PHeexiroosi Yesuusa Kaddees

Yesuusi kiitettidaageetuura pooqiyan deꞌiyo wode, etayyo, ‘Hachi qammi intte ubbay tana yeggi bayidi baqatana’ yaagiis. PHeexiroosi, ‘Eti ubbati nena yeggi bayidi baqatikkokka, taani nena mulekka yeggikke’ yaagiis. SHin Yesuusi PHeexiroosawu, ‘Kuttoy waassanaappe kase, neeni tana heezzutoo erikke gaana’ yaagiis.

Wotaaddarati Yesuusa Qayaafa soo efiido wode, kiitettidaageetuppe daroti baqatidosona. SHin etappe naaꞌꞌati daro asaara kaallidosona. Etappe issoy PHeexiroosa. I Qayaafa keettaa gibbiyaa gelidi tamaa hoꞌꞌees. Tamaa pooꞌuwan, issi macca ashkkariyaa PHeexiroosa somꞌꞌuwaa xeellada, ‘Taani nena erays! Neeni Yesuusaara issippe deꞌaasa’ yaagaasu.

PHeexiroosi, ‘CHii, taani aara deꞌikke! Neeni haasayiyoobay aybakko taani erikke!’ yaagiis. I dirssaa penggiyaakko biis. SHin sohuwaara hara ashkkariyaa a beꞌada, asaayyo, ‘Ha bitanee Yesuusaara deꞌees!’ yaagaasu. PHeexiroosi, ‘Taani Yesuusa erikke!’ yaagiis. Issi bitanee, ‘Neeni etappe issuwaa! Neenikka Yesuusadan Galiila asa gidiyoogaa ne haasayaappe taani erays’ yaagiis. SHin PHeexiroosi, ‘Taani a erikke!’ giidi caaqqiis.

He wode sohuwaara kuttoy waassiis. PHeexiroosi bana Yesuusi guyye simmidi xeelliyoogaa beꞌiis. I Yesuusi giidobaa hassayidi kare kiyidi mishetti yeekkiis.

He wode, Sanhedirine shilootay Qayaafa son Yesuusa bolli pirddanawu shiiqiis. Eti Yesuusa woranawu qofaa qachi uttidosona; shin haꞌꞌi gaaso koyiiddi deꞌoosona. SHin eti a bolli wottiyooba demmana danddayibookkona. Wurssettan, Qayaafi Yesuusa, ‘Neeni Xoossaa Naꞌee?’ yaagidi oychiis. Yesuusi, ‘Ee’ yaagiis. Qayaafi, ‘Nuuyyo hara markka koshshenna. Hagee cashsha!’ yaagiis. SHilootay, ‘Ha bitanee hayqqana bessees’ yaagidi maayiis. Eti Yesuusa baqqidi, a bolli cuchidi, a ayfiyaa goozidi, qassi a shocidi, ‘Neeni Xoossay erissidobaa yootiyaagaa gidikko, nena shociday oonakko nuussi yoota!’ yaagidosona.

Saꞌay wonttin, eti Yesuusa Sanhedirine addaraashaa efiidi, ‘Neeni Xoossaa naꞌee?’ yaagidi haranttuwaa oychidosona. Yesuusi, ‘Intte tana Xoossaa Naꞌaa giiddi deeta’ yaagidi zaariis. He wode eti i Xoossaa cayiis giidi a biittaa haariya Rooma bitaniyaa, PHenxxeniyaa PHilaaxoosa kawo keetti efiidosona. Kaallidi aybi hanidee? Ane beꞌoos.