Yihoowa Dabbo Gidana Danddayaasa

Yihoowi neeni A loytta eranaadan koyees. Aybissi? Yihoowi neeni A eeshshaabaa, I ba oosuwaa oottiyo ogiyaabaanne I neessi halchchidobaa loytta eriyo wode, aara dabbotanawu ne keehi koyana giidi qoppees. Neeni tumuppe Xoossaa dabbo gidana danddayay? (Mazamure 25:14 nabbaba.) Neeni A dabbo gidanawu ay oottana danddayay? Geeshsha Maxaafay he oyshata zaarees. Yihoowi ooppenne aadhdhiya Dabbo gidiyoy aybissakkokka qonccissees.

1. Yihoowi neeni ay oottanaadan shoobbii?

‘Xoossaakko shiiqa; ikka neekko shiiqana.’ (Yaaqooba 4:8) Hegee woygiyoogee? Yihoowi neeni ayyo dabbo gidanaadan shoobbees. Xoossaa beꞌana danddayenna gishshawu aara dabbotana danddayays giidi qoppanawu issi issi asay metootana danddayees. Gidikkonne, Yihoowi nuuni A dabbo gidana mala A eeshshaabaa erana koshshiya ubbabaa ba Qaalan Geeshsha Maxaafan qonccissiis. Nuuni Geeshsha Maxaafan Xoossay yootidobaa nabbabiyo wode, Yihoowa beꞌi erennaba gidikkonne aara dabbotaa mintti mintti boos.

2. Yihoowi neeyyo ooppenne aadhdhiya Dabbo gidiyoy aybissee?

Yihoowappe aaruwan nena siiqiya uri baa. I neeni ufayttanaadaaninne maadoy koshshiyo wode ubban A woossanaadan koyees. ‘I neeyyo qoppiyo gishshawu, nena hirggissiya ubbabaa A bolli olana’ danddayaasa. (1 PHeexiroosa 5:7) Yihoowi awudenne ba dabbota maaddanawu, minttettanawunne eti yootiyoobaa siyanawu koyees.—Mazamure 94:18, 19 nabbaba.

3. Yihoowi nuuni aara dabbotanawu ay oottanaadan koyii?

Yihoowi asa ubbaakka siiqees, “shin suuretuyyo i ulottees.” (Leemiso 3:32) Yihoowi ba dabboti I loꞌꞌoba giyoobaa oottanawu baaxetanaadaaninne I iitaba giyoobaappe naagettanaadan koyees. Issi issi asay Yihoowi koyiyoobaa oottana danddayikke, qassi iitaba ubbaa aggana danddayikke giidi qoppennan waayi aggana. SHin, Yihoowi maariyaagaa. I bana tumuppe siiqiyaanne ufayssanawu wozanappe baaxetiya ubbaa nashshees.—Mazamure 147:11; Oosuwaa 10:34, 35.

LOYTTA AKEEKA

4. Abrahaami Yihoowa dabbo

Geeshsha Maxaafay Abrahaamabaa (Abraamakka geetettees) yootiyoobay Xoossaa dabbo gidiyoogee woygiyoogaakko akeekanaadan nuna maaddees. Doomettaabaa 12:1-4n Abrahaamabaa nabbabite. Yaatidi ha oyshata tobbite:

• Yihoowi Abrahaami ay oottanaadan yootidee?

• Yihoowi awu ay oottanawu qaalaa gelidee?

• Abrahaami ay oottidee?

5. Yihoowi ba dabboti oottanaadan yootiyoobaa

Nuuni darotoo nu laggeti issi issibaa oottanaadan koyoos.

• Ne laggeti oottanaadan neeni koyiyo amaridabati aybee?

Koyro Yohaannisa 5:3 nabbabite; yaatidi ha oyshaa tobbite:

• Yihoowi ba dabboti oottanaadan koyiyoobay aybee?

Nuuni Yihoowawu azazettanawu, nu eeshshaa laammiyoogee koshshana danddayees. Isiyaasa 48:17, 18 nabbabite; yaatidi ha oyshaa tobbite:

• Yihoowi ba dabboti laamettanaadan koyiyoy aybissee?

6. Yihoowi ba dabbota maaddanawu oottiyoobaa

BIIDUWAA: Yihoowi Taayyo Darobaa Oottiis (3:20)

• Biiduwan beꞌido maccaasiyaa iitabaa qoppiyoogaanne hirggiyoogaa agganaadan Yihoowi O waati maaddidee?

Isiyaasa 41:10, 13 nabbabite; yaatidi ha oyshata tobbite:

• Yihoowi ba dabbotu ubbawu ay oottanawu qaalaa gelidee?

• Yihoowi neeyyo loꞌꞌo Dabbo gidana gaada qoppay? Aybissi?

7. Yihoowa dabbo gidanawu aara haasayana koshshees

Laggeti issoy issuwaara haasayiyo wode eta dabbotay minnees. Mazamure 86:6, 11 nabbabite; yaatidi ha oyshata tobbite:

• Nuuni Yihoowaara waani haasayana danddayiyoo?

• Yihoowi nuna waati haasayissii?

AY AKEEKADII?

Yihoowi nenaara dabbotanawu koyees, qassi neeni aara dabbotanaadan I maaddana.

Zaaretuwaa

• Yihoowi ba dabbota waati maaddii?

• Yihoowi ba dabboti laamettanaadan yootiyoy aybissee?

• Yihoowaara dabbotiyoogee keehi deexxiyaaba gaada qoppay? Aybissi?

PILGGA

Yihoowaara dabbotiyoogee ne deꞌuwan nena waati maaddana danddayii?

“Erana Bessiya Xoossaa Yihoowa” (Wochchiyo Keelaa huuphe yohuwaa)

Neeni Xoossaara waana dabbotanaakko akeeka.

“Xoossaara Waana Dabbotana Danddayiyaanaa?” (Yelagati Oychchiyo Oyshaa—Oosuwan Peꞌiya Zaaruwaa, Paydo 2, shemppo 35)

Issi maccaasiyaa Yihoowaara dabbotidoogan I deꞌoy waani giiga gididaakko akeeka.

“Taani Hayqqanawu Koyabeykke!” (Wochchiyo Keelaa Paydo 1 2017)

Yelagati Yihoowa waati xeelliyaakko yootiyoobaa siya.

Xoossaara Dabbotiyoogaa Giyoogee Woygiyoogee? (1:46)