SHaahuwaa 16

Masee Yiis

Naazireete Yesuusi daro wodiyaappe kase asay yaana giidi naagiyo Mase gidiyoogaa Yihooway qonccissiis

YAANA geetettida Masiyaa asay shaakki eranaadan Yihooway maaddanee? Ee. Xoossay oottidobaa akeeka. Wodee, Ibraysxxe Geeshsha Maxaafaa xuufeti xaafetti wuroosaappe oyddu xeeta gidiya layttay aadhido wode. Huuphessa Galiilan Naazireete geetettiya issi kataman, Mayraamo geetettiya issi yelaga maccaaseekko issi imattay garamissiya kiitaa ekkidi yiis. Gabreela geetettiya issi kiitanchay iyyo qonccidi, a geelaꞌo gidikkokka, Xoossay ba wolqqaa, geeshsha ayyaanaa goꞌettidi, a attuma naꞌaa shahaarada yelanaadan oottanaagaa yootiis. He naꞌay asay daro wodiyau naagido Kawuwaa, merinau haariyaagaa gidees! He naꞌay, Xoossay a deꞌuwaa saluwaappe Mayraami uluwau aattido, Xoossaa Naꞌaa.

Mayraama he gita aawatettaa ba huuphiyaa kawushshada ekkaasu. O giigissida Yooseefa geetettiya anaaxee, Xoossay kiittido kiitanchay Mayraama waanada shahaaridaakko ayyo yooti simmin o ekkiis. Gidoshin, Masee Beetaliheemen yelettana giya hiraagay shin? (Mikiyaasa 5:2) He guutta katamay Naazireeteppe 140 kilo meetire gidiyaagaa haakkees!

Rooma kawoy asay qoodettanaadan awaajjiis. Asay ba yelettido kataman xaafettanaadan koyettiis. Yooseefinne Mayraama yelettidoy Beetaliheeme gidennan aggenna; yaatiyo gishshau, Yooseefi ba shahaara maccaasiyo ekkidi Beetaliheeme baanau koshshiis. (Luqaasa 2:3) Mayraama yelidoy issi gaxaataana gidishin, naꞌaa mehee kattaa miyo qoriyan zinꞌꞌissaasu. Hegaappe guyyiyan, yelettida naꞌay asay naagiyo Masiyaa woykko Kiristtoosa gidiyoogaa deriyaa doonan dorssaa heemmiya asatuyyo yootanaadan Xoossay daro kiitanchata kiittiis.

Hegaappe simmin, haratikka Yesuusi asay naagiyo Masiyaa gidiyoogaa markkattana. Hananabaa yootiya Isiyaasi issi bitanee Masee oottiyo gita oosuwau ogiyaa giigissanau denddanaagaa kasetidi yootiis. (Isiyaasa 40:3) He ogiyaa giigissiyaagaa geetettidaagee Xammaqiya Yohaannisa. I Yesuusa beꞌidi, “Xoossaa dorssai, sa7aa nagaraa xaissiyaagee, hageeho!” yaagiis. Yohaannisi erissiyo ashkkaratuppe amaridaageeti sohuwaara Yesuusa kaallidosona. Etappe issoy: “Nuuni Masiyaara gaittida” yaagiis.—Yohaannisa 1:29, 36, 41.

Hara naqaashaykka deꞌees. Yohaannisi Yesuusa xammaqiyo wode, Yihooway ba huuphe saluwaappe yootiis. Yesuusi Mase gidanaadan geeshsha ayyaanan tiyidi: “Taani siiqiyo ta Na7ai, tana ufaissiyaagee hagaa” yaagiis. (Maatiyoosa 3:16, 17) Daro wodiyau asay naagido Masee yiis!

Hegaadan hanidoy awudee? Hegee polettidoy, 29 M.L., Daaneeli yootido 483 layttay wurido wodiyaana. Ee, hegee Yesuusi Mase woykko Kiristtoosa gidiyoogaa bessiya maalaalissiya naqaashatuppe issuwaa. SHin i saꞌan deꞌiyo wode ayba kiitaa yootanee?

—Maatiyoosa shemppo 1ppe 3 gakkanaashin; Marqqoosa shemppo 1n; Luqaasa shemppo 2n; Yohaannisa shemppo 1n baasettidaagaa.

◼ Yesuusi Mase gidiyoogaa kiitanchati qonccissanaadan Yihooway eta waati goꞌettidee?

◼ Yesuusi Mase gidiyoogaa yootanaadan Xoossay Xammaqiya Yohaannisa waati goꞌettidee?

◼ Yihooway ba Naꞌay Mase gidiyoogaa bari huuphe waati qonccissidee?

[Sinttaa 19n deꞌiya saaxiniyaa]

Xoossaa Naꞌaa Gididoy Ayba Ogiyaanee?

Yihooway Yesuusau Aawa; shin i aawaa gidiyo hanotay asaagaappe dummatees. Yesuusa deꞌoy doommidoy issi maccaasiyaa shahaariina gidenna; hegaappe dumma ogiyan a Xoossay medhiina. Ubba, i Yihooway medhido koyro kiitanchaa. (Qolasiyaasa 1:15-17) Yihooway Yesuusa medhidi au deꞌuwaa immido gishshau, Yesuusa Aawaa geetettana danddayees. Yihooway ha ayyaana Naꞌaa medhi simmidi, saluwaanne saꞌaa gujjin hara ubbabaa medhanau a “waanna oosanchcha” oottidi goꞌettiis.—Leemiso 8:30.

[Sinttaa 19n deꞌiya misiliyaa]

Doomettaabaa

Kessaabaa

Wogaabaa

Qoodaabaa

Zaarettido Wogaa

Yaasa

Daannata

Uruto

1 Sameela

2 Sameela

1 Kawotu

2 Kawotu

1 Hanidabaa Odiya

2 Hanidabaa Odiya

Izira

Nahimiyaa

Asttiro

Iyyooba

Mazamure

Leemiso

Eranchchaa

Siiquwaa Sabaa

Isiyaasa

Ermmaasa

Ermmaasa Zilaassaa

Hizqqeela

Daaneela

Hoose7a

Yuu7eela

Amoxa

Abddiyyu

Yoonaasa

Mikiyaasa

Naahooma

Imbbaaqooma

Sofonaasa

Hagga

Zakkaariyaasa

Milkkiyaasa

Maatiyoosa ●

Marqqoosa ●

Luqaasa ●

Yohaannisa ●

Oosuwaa

Roome

1 Qoronttoosa

2 Qoronttoosa

Galaatiyaa

Efisoona

Piliphphisiyuusa

Qolasiyaasa

1 Tasalonqqe