TIMIRTTE 29
Nuuni Hayqqiyo Wode Waaniyoo?
Neeni keehi siiqiyo uri hayqqidee? Neeni he kayyuwaa wodiyan hagaadan qoppennan aggakka: ‘Nuuni hayqqiyo wode waaniyoo? Nuuni siiqiyo hayqqidaageetuura zaaretti gayttanee?’ He oyshatuyyo Geeshshaa Maxaafay zaariyo minttettiyaabaa ha timirttiyaaninne kaalliyaagan beꞌana.
1. Nuuni hayqqiyo wode waaniyoo?
Yesuusi hayqoy xiskkuwaa kayriyoogaa mala giis. Xiskkuwaa kayrida uri ba matan haniyaabaa akeekenna. Hayqoy xiskkuwaa mala gididoy aybiinee? Hayqqida uri sahettenna. I laggetanne so asaa ay keena siiqikkonne boorasenna. Geeshsha Maxaafay, “Haiqqidaageeti aibanne erokkona” yaagees.—Eranchchaa 9:5 nabbaba.
2. Hayquwaabaa tumaa eriyoogee nuna maaddiyoy aybissee?
Hayquwaa, ubba qassi hayqqidaageetakka daro asay yayyees! SHin Geeshsha Maxaafay hayquwaabaa yootiyoobay nena minttettana danddayees. Yesuusi, “[Tumay] inttena ailletettaappe kessana” yaagiis. (Yohaannisa 8:32) Geeshsha Maxaafay asi hayqqi simmin hayqqenna shemppoy deꞌees geenna; amarida haymaanootetti tamaarissiyoobaappe hegee dummatees. Yaatiyo gishshawu, hayqqida uri waayettenna. Qassi, hayqqidaageeti aybanne erenna gishshawu nuna qohana danddayokkona. Hegaa gishshawu, hayqqidaageetussi goynnana woy eta ufayssanawu giidi aybanne oottana koshshenna, qassi etawu woossana bessenna.
Issi issi asay hayqqidaageetuura haasayana danddayiyoogaa yootees. SHin hegee danddayettennaba. Nuuni beꞌidoogaadan, hayqqidaageeti “aibanne erokkona.” Eti siiqiyo hayqqida asatuura haasayoos giidi qoppiyaageeti he hayqqidaageetudan hananawu maliya daydanttatuura haasayoosona. Yaaniyo gishshawu, hayqqidaageetubaa tumaa eriyoogee daydanttatuppe nuna naagees. Daydanttatuura gayttiyoogee nuna qohiyoogaa Yihoowi eriyo gishshawu, nuuni etaara haasayennaadan azaziis.—Zaarettido Wogaa 18:10-12 nabbaba.
LOYTTA AKEEKA
Geeshsha Maxaafay hayquwaabaa ay tamaarissiyaakko loytta erada, hayqqidaageeta qaxxayenna siiqiya Xoossaa mintta ammana.
3. Hayqqidaageetu hanotaabaa tumaa era
Asi hayqqiyo wode waaniyaakko kumetta saꞌan deꞌiya asay ammaniyoobay dumma dumma. He ubbaa ammanoy tuma gidennaagee qoncce.
Hayqqida asaa hanotaabaa intte heeran daro asay ammaniyoobay aybee?
Geeshsha Maxaafay tamaarissiyoobaa akeekanawu, BIIDUWAA beꞌite.
Eranchchaa 3:20 nabbabite; yaatidi ha oyshata tobbite:
Ha xiqisee yootiyoogaadan, issi uri hayqqiyo wode waanii?
Ha xiqisee issi uri hayqqi simmin A shemppoy harasan deꞌees gii?
Yesuusawu mata lagge gidida Alꞌꞌaazara hayquwaabaa Geeshsha Maxaafay yootees. Yohaannisa 11:11-14 nabbabiyo wode Alꞌꞌaazara hanotaabaa Yesuusi woygidaakko akeeka. Yaatidi ha oyshata tobbite:
Yesuusi hayquwaa aybiira geeddarssidee?
Ha geeddarssoy hayqqidaageetu hanotaabaa ay qonccissii?
Hayquwaabaa Geeshsha Maxaafay yootiyoobaa waata xeellay?
4. Hayquwaabaa tumaa eriyoogee nuna maaddees
Hayquwaabaa tumaa eriyoogee hayqqidaageetussi yayyiyoogaa agganaadan oottees. Eranchchaa 9:10 nabbabite; yaatidi ha oyshaa tobbite:
Hayqqidaageeti nuna qohana danddayiyoonaa?
Nuuni Geeshsha Maxaafay yootiyo tumaa ammaniyo wode, hayqqidaageetussi goynnana woy eta ufayssiyaabaa oottana bessees giyo wordduwaa ammanokko. Isiyaasa 8:19nne Ajjuutaa 4:11 nabbabite; yaatidi ha oyshaa tobbite:
Hayqqida urawu goynniya woy I maaddanaadan koyiya uraa Yihoowi waati xeellees gaada qoppay?
Hayquwaabaa tumaa eriyoogee Yihoowa ufayssenna meezetuppe nuna laꞌa kessees
5. Hayquwaabaa tumaa eriyoogee nuna minttettees
Issi uri kase oottido iitabaa gaasuwan hayqqiyo wode qaxxayettees giyoobaa daroti tamaaridosona. SHin hayqqi simmidi ooninne, ubba qassi keehi iitabaa oottida urikka waayettennaagaa eriyoogee nuna minttettees. Roome 6:7 nabbabite; yaatidi ha oyshaa tobbite:
Issi uri hayqqiyo wode Xoossay A nagaran A oychchennaagaa Geeshsha Maxaafay yootees. Yaatiyo gishshawu hayqqida uri kase oottido nagaraa gaasuwan waayettees gaada qoppay?
Nuuni Yihoowa loytti eriyo wode I hayqqidaageeta mule qaxxayennaagaa kaseppe aaruwan akeekoos. Zaarettido Wogaa 32:4nne 1 Yohaannisa 4:8 nabbabite; yaatidi ha oyshata tobbite:
Hayqqidaageeti qaxxayettiyoogee ha xiqiseti yootiyo eeshshati deꞌiyo Xoossaa ufayssanee?
Hayquwaabaa tumaa eriyoogee minttettiyaabee? Aybissi?
ISSI ISSI ASAY HAGAADAN GEES: “Taani hayqqada waayiyaa beꞌana gaada yayyays.”
Minttettiya ay xiqiseta yootana danddayay?
AY AKEEKADII?
Issi uri hayqqidi aybanne erenna. Hayqqidaageeti waayettokkona, woy qassi paxa deꞌiyaageeta qohana danddayokkona.
Zaaretuwaa
Nuuni hayqqiyo wode waaniyoo?
Hayquwaabaa tumaa eriyoogee nuna waati maaddii?
Hayquwaabaa tumaa eriyoogee nuna waati minttettii?
PILGGA
Geeshsha Maxaafan “shemppo” geetettida qaalay woygiyoogaakko akeeka.
Xoossay iitata siꞌooliyan qaxxayiyaakkonne akeeka.
Nuuni hayqqidaageetussi yayyana koshshii?
Nuuni hayqqiyo wode waaniyaakko tumaa eridi, issi bitanee waani minettidaakko akeeka.