya asatussi akeekan yootiyoogan doommana danddayaasa. Takkada, Yihoowa Markkati oottiyo maaraadan etaara issippe sabbakuwaa oosuwan shaahettanau koyana danddayaasa. Geeshsha Maxaafaa nena xannaꞌissiya Markkaayyo he wodiyan, ne koshshaa yootanau guyye gooppa. Neeni dere haggaazuwan shaahettanau danddayiyoogee erettiyo wode, gubaaꞌiyaa cimatuppe naaꞌꞌati nena xannaꞌissiyaagaara issippe nena haasayisoosona.
10 Hegan neeni, Xoossaa wudiyaa heemmiya gubaaꞌiyaa cimatuppe amaridaageetuura loyttada erettaasa. (Oosuwaa 20:28; 1 PHeexiroosa 5:2, 3) Ha cimati, neeni Geeshsha Maxaafaa baaso timirtteta eriyoogaanne ammaniyoogaa, Xoossaa baaso siraataara moggada deꞌiyoogaanne Yihoowa Markka gidanau wozanappe koyiyoogaa akeekikko, mishiraachchuwaa xammaqettennan aassiyaagaa gidada dere haggaazuwan shaahettanau gidaa kunttidoogaa neessi yootoosona.
11. Amaridaageeti dere haggaazuwau gidaa kunttanau kasetidi laamettana bessiyoy aybiina gidana danddayii?
11 Hara baggaara, dere haggaazuwau gidaa kunttanau ne deꞌuwaanne kandduwaa maaran amarida laamiyaa oottana koshshiyoogaa he cimati akeekana danddayoosona. Hegee, neeni haratuppe geeman oottiyo amarida oosota aggiyoogaa gujjana danddayees. Yaatiyo gishshau, neeni mishiraachchuwaa xammaqettennan aassiyaagaa gidanaayyo, bessenna asho gaytotettaa, mattottiyoogaa, jallissiya xaliyaa goꞌettiyoogaa milatiya iita nagaraappe haakkanau bessees.—1 Qoronttoosa 6:9, 10; Galaatiyaa 5:19-21.
NAGARAAPPE SIMMIYOOGAANNE LAAMETTIYOOGAA
12. Nagaraappe simmiyoogaa koshshiyoy aybissee?
12 Neeni xammaqettanau gidaa kunttanaassi, hara amarida tanggota ekkanau bessees. Kiitettida PHeexiroosi: “Xoossai intte nagaraa xaissanaadan . . . intte nagaraappe Xoossaakko simmite” yaagiis. (Oosuwaa 3:19, 20) Nagaraappe simmiyoogee, ne oottidoban wozanappe zilꞌꞌettiyoogaa yaagiyoogaa. Issi uri shori baynna kandduwan simerettidaba gidikko, nagaraappe simmana bessiyoogee qoncce; shin issi uri maara kandduwaara simerettidaba gidikkokka, nagaraappe simmiyoogaa koshshees. Aybissi? Asay ubbay Xoossaa atotettay koshshiyo nagaranchcha gidiyo gishshataassa. (Roome 3:23; 5:12) Geeshsha Maxaafaa xannaꞌanaappe kase, Xoossaa shenee aybakko neeni erakka. Xoossaa sheniyaa erabeenna gishshau, a sheniyaara ubbaban moggada deꞌabaakka. Yaatiyo gishshau, nagaraappe simmiyoogaa koshshees.
13. Laamettiyoogaa giyoogee woygiyoogee?
13 Nagaraappe simmoogaappe guyyiyan laamettanau bessees. Oottidoban zilꞌꞌettiyoogaappe aadhdhiyaaba oottana bessees. Ne kase deꞌuwaa maaraa ixxanaunne haꞌꞌippe doommada suurebaa oottanau loyttada qofaa qachchanau koshshees. Nagaraappe simmiyoogeenne laamettiyoogee, neeni xammaqettanaappe kase ekkanau bessiya tanggota.
NE HUUPHIYAA XOOSSAASSI GEPPIYOOGAA
14. Xammaqettanaappe kase neeni ekkana bessiya keehi koshshiya tanggoy awugee?
14 Xammaqettanaappe kase ekkana bessiya keehi koshshiya hara tanggoy dees. Ne huuphiyaa Xoossaa Yihoowayyo geppanau bessees.
15, 16. Ne huuphiyaa Xoossaayyo geppiyoogaa giyoogee woygiyoogee? Hegaa oottanaadan issi ura denttettiyaabay aybee?
15 Neeni wozanappe woossada ne huuphiyaa Xoossaa Yihoowayyo geppiyo wode, merinau a xallau aqanau qaalaa gelaasa. SHin issi uri hegaadan oottanau koyiyoy aybissee? Issi asi issi ekkanau koyido macca naꞌebaa loytti eranau iira giyaaninne hegaa mala sohuwan gayttiyoogaa doommiis giidi qoppoos. I onne iyyo deꞌiya loꞌꞌo eeshshaa loytti eri eri biyo wode, o siiqi siiqi bees. Takkidi o ekkanau oyshaa yeddiyoogee attenna. Machcho ekkiyoogee a bolli aawatetta gujjanaagee tuma. Gidikkonne, iyyo deꞌiya siiqoy hegaa mala keehi koshshiya tangguwaa ekkanaadan a denttettees.
16 Neeni Yihoowa eriyo wodenne a siiqiyo wode, aybanne xibennaaninne au goynniyoogan ayba zawanne wottennan assi oottanau wozanappe denddaasa. Xoossaa Naꞌaa Yesuus Kiristtoosa kaallanau koyiya ooninne, ba huuphiyaa ‘yeggi bayana’ koshshees. (Marqqoosa 8:34) Nuuni nu huuphiyaa yeggi bayiyoy, nu koshshaynne nu halchchoy Xoossaayyo muleera azazettiyoogaa diggennaadan oottiyoogaana. Hegaa gishshau, neeni xammaqettanaappe kase Xoossaa Yihoowa sheniyaa oottiyoogee ne deꞌuwau waanna halchcho gidana bessees.—1 PHeexiroosa 4:2.
MOOROBAA OOTTANA DANDDAYAYS YAAGIYO YASHSHAA XOONI KIYIYOOGAA
17. Amarida asati banttana Xoossaayyo geppanau guyye giyoy aybissa gidanau danddayii?
17 Amarida asati banttana Yihoowassi geppanau guyye giyoy hegaa mala mino tangguwaa ekkanau yayyiyo gishshataassa. Eti bantta huuphiyaa Xoossaassi geppida Kiristtaane gidiyoogan Xoossaa sinttan oyshettennaadan yayyana danddayoosona. Moorobaa oottidi Yihoowa azzanttoos yaagiyo yashshan, ayyo banttana geppennaagee loꞌꞌo giidi qoppoosona.
18. Ne huuphiyaa Xoossaassi geppana mala nena denttettana danddayiyaabay aybee?
18 Neeni Yihoowa siiqiyoogaa tamaaraydda biyo wode, ne huuphiyaa assi geppanaunne hegaara moggottada deꞌanau neeyyo danddayettidaba ubbaa oottanau wozanappe denddaasa. (Eranchchaa 5:4) Ne huuphiyaa Yihoowayyo geppoogaappe guyyiyan, neeni ‘Goday koyiyoogaadan deꞌanaunne, ubba wode a ufayssiyaabaa oottanau’ koyanaagee qoncce. (Qolasiyaasa 1:10) Neeni Xoossaa siiqiyo gishshau, a sheniyaa oottiyoogaa keehi deexxiyaabadan qoppakka. “Nuuni Xoossaa siiqiyoogee a azazuwaa naagiyoogaa; a azazoikka deexo gidenna” yaagida Yesuusi kiittido Yohaannisaara neeni maayanaagau siree baawa.—1 Yohaannisa 5:3.
19. Ne huuphiyaa Xoossaassi geppanau ne yayyana bessennay aybissee?
19 Xoossaassi ne huuphiyaa geppanau neeni polo gidida asa gidana koshshenna. Ne abbiya Yihooway erees; qassi ne danddayiyoobaappe daruwaa neeni oottana mala mule koyenna. (Mazamure 103:14) I neeyyo injjetana mala koyees; qassi nena maaddananne kaafana. (Isiyaasa 41:10) Ne polo wozanan neeni Yihoowan ammanettiyaaba gidikko, “i nena likke ogiyaa kaalettana.”—Leemiso 3:5, 6.
XAMMAQETTIYOOGAN NE GEPPIDOOGAA BESSA
20. Yihoowayyo ba huuphiyaa geppiyoogee hara asaukka qonccidi beettana koshshiyoy aybissee?
20 Nuuni hanno gakkanaashin tobbidobata qoppiyoogee, ne huuphiyaa woosan Yihoowassi geppanaadan nena maaddana danddayees. Xoossaa tumuppe siiqiya ubbay ‘atotettaa demmanau ba doonankka markkattana’ bessees. (Roome 10:10) Neeni hegaadan oottiyoy ayba ogiyaanee?
21, 22. Neeni ne ammanuwaa qoncciyan ‘markkattiyoogaa’ waatada bessana danddayay?
21 Neeni xammaqettana koyiyoogaa, ne gubaaꞌiyan deꞌiya shiishshiya cimaa erissa. I Geeshsha Maxaafaa baaso timirtteta oyqqida unddenna oyshata, amarida cimati nenaara zaarettanaadan giigissuwaa oottees. He cimati neeni gidaa kunttidoogaa maayiyaaba gidikko, kaalliya gita shiiquwan xammaqettana danddayiyoogaa neessi yootoosona.a Hegaa mala wodiyan darotoo, xinqqatee woygiyoogaakko zaarettiyo haasayay shiiqees. Hegaappe simmin, haasayaa shiishshiyaagee xinqqatiyau giigidaageeti bantta ammanuwaa bantta doonan qoncciyan ‘markkattiyoogaa’ bessana mala naaꞌꞌu deexxenna oyshata oychchees.
22 Neeni ne huuphiyaa Xoossaassi geppada Yihoowa Markka gidida asa gidiyoogaa qoncciyan bessiyaabay xinqqatiyaa. Xinqqatiyau giigettidaageeti banttana Yihoowassi geppidoogaa qoncciyan bessanau, muleera haattan muukettoosona.
NE XINAQATTEE MALAATIYOOBAA
23. “Aawaa sunttan, Na7aa sunttaaninne Geeshsha Ayyaanaa sunttan” xammaqettiyoogee woygiyoogee?
23 Yesuusi ba erissiyo ashkkarati “Aawaa sunttan, Na7aa sunttaaninne Geeshsha Ayyaanaa sunttan” xammaqettanaagaa yootiis. (Maatiyoosa 28:19) Hagaa giyo wode, xinqqatiyau giigettida uri Xoossaa Yihoowaunne Yesuus Kiristtoosau deꞌiya haariyo maataa akeekees giyoogaa. (Mazamure 83:18; Maatiyoosa 28:18) Qassi Xoossaa geeshsha ayyaanay woykko a wolqqay ay oottiyaakkokka akeekees.—Galaatiyaa 5:22, 23; 2 PHeexiroosa 1:21.
24, 25. (a) Xinqqatee aybaa malaatii? (b) Zaaro demmanau koshshiya oyshay woygiyaagee?
24 Gidoppe attin, xinqqatee coo meechcha gidenna. I issi keehi koshshiyaabau malaata. Haattaa giddon muukettiyoogee, ne kase deꞌuwau hayqqidoogaa malaatees. Muukettosaappe kiyiyoogee, neeni haꞌꞌi Xoossaa sheniyaa oottanau deꞌuwau denddidoogaa malaatees. Qassi neeni ne huuphiyaa oosossi woy qofassi woy hara asassi woy dirijjitessi gidennan, Xoossaa Yihoowassi geppidoogaa hassaya. Ne geppaynne xinqqatee Xoossaara keehi mata dabbotaa medhdhiyoogau doometta—aara xuuraa shaahettiya dabbo oottees.—Mazamure 25:14.
25 Xinqqatee atotettaa demmiyoogaa tumayiyaaba gidenna. Yesuusi kiittido PHauloosi: “Yashshatettaaninne kokkorssan intte atotettaa polanau oottite” yaagidi xaafiis. (Piliphphisiyuusa 2:12) Xinqqatee doometta xalla. Denddiya oyshay, Xoossaa siiquwan neeni waanada deꞌana danddayay? yaagiyaagaa. Wurssettan nu beꞌana shemppoy hegau zaaruwaa oyqqiis.
[Tohossa qofaa]
a Xinqqatee Yihoowa Markkati layttan layttan shiiqiyo gita shiiqotun ubbatoo deꞌiyaaba.
GEESHSHA MAXAAFAY TAMAARISSIYOOBAA
▪ Kiristtaanetu xinqqatee, haattaa caccafiyoogaa gidennan muleera haattan muukettiyoogaa. —Maatiyoosa 3:16.
▪ Xinqqatiyau kaalettiya tanggoti doommiyoy eraa demmiyoogaananne ammanuwaa bessiyoogaana; hegaappe kaalliyay nagaraappe simmiyoogaa, laamettiyoogaanne ba huuphiyaa Xoossaassi geppiyoogaa.—Yohaannisa 17:3; Oosuwaa 3:19; 18:8.
▪ Ne huuphiyaa Yihoowassi geppanau, asay Yesuusa kaallanau bana yeggi bayidoogaadan, nena yegga bayana koshshees.—Marqqoosa 8:34.
▪ Xinqqatee issi uri ba kase deꞌuwaayyo hayqqidi, Xoossaa sheniyaa oottanau deꞌuwan denddiyoogaa malaatees.—1 PHeexiroosa 4:2.
[Sinttaa 180n diya misiliyaa]
Xoossaa Qaalaa tumu eraa demmiyoogee xinqqatiyau gidaa kunttanau keehi koshshiya tanggo
[Sinttaa 180n diya misiliyaa]
Neeni ammaniyoobaa haratussi yootanau ammanoy nena denttettanau bessees
[Sinttaa 181n diya misiliyaa]
Woosan ne huuphiyaa Xoossaassi geppadii?
[Sinttaa 181n diya misiliyaa]
Xinqqate giyoogee, nu kase deꞌuwau hayqqidi Xoossaa sheniyaa oottanau deꞌuwan denddiyoogaa yaagiyoogaa