Yoosiyaasa Laggeti Loꞌꞌo

Suurebaa oottiyoogee metiyaabee?— Daro asay hegee metees giidi qoppees. Yoosiyaasa giyo naꞌay suurebaa oottanau keehi metootidoogaa Geeshsha Maxaafay yootees. SHin a loꞌꞌo laggeti a maaddidosona. Ane Yoosiyaasabaanne a laggetubaa beꞌoos.

Yoosiyaasa aaway Amooni Yihuda kawo. Amooni keehi iita asa; qassi eeqau goynnees. Yoosiyaasa aaway hayqqin, Yoosiyaasi Yihudan kawotiis. SHin i hosppun laytta naꞌa! I ba aawaadan iita asee?— CHii, iita gidenna!

Yoosiyaasi naatettankka Yihoowau azazettanau koyiis. Yaatiyo gishshau, i Yihoowa siiqiya asatu xallaara laggetiis. Eti Yoosiyaasi suurebaa oottanaadan maaddidosona. Yoosiyaasa laggetuppe issoti issoti oonee?

A laggetuppe issoy Sofonaasa. Sofonaasi hananabaa yootiyaagaa; i Yihudaa asay eeqau goynnikko, eta bolli iitabay gakkanaagaa yootiis. Yoosiyaasi Sofonaasi yootidobaa siyidi, eeqau gidennan, Yihoowau goynniis.

Yoosiyaasa laggee haray Ermmaasa. I Yoosiyaasaara lagge; qassi eti issi heeran diccidosona. Eti keehi siiqettiya lagge gidiyo gishshau, Yoosiyaasi hayqqido wode Ermmaasi ayyo keehi qarettidi zilaalido yeeho zilaassaa xaafiis. Ermmaasinne Yoosiyaasi suurebaa oottanaunne Yihoowau azazettanau issoy issuwaa maaddidosona.

Yoosiyaasi oottido, nuuni kaallana koshshiya loꞌꞌobaappe ay tamaarana danddayay?— Yoosiyaasi naatettankka suurebaa oottanau koyiis. I Yihoowa siiqiya asaara laggetana koshshiyoogaa eriis. Ne laggeti Yihoowa siiqiyaageetanne neeni suurebaa oottanaadan maaddana danddayiyaageeta gidana koshshees!