Xalanne Ammanettiya Yonaataana

Kawuwaa Saaꞌoola bayra naꞌay Yonaataani, xala olancha. Yonaataani argganttappe eesotiyoogaanne gaammoppe wolqqaamiyoogaa Daawiti yootiis. Issi galla, Yonaataani amarida Pilisxxeema olanchata xoqqasan beꞌiis. I ba ola miishshaa tookkiyaagawu, ‘Yihoowi nuuyyo malaataa immennan, eta bolli denddokko. Nu pude kiyanaadan Pilisxxeemati yootikko, he wode eta bolli denddanaagaa eroos’ yaagiis. Eti, ‘Pude kiyidi olettite!’ yaagidosona. Yaagin, he naaꞌꞌu asati xoqqasaa kiyidi 20 olanchata xoonidosona.

Yonaataani Saaꞌoolawu bayra naꞌa gidiyo gishshawu, a sohuwan kawotana danddayees. SHin Israaꞌeelan kaallidi kawotanaadan Yihoowi Daawita dooridoogaa Yonaataani erikkokka, i qanaatibeenna. Yonaataaninne Daawiti mata lagge gididosona. Eti issoy issuwaa naaganawunne issoy issuwawu exatanawu qaalaa gelidosona. Yonaataani ba maayoy, bisoy, wonddafeenne qabattoy laggetettaa malaata gidanaadan Daawitawu immiis.

Daawiti Saaꞌoolappe baqatiyo wode, Yonaataani akko biidi hagaadan giis: ‘Minna; xala. Yihoowi neeni kawotanaadan dooriis. Ta aawaykka hegaa erees.’ Yonaataana mala loꞌꞌo laggee neeyyo deꞌanaadan koyay?

Yonaataani ba laggiyaa maaddanawu darotoo hayqqiichi attiis. I Kawuwaa Saaꞌooli Daawita woranawu koyiyoogaa eriyo gishshawu, ba aawawu, ‘Daawita woriyoogee neeyyo nagara; i aynne mooribeenna’ yaagiis. Saaꞌooli Yonaataana bolli keehi hanqqettiis. Amarida layttay aadhin, Saaꞌoolinne Yonaataani olan issippe hayqqidosona.

Yonaataani hayqqi simmin, a naꞌaa Mafibosheeta Daawiti koyiis. I Mafibosheeta demmidi, awu hagaadan giis: ‘Ne aaway tawu loꞌꞌo lagge gidido gishshawu, ne deꞌo laytta ubban taani nena naagana. Neeni ta kawo keettan deꞌana; qassi ta masoofiyaappe maana.’ Daawiti ba laggiyaa Yonaataana mule dogibeenna.