Xoossaa Ufayssenna Meeziyaappe Naagettite

AFIRKKA biittan away suullishin, xaaxettibeenna ahaa issi gibbe giddon wottoosona. Baliyaa yiida asay azzanidoogaa bessanau ahaa mataara aadhiyo wode, issi cima bitanee takki gees. I keehi azzanidi, hayqqida bitaniyaa somꞌꞌuwaa mati hokkidi, “Neeni biyoogaa taassi ayssi yootabeykkii? Tana ayssi hagaadan aggada bay? Haꞌꞌi neeni kase sohuwaa simmido gishshau, kaseegaadan tana maadduutii?” yaagidi haasayiyoogaa doommees.

Afirkkan hara heeran issi naꞌi yelettiyo wode he naꞌaa ooninne beꞌanaadan paqqadettenna. Naꞌaa asay beꞌanaunne a sunttiyo siraataa polana danddayiyoy amarida wodee aadhi simmiina.

Hayqqida ura haasayissiyoogeenne yelettida naꞌa asi beꞌennaadan diggiyoogee, issi issi asau oorattaba milatana danddayees. SHin issi issi wogaaninne deretettan, hayquwaunne yeletau asau deꞌiya xeelaanne he wodiyan eti oottiyoobaa bochiya wolqqaama ammanoy, hayqqidaageeti tumuppe hayqqibookkona; ubba deꞌoosonanne akeekoosona yaagiyaagaa.

He ammanoy keehi wolqqaama gidiyo gishshau, asi ba deꞌuwan oottiyo ubbabaara gayttida meeziyaaninne wogan qonccees. Leemisuwau, miilooniyan qoodettiyaageeti issi ura deꞌuwan keehi koshshiya xekkati, giishin yeletaa, panttatettaa, aqo oyqqiyoogaa, naata yeliyoogaanne hayquwaa malabati mayzzati deꞌiyo ayyaana alamiyau pinniyo ogeta giidi ammanoosona. Hayqqida uri yan uttidi i aggidi biido asaa deꞌuwaara gayttidabaa minni oottees giidi asay ammanees. Qassi zaarettidi yelettiyoogan deꞌuwau simmidi yees goosona.

Ha kaalli kaalli haniyaabati xekkan xekkan maara polettanaadan, asay daro wogaanne meeziyaa kaallees. He wogau gaaso gididabay, nu hayqqiyo wode hayqqennabay nu giddon deꞌees giyo ammanuwaa. Tumu Kiristtaaneti he ammanuwaara gayttida ay wogaappenne haakkoosona. Aybissi?

Hayqqidaageeti Ay Mala Hanotan Deꞌiyoonaa?

Geeshsha Maxaafay hayqqidaageetu hanotaa qonccissidi yootees. Hagaadan gees: “Paxa de7iya asati issitoo haiqqanau de7iyoogaa eroosona; shin haiqqidaageeti aibanne erokkona. . . . Eta siiqoi, ixoinne qanaatee ubbai etaara issippe xayiichchiis. . . . Neeni baanasan duufuwan oosoi, woikko halchchoi, woikko eri, woikko aadhdhida eratetti baawa.” (Era. 9:5, 6, 10) Xoossau tumuppe goynniyaageeti ha Geeshsha Maxaafaa tumaa daro wodiyaappe doommidi ammanoosona. Eti shemppoy hayqqennaba gidennan, hayqqiyaabanne xayiyaaba gidiyoogaa akeekidosona. (Hiz. 18:4) Eti hayqqidaageetu ayyaanati deꞌennaagaakka eridosona. (Maz. 146:4) Beni wode Yihooway, hayqqidaageeti akeekoosonanne paxa deꞌiyaageeta maaddana woy qohana danddayoosona giyo ammanuwaara gayttida ay meeziyaappenne ba asay haakkanaadan minttidi azaziis.—Wog. 14:1; 18:9-13; Isi. 8:19, 20.

Koyro xeetu laytta Kiristtaanetikka worddo haymaanootiyaa timirttiyaara gayttida ayba meeziyaappenne hegaadan haakkidosona. (2 Qor. 6:15-17) Ha wodiyan deꞌiya Yihoowa Markkati eta sheeshshay, zaree woy eti diccido hanotay ay mala gidinkka, asa giddon deꞌiya issibay mule hayqqenna giyo worddo ammanuwaara gayttida ay wogappe woy ay meezeppe gidinkka haakkoosona.

Nuuni Kiristtaane gidiyoogaadan, issi meeziyaa kaallanau woy agganau qofaa qachana mala nuuyyo aybi kaaleto gidana danddayii? Hayqqidaageetu ayyaanay paxa deꞌiyaageeta maaddana woy qohana danddayees giyo ammanuwaa mala Geeshsha Maxaafaara moggenna timirttiyaara hegee gayttidabaakkonne nuuni akeekan qoppana bessees. Hegaa bollikka, nuuni hegaa mala meeziyan woy siraatan shaahettiyoogee Yihoowa Markkati ammaniyoobaanne tamaarissiyoobaa eriyaageeta xubbanaakkokka qoppana bessees. Ha yohota hassayidi, qoppana bessiya naaꞌꞌu yohota, giishin yeletaabaanne hayquwaabaa ane pilggoos.

Yeletaanne Naꞌa Sunttiyo Siraataa

Naꞌa yeletaara gayttida daro meezee bessennabaa gidenna. SHin yelettiyoogaa, mayzzatu ayyaana alamiyaappe asaa naatu maabarau pinniyoobadan asay qoppiyo heeran deꞌiya tumu Kiristtaaneti naagettana bessees. Leemisuwau, Afirkkan issi issi heeran yelettida gacino naꞌa sooppe kessokkona; qassi amarida wodee aadhanaashin sunttaa sunttokkona. Hegaadan takkiyo wodee heeraappe heeran dummatana danddayikkokka, wurssettan naꞌaa sooppe kessidi dabbotanne laggeta bessiyo, sunttaa sunttiyo siraatay polettees. He wode shiiqidaageetussi naꞌaa sunttay odettees.

Gaana​—Andersttanding zi Pipil end Zer Kalcher giyo maxaafay he meezee ayssi koshshidaakko qonccissiiddi hagaadan giis: “Gacino naꞌi koyro laappun gallassatun ‘oyshau’ yiidobadaaninne ayyaanatu alamiyaappe saꞌaa deꞌuwau pinniiddi deꞌiyoobadan qofettees. . . . Asay naꞌaa sooppe kessenna; qassi eta soo asa gidenna uri a beꞌanaadan paqqadettenna.”

Naꞌaa sunttiyo siraataa polanaashin hegaadan naagiyo wodee aybissi koshshidee? Gaana in Retrospekt giyo maxaafay, “Hosppuntta gallassaappe kase naꞌay asa gididabadan qofettenna. I amarida ogiyan ba yiido hara alamiyaara gayttees” yaagidi qonccissees. He Maxaafay gujjidi hagaadan gees: “Naꞌaa asa kessiyay a sunttaa giidi qoppiyo gishshau, issi azinaynne machiyaa bantta naꞌay hayqqana giidi yayyiyo wode, i de⁠ꞌanaagaa ammanettana gakkanaashin a sunttanau haganaa sugoosona. . . . Yaatiyo gishshau, issi issitoo na⁠ꞌaa kare kessiyoogaa giyo ha meezee, na⁠ꞌaanne a yelidaageeta keehi goꞌꞌiyaabadan qofettees. Naꞌay asaa naatu alamiyaara gattanaadan oottiyay he siraataa.”

Naꞌaa sunttiyo he siraataa darotoo kaalettiyay he soo asaa dabbotuppe bayratiyaagaa. He siraatan hanettiyaabay heeraappe heeran dummatees; shin darotoo he baalan ushshaa gussoosona, naꞌay saruwan yiidoogaa nashshiyoogan mayzzatu ayyaanatukko woossoosona, qassi hara wogaakka poloosona.

He siraatan hanettiyaabaappe waannatiyaagee naꞌaa sunttaa erissiyoogaa. Naꞌaa sunttiyo aawatettay a yelidaageetubaa gidikkonne, sunttaa dooriyoogan hara dabbotussikka gita maatay dees. Issi issi sunttati heeraa qaalan, “biidi simmiis,” “Aayyiyaa naaꞌꞌanttuwaa yaasu,” woy “Aaway haranttuwaa yiis” yaagiyaageetu mala birshshettay deꞌiyoogeeta. Hara sunttati mayzzati yelettida gacinuwaa zaarettidi hayqqidaageetu alamiyau efeennaadan digganau sunttiyoogeeta.

Issi naꞌi yelettiyo wode ufayttiyoogee bala gidennaagee qoncce. Issi naꞌau hara ura sunttaa woy i yelettiyo wode hanettidabaara gattidi sunttiyo meeziyan bali baawa; qassi naꞌaa awude sunttanaakko keeriyoogee aawu kuuyiyooba. Gidoppe attin, Xoossaa ufayssana koyiya Kiristtaaneti, yelettida gacino naꞌi mayzzati deꞌiyo ayyaana alamiyaappe paxa deꞌiya asatukko “oychanau” yiyaabadan qoppiyo qofaa maayiyooba milatissiya ayba wogaappe woy siraataappe gidinkka haakkoosona.

Hegaa bollikka, heeran deꞌiya daro asay sunttaa sunttiyo siraataa keehi koshshiya meezedan xeelliyaaba gidkikkokka, Kiristtaaneti haratu zoriya wozanau qoppananne hegee ammanenna asay aybidan qoppanaadan oottiyaakko akeekana koshshees. Leemisuwau, issi Kiristtaane so asay, sunttiyo siraatay gakkanaashin yelettida gacino naꞌaa harata bessennaba gidikko, issi issi asay woygidi qoppana danddayii? Eti Geeshsha Maxaafaa tumaa tamaarissoos giyoogaara moggenna sunttaa sunttikko, harati ay qoppanaadan oottii?

Yaatiyo gishshau, Kiristtaaneti bantta naata woygidi qassi awude sunttanaakko qofaa qachiyo wode, haratussi xube gidenna mala “ubbabaa Xoossaa bonchchuwaassi” oottanau baaxetoosona. (1 Qor. 10:31-33) Eti hayqqidaageeta bonchanau giigida ‘wogaa kaallanau Xoossaa azazuwaa yeggi bayokkona.’ Hegaappe dumma ogiyan, deꞌo Xoossaa, Yihoowa bonchoosona.—Mar. 7:9, 13.

Hayquwaappe De⁠ꞌuwau Pinniyoogaa

Yeletaadan hayquwaakka daroti, hayqqida uri beettiya alamiyaappe hayqqidaageetu ayyaanati de⁠ꞌiyo beettenna alamiyau pinniyoobadan qoppoosona. Daroti issi uri hayqqiyo wode issi issi mooguwaa wogaanne meeziyaa polana xayikko, paxa deꞌiyaageeta qaxxayiyo woy anjjiyo wolqqay deꞌiyo, mayzzatu ayyaanati hanqqettiyoobadan qoppoosona. Mooguwaara gayttidabaa giigissiyoonne poliyo wogaa he ammanoy keehi bochees.

Hayqqidaageeta ufayssanau kaalliyo mooguwaa wogan, ahaa mooganaashin koyzziyoogaappenne waassiyoogaappe doommidi mooguwaappe simmin ufayttidi bullachiyoogaa gakkanaashin, darotoo asay dumma dummabaa oottees. Hegaa mala mooguwaa wogan likkiyaappe aattidi miyoonne uyiyo, qassi hombbociya muuziqan duriyo meezee deꞌees. Mooguwaa wogaa keehi xoqqu oottidi xeelliyo gishshau, manqqo keettaa asaykka metuwaaninne acuwan yeggiyaaba gidikkokka, “bessiyaagaadan mooganau” koyidi darotoo hegau gidiya miishshaa demmanau keehi baaxetees.

Yihoowa Markkati aadhida wodetu ubban Geeshsha Maxaafaara phalqqettiya mooguwaa wogaa aynne ashshennan qonccissidosona. Hegaa mala meezetuppe ahaa naagiyoogee, ushshaa gussiyoogee, hayqqida ura haasayissiyoogeenne issibaa oychiyoogee, moogo gallassaa layttan layttan bonchiyo siraataynne issi uri hayqqiyo wode a giddon deꞌiya issibay paxa deꞌees giyo ammanuwaara gayttida hara meezee deꞌees.a Xoossaa bonchissenna hegaa mala meezee ‘tunaba,’ qassi Xoossaa Qaalaa tuman gidennan, “asappe yiida eratettan” baasettida ‘mela cimo.’—Isi. 52:11; Qol. 2:8.

Wogaa Kaallanaadan Gakkiya Sugettaa

Issotu issotussi, ubba qassi hayqqidaageeta bonchiyoogaa keehi koshshiyaabadan xeelliyo biittan deꞌiyaageetussi, asa woga gidida meeziyaappe haakkiyoogee keehi metiyaaba. Yihoowa Markkati hegaa mala meeziyaa kaallenna gishshau, asay eta hanotaa sirees woykko eti issippetettan deꞌiyoogaa ixxoosona woy hayqqidaageeta bonchokkona giidi mootees. Issoti issoti Geeshsha Maxaafaa tumaa loytti eriyaaba gidikkokka, asaa baceessoynne sugettay haratuppe dummatanau yayyanaadan oottiis. (1 PHe. 3:14) Harati ha meezeti bantta woga gidiyo gishshau, eta muleera aggana danddayennabadan qoppidosona. Harati qassi wogaa kaallennaagee asay Xoossaa asaa gaasoy baynnan ixxanaadan oottees giidi qoppidosona.

Harata hanqqetissanau koyokko. Gidikkokka, tumaa minttidi oyqqiyoogee Xoossaappe haakkida alamee nuna ixxanaadan oottiyoogaa Geeshsha Maxaafay akeekissees. (Yoh. 15:18, 19; 2 Xim. 3:12; 1 Yoh. 5:19) Nuuni ayyaanaaban xuman deꞌiyaageetuppe dummatana bessiyoogaa eriyo gishshau, nu dosan hegaadan oottoos. (Mil. 3:18; Gal. 6:12) Xoossaa ufayssennabaa oottanaadan Seexaanay paaccido wode Yesuusi eqettidoogaadan, nuunikka Xoossaa ufayssennabaa oottanaadan gakkiya sugettaa eqettoos. (Maa. 4:3-7) Tumu Kiristtaaneti asassi yayyiyoogaappe, eta qofissiya waannabay Xoossaa Yihoowa ufayssiyoogaanne tumatettaa Xoossaa gidiyoogaadan a bonchiyoogaa. Eti haratu sugettan Geeshsha Maxaafan deꞌiya tumu goynuwaa maaraa kanttennan aggiyoogan hegaadan oottoosona.—Lee. 29:25; Oos. 5:29.

Hayqqidaageeta Bessiyaagaadan Xeelliyoogan Yihoowa Bonchiyoogaa

Nuuni siiqiyo uri hayqqiyo wode keehi mishettiyoogeenne azzaniyoogee wottin deꞌiyaaba. (Yoh. 11:33, 35) Nuuni siiqiyo hayqqida uraara gayttidabata hassayiyoogeenne boncho hanotan moogiyoogee nu siiquwaa qonccissiyo bessiya oge. Gidoppe attin, Yihoowa Markkati Xoossaa ufayssenna meeziyaa kaallennan, hayqoy gattiyo wolqqaama azzanuwan genccoosona. Hegaadan oottiyoogee hayqqidaageetussi keehi yayyiyo wogan diccidaageeta metiyaaba. Nuuni keehi siiqiyo uri hayqqin azzaniyo wode, bessiyaabaa oottanaagee paace gidana danddayees. Gidikkokka, “minttetto ubbaa Xoossaa” Yihooway ammanettida Kiristtaaneta minttees; qassi Kiristtaane laggeti immiyo maaduwan eti goꞌettoosona. (2 Qor. 1:3, 4) Xoossay hassayiyo, hayqqidi aybanne erennaageeti issi gallassi zaarettidi deꞌanaagaa mintti ammaniyoogee, tumu Kiristtaaneti dendduwaa hidootaara phalqqettiya, Xoossaa ufayssenna moogo wogaappe haakkanau mino gaaso gidees.

Yihooway nuna “xumaappe garamissiya ba poo7uwau” xeesidoogan keehi ufayttokkonii? (1 PHe. 2:9) Naꞌi yelettiyoogan ufayttiyo wodenne hayquwaa azzanuwaa danddayiyo wode, suurebaa oottanau mintti koyiyoogaaninne Xoossaa Yihoowa wozanappe siiqiyoogan nuuni ubbatoo “poo7uwan de7iya asaadan poo7uwan” hemettiyaageeta gidoos. Xoossaa ufayssenna meeziyan mule hambbalaashettennaadan nu huuphiyaa naagiyaageeta gidoos.—Efi. 5:8.

[Tohossa qofata]