TIMIRTTE 35
Loꞌꞌobaa Waata Kuuyana Danddayay?
Nuuni ubbay darobaa kuuyoos. Hegeetuppe daroti nuussinne Yihoowaara dabbotido dabbotawu maaddiyaaba woy qohiyaaba gidana danddayoosona. Leemisuwawu, nuuni awan deꞌanaakko, koshshiya miishshaa waati demmanaakko woy aqo oyqqanaakko agganaakko kuuyana koshshennan aggenna. Nuuni loꞌꞌobaa kuuyiyo wode, nu deꞌuwan ufayttananne Yihoowa ufayssana.
1. Geeshsha Maxaafay loꞌꞌobaa kuuyanawu nena maaddana mala waata goꞌettana danddayay?
Issibaa kuuyanaappe kase, Yihoowi maaddanaadan woossa; qassi A qofaa akeekanawu Geeshsha Maxaafaa pilgga. (Leemiso 2:3-6 nabbaba.) Amaridabatun Yihoowa azazoy qoncce. He qoncce azazuwaa azazettikko keehi loꞌꞌobaa kuuyaasa.
Neeni waatanaakko Geeshsha Maxaafay qoncce azazuwaa yootana xayikko shin? He wodekka “neeni baanau bessiya [ogiyan]” Yihoowi nena kaalettana. (Isiyaasa 48:17) Waatidi? Nena kaalettiya maarati deꞌana danddayoosona. Geeshsha Maxaafay yootiyo maaray Xoossaa qofaanne awu siyettiyaabaa qonccissiya laamettenna tumaa. Nuuni darotoo Geeshsha Maxaafan nabbabiyoobaappe Xoossay issibaa waati xeelliyaakko akeekoos. Nuuni Yihoowawu siyettiyaabaa akeekiyo wode, A ufayssiyaabaa kuuyana danddayoos.
2. Neeni issibaa kuuyanaappe kase ay qoppana koshshii?
Geeshsha Maxaafay, “Cinccai akeekidi tanggees” yaagees. (Leemiso 14:15) Hegaa giyoogee nuuni issibaa kuuyanaappe kase dumma dummabaa takki giidi qoppana koshshees giyoogaa. Hegeeta ubbaa yiggiyo wode nena hagaadan oychcha: ‘Geeshsha Maxaafay hegawu maaddiya ayba maarata yootii? Tawu woppaa demissanay awugee? Ta kuuyiyoobay harata maaddaneeyye qohanee? Ubbaappe aaruwan, hegan Yihoowi ufayttanee?’—Zaarettido Wogaa 32:29.
Nuussi aybi loꞌꞌokkonne aybi iitakko yootanawu Yihoowawu maatay deꞌees. Nuuni A higgetanne maarata loytti eridi hegeeta kaallanawu murttiyo wode, nu kahay loohanaadan oottoos. Nu kahay woy zoriya wozanay issibay loꞌꞌokko iitakko nuuni eranaadan oottiyaaba. (Roome 2:14, 15) Loohida kahay loꞌꞌobaa kuuyanaadan nuna maaddana.
LOYTTA AKEEKA
Loꞌꞌobaa kuuyanawu Geeshsha Maxaafay yootiyo maaratinne nu kahay nuna waati maaddiyaakko loytta akeeka.
3. Geeshsha Maxaafaa kaaletuwaa kaalla
Nuuni issibaa kuuyiyo wode Geeshsha Maxaafay yootiyo maaray nuna waati maaddana danddayii? BIIDUWAA beꞌite; yaatidi kaallidi deꞌiya oyshata tobbite.
Nuussi Yihoowi immido alꞌꞌo imotay aybee?
Yihoowi nubaa nuuni kuuyanaadan oottidi medhdhidoy aybissee?
I nuuni keehi loꞌꞌobaa kuuyanaadan maaddiyaabaa ay immidee?
Geeshsha Maxaafay yootiyo issi maaraa akeekanawu, Efisoona 5:15, 16 nabbabite. Yaatidi kaallidi deꞌiyaabatun nu “lo77o wodiyaa” waatidi maara goꞌettanaakko tobbite.
Geeshsha Maxaafaa ubbatoo nabbabanawu.
Loꞌꞌo aqo lagge, aawa, aayo woy naꞌa gidanawu.
Galchchaa shiiqota shiiqanawu.
4. Ne kahay loꞌꞌobaa kuuyanawu loohanaadan ootta
Issiban Geeshsha Maxaafay azaziyoobay nuussi qoncce gidiyo wode, loꞌꞌobaa kuuyiyoogee waayi metana. Hegaa mala azazoy odettana xayikko shin? BIIDUWAA beꞌite; yaatidi kaallidi deꞌiya oyshaa tobbite.
Issi michchiyaa ba kahay loohanaadaaninne Yihoowa ufayssiyaabaa kuuyana mala waatidoogaa biidoy bessii?
Nuuni kuuyana koshshiyaabaa harati kuuyanaadan oychchana bessennay aybissee? Ibraawe 5:14 nabbabite; yaatidi ha oyshata tobbite:
Harati nuussi kuuyanaadan oychchiyoogee waayi metana, shin nuuni shaakki erana koshshiyaabay aybee?
Ne kahay loohanaadaaninne neeni loꞌꞌobaa kuuyanaadan maaddana danddayiyaabi aybee?
Nu kahay deꞌuwan kaallana ogiyaa kuuyanawu karttaadan maaddees
5. Haratu kahaa bonchcha
Asa ubbay kuuyiyoobay issi mala gidenna. Nuuni haratu kahaa bonchchiyoogaa waati bessana danddayiyoo? Ane naaꞌꞌu hanotata beꞌoos:
Koyro hanotaa: Darobaa tisttettiyoogaa dosiya issi michchiyaa daro michchontti hegaadan tisttettiyoogaa beꞌidi ufayttenna galchchaa heeran deꞌanawu baasu.
Roome 15:1nne 1 Qoronttoosa 10:23, 24 nabbabite; yaatidi ha oyshata tobbite:
Ha xiqiseta qoppada, he michchiya ay kuuyana danddayay? Ne kahay oottanawu nena diggennabaa A kahay diggiyo uraara deꞌiyo sohuwan neeni waatuutii?
Naaꞌꞌantto hanotaa: Issi ishay ushshaa uyiyoogaa Geeshsha Maxaafay diggennaagaa erikkokka, aynne uyennan agganawu kuuyiis. I shoobettidosan ishantti ushshaa uyishin beꞌiis.
Eranchchaa 7:16nne Roome 14:1, 10 nabbabite; yaatidi ha oyshata tobbite:
Ha xiqiseta qoppidi, he ishay ay kuuyana danddayii? Neeni oottennaadan ne kahay diggiyoobaa hara uri oottishin beꞌikko waatuutii?
Loꞌꞌobaa kuuyanawu neeni ay oottana koshshii?
1. Neeni ay oottanaakko kuuyanawu maaddana mala Yihoowa woossa.—Yaaqooba 1:5.
2. Hegawu maaddiya maaraa demmanawu Geeshsha Maxaafaanne A qofay deꞌiyo xuufeta pilgga. Qassi kayma Kiristtaaneta zoriyaa oychchana danddayaasa.
3. Neeni kuuyiyoobay ne kahaanne haratu kahaa waatanaakko qoppa.
ISSI ISSI ASAY HAGAADAN GEES: “Neeni koyiyoobaa aybanne oottana danddayaasa. Harati ay qoppikkokka metoy baa.”
Xoossaynne hara asay issibaa waati xeelliyaakko qoppana koshshiyoy aybissee?
AY AKEEKADII?
Issibaa Yihoowi waati xeelliyaakko akeekidi, nu oottiyoobay harata maaddanaakko woy qohanaakko qoppiyo wode loꞌꞌobaa kuuyoos.
Zaaretuwaa
Yihoowa ufayssiyaabaa waata kuuyana danddayay?
Ne kahaa loohissanawu waatana danddayay?
Haratu kahaa bonchchiyoogaa waata bessana danddayay?
PILGGA
Xoossaara dabbotaa minttanawu maaddiyaabaa kuuyanawu waatana danddayay?
“Xoossaa Bonchissiya Kuushshaa Kuuyite” (Wochchiyo Keelaa, Hosppune 15, 2011)
Yihoowi nuna waati zoriyaakko loytta akeeka.
Issi bitanee deexxiyaabaa kuuyanaadan aybi maaddidaakko akeeka.
Issibawu Yihoowa azazoy qoncce gidana xayikkonne A waata ufayssanaakko akeeka.
“Geeshsha Maxaafaa Azazoy Neessi Ubbatoo Koshshii?” (Wochchiyo Keelaa huuphe yohuwaa)