‘Xoossaa Siiquwan Deꞌa’

“Nu Godai Yesuus Kiristtoosi ba maarotettan intteyyo immana merinaa de7uwaa naagiiddi, intte huuphiyaa Xoossaa siiquwan wottite.”—YIHUDAA 21.

1, 2. Yihooway nuna siiqiyoogaa waatidi bessidee? Nuuni koyidobaa oottanau dooridi a siiquwan deꞌana danddayennaagaa waatidi eriyoo?

XOOSSAA YIHOOWAY zawi baynna ogetun ba siiquwaa nuussi qonccissiis. Gidoppe attin, Yihooway siiquwaa bessido oge ubbaappe aadhiyaagee, wozuwaa yarshshuwaa giigissuwaa gidiyoogee sirissenna. Yihooway asaa naata keehippe siiqiyo gishshau, nu gishshau hayqqanaadan ba siiqiyo Naꞌaa ha saꞌaa kiittiis. (Yohaannisa 3:16) Yihooway hegaa oottidoy nuuni merinau deꞌanaadan koyiyo gishshataassa; qassi nuuni a siiquwaappe merinau goꞌettanaadan koyees!

² Gidoppe attin, nuuni ay oottanau doorikkonne Yihooway nuuni a siiquwan deꞌanaadan oottees giyoogee? Yihudaa paydo 21n: “Nu Godai Yesuus Kiristtoosi ba maarotettan intteyyo immana merinaa de7uwaa naagiiddi, intte huuphiyaa Xoossaa siiquwan wottite” yaagiya zoree deꞌiyo gishshau, chii hegaadaana gidenna. “Intte huuphiyaa Xoossaa siiquwan wottite” giyaagee, nuuni oottana koshshiyaabay deꞌiyoogaa qonccissees. Yaatin, nuuni Xoossaa siiquwan deꞌanau ay oottana koshshii?

Nuuni Xoossaa Siiquwan Waanidi Deꞌana Danddayiyoo?

3. Ba Aawaa siiquwan deꞌanau i ay oottiyoogee keehippe koshshiyoogaa Yesuusi yootidee?

³ Yesuusi ha saꞌan deꞌido wurssetta qammi haasayidobaappe ha oyshaa zaaruwaa demmoos. I: “Taani ta Aawaa azazuwaa naagada a siiquwan de7idoogaadan, inttekka ta azazuwaa naagikko, ta siiquwan de7ana” yaagiis. (Yohaannisa 15:10) Ha xiqisee bessiyoogaadan, Yihoowan sabettanau a azazuwaa naagiyoogee keehippe koshshiyoogaa Yesuusi akeekiis. Yaatin, polo gidida Xoossaa Naꞌay hegaadan oottana koshshikko, nuuni shin hegaadan oottana koshshennee?

4, 5. (a) Nuuni Yihoowa siiqiyoogaa bessana danddayiyo waanna ogee aybee? (b) Yihoowa azazuwaa azazettennan ixxanau nuussi gaasoy baynnay aybissee?

⁴ Nuuni Yihoowa siiqiyoogaa bessiyo waannatiya ogee a azazuwaa naagiyoogaa. Kiitettida Yohaannisi: “Nuuni Xoossaa siiqiyoogee a azazuwaa naagiyoogaa; a azazoikka deexo gidenna” yaagidi hegaa qonccissiis. (1 Yohaannisa 5:3) Ha wodiyan daro asay azazettiyoogaa dosenna. Gidikkonne, “A azazoikka deexo gidenna” yaagiyaagaa akeeka. Yihooway nuuni oottana danddayennabaa oottanaadan oychenna.

⁵ Leemisuwau: Neessi mata lagge gidida issi ura i tookkanau danddayennabaa tookkanaadan oychuutii? Oychennaagee qoncce! Yihooway nuuppe aadhida keha; qassi nu abbiyaa loyttidi akeekees. Yihooway ‘nuuni biitta gidiyoogaa akeekiyoogaa’ Geeshsha Maxaafay yootees. (Mazamure 103:14) I nuuni danddayennabaa oottanaadan mule oychenna. Yaatiyo gishshau, nuuni Yihoowa azazuwaa azazettennan ixxiyo gaasoy baawa. Hara baggaara, nuuni Yihoowassi azazettiyoogee, saluwan deꞌiya nu Aawaa wozanappe siiqiyoogaanne a siiquwan deꞌanau koyiyoogaa bessiyo loꞌꞌo injje gidiyoogaa akeekoos.

Yihooway Immido Dumma Imotaa

6, 7. (a) Zoriya wozanay aybee? (b) Nuuni Xoossaa siiquwan deꞌanau zoriya wozanay waatidi maaddana danddayiyaakko leemisuwan yoota.

⁶ Nuuni deꞌiyo muttumurettida alamiyan, Xoossau azazettiyoogaa bessiyo darobaa kuuyanau koshshees. He kuushshati Xoossaa sheniyaara moggottiyoogaa waatidi erana danddayiyoo? Azazettiyoogaa xeelliyaagan nuna keehippe maaddana danddayiya imotaa Yihooway nuussi immiis. Hegee zoriya wozanaa. Zoriya wozanay aybee? Ba huuphiyaa eriyo dumma abbiyaa. I nu giddon deꞌiya daanna mala; nuuni deꞌuwan dooriyoobata akeekanaadan woykko nuuni oottidobay loꞌꞌokko iitakko woy likkekko balakko yiggi xeellanaadan danddayissiyaaba.—Roome 2:14, 15 nabbaba.

⁷ Nuuni zoriya wozanaa waatidi loytti goꞌettana danddayiyoo? Issi leemisuwaa akeeka. Issisaa biya issi uri battaale bazzuwan hemettees. Baaburiyaa ogee woy hara ogeekka baawa; woykko ginaa malaatiyaabikka baawa. Gidikkokka, ba biyoosaa gakkanau yaa haa geennan sitti giidi bees. Waanidi? Ayyo komppaase giyo miishshi deꞌees. Komppaasee maagineetiyaappe merettida marppe malabaynne xaafettida malaatay deꞌiyo, darotoo huuphessa bagga malaatiyaaba. Komppaasee baynnaakko he bitanee bayi attana. Hegaadankka, zoriya wozanay baynnaakko, asay ba deꞌuwan likke, loꞌꞌonne geeshsha dooruwaa dooranau metootana.

8, 9. (a) Nu zoriya wozanay suure oottennaadan diggiyaabaa aybaa nuuni hassayana koshshii? (b) Nu zoriya wozanay tumuppe goꞌꞌiyaagaa gidanaadan ay oottana danddayiyoo?

⁸ Gidikkonne, komppaasiyaagaadan zoriya wozanaykka suure oottenna wodee deꞌees. He bitanee ba komppaasiyaa matan maagineetiyaa wottikko, huuphessa bagga malaatiya marppee harasaa malaatana danddayees. Hegaadankka, nu wozanaa amoy sugin issibaa kuuyikko, hananabay aybee? Nu huuphiyaa siiqiyoogee nu zoriya wozanay nuna balabau kaalettanaadan oottana danddayees. Geeshsha Maxaafay “wozani ubbabaappe aadhdhi cimmiyaabaanne keehi daro iita” yaagidi akeekissees. (Ermmaasa 17:9; Leemisuwaa 4:23) Hegaa bollikka, he bitaniyau ammanttiya loꞌꞌo karttay baynnaba gidikko, komppaasee a darin maaddenna. Hegaadankka, suurenne laamettenna Xoossaa Qaalaa, Geeshsha Maxaafaa kaaletuwan ammanettana xayikko, nu zoriya wozanay nuna aybanne maaddenna. (Mazamure 119:105) Ha alamiyan daro asay wozanaa koshshau xoqqa sohuwaa immidi, Xoossaa Qaalan deꞌiya maara xaasayi xeelliyoogee woy aggi bayiyoogee keehippe azzanttiyaabaa. (Efisoona 4:17-19 nabbaba.) Etau zoriya wozanay deꞌiyaaba gidikkonne, daro asay iitabaa oottiyoy hegaassa.—1 Ximootiyoosa 4:2.

⁹ Nuuni mule hegaadan hanennaadan murttana koshshees! Hegaappe, nu zoriya wozanay tumuppe maaddiyaagaa gidana mala ubbatoo Xoossaa Qaalan a loohissiyaageeta gidoos. Nu huuphiyaa siiqiyo koshshaa kaalliyoogaappe Geeshsha Maxaafan loohida nu zoriya wozanaa ezggana koshshees. Hegaadankka, nu Kiristtaane ishatunne michetu zoriya wozanaakka bonchanau baaxetana koshshees. Nuugaappe dumma hanotan nu ishatu zoriya wozanay issi issibaa oottennaadan diggana danddayiyoogaa akeekidi, eta xubbiyaabaa oottennaadan nuuyyo danddayettidabaa ubbaa oottanau baaxetoos.—1 Qoronttoosa 8:12; 2 Qoronttoosa 4:2; 1 PHeexiroosa 3:16.

10. Haꞌꞌi nuuni tobbana deꞌo macarati heezzati awugeetee?

¹⁰ Nuuni azazettiyoogan Yihoowa siiqiyoogaa bessana danddayiyo deꞌo macarata heezzata ane beꞌoos. He hanotatu ubban zoriya wozanay oottiyoobi deꞌiyoogee qoncce; shin zoriya wozanay nuna bessiya ogiyan kaalettanaadan Geeshsha Maxaafan deꞌiya kandduwaa maaran loohidaagaa gidana koshshees. Nuuni Yihoowayyo siiquwan azazettana danddayiyo heezzu ogeti kaallidi deꞌiyaageeta: (1) Nuuni Yihooway siiqiyoogeeta siiqoos, (2) aawatettaa maataa bonchoosinne (3) Xoossaa sinttan geeshsha gididi deꞌanau baaxetoos.

Yihooway Siiqiyoogeeta Siiqa

11. Yihooway siiqiyoogeeta nuuni siiqana koshshiyoy aybissee?

¹¹ Koyruwan, nuuni Yihooway siiqiyoogeeta siiqana bessees. Laggetettaara gayttidaagan, nuuni puuttuwaagaadan nu heeran deꞌiyaabaa aybanne oyqqoos. Laggetettay polo gidenna asaa naata waatidi qohana woykko waatidi maaddana danddayiyaakko nuna Medhidaagee loyttidi erees. Hegaa gishshau, i nuussi: “Aadhdhida eranchcha asatuura hemettiya asi aadhdhida eranchcha gidees; shin eeyya asatuura hemettiya asi metuwan gelees” yaagiya loꞌꞌo zoriyaa immiis. (Leemiso 13:20; 1 Qoronttoosa 15:33) Nuuppe ooninne ‘metuwan gelana’ koyiyay baawa. Nuuni ubbaykka “aadhdhida eranchcha” gidanau koyoos. Yihoowa aadhida eratettau zawi baynna gishshau, i bau deꞌiyaagaa bolli aadhida eratettaa gujjana danddayenna. Hara baggaara qassi ayba laggetettaynne a moorana danddayenna. Gidikkonne, laggetettaa xeelliyaagan i nuuyyo loꞌꞌo leemiso gidees. Yihooway ba lagge gidanaadan oona dooriyaakko ane issi kutti qoppa.

12. Yihooway ay mala dabbota doorii?

¹² Yihooway beni wode deꞌida Abrahaama “ta dabbuwaa” yaagiis. (Isiyaasa 41:8) Abrahaami ammanuwan, geeshshatettaaninne azazettiyoogan loꞌꞌo leemiso—i ammanuwan erettida asa. (Yaaqoobaa 2:21-23) Yihooway ba dabbo oottiyoy hegaa mala asa. I ha wodiyankka hegaa mala dabbota doorees. Yihooway hegaa mala dabbota dooriyaaba gidikko, aadhida eranchatuura hemettiyoogan aadhida erancha gidanau nuunikka hegaadan akeekan dooriyoogee koshshiyaaba gidennee?

13. Nuuni laggeta dooriyo wode, loꞌꞌo dooruwaa dooranaadan aybi maaddana danddayii?

¹³ Hegaa xeelliyaagan loꞌꞌo dooruwaa dooranaadan nena aybi maaddana danddayii? Geeshsha Maxaafan deꞌiya asatu leemisuwaa xannaꞌiyoogee hegau denttettana danddayees. Urutinne i bollotee Naꞌoomi giddon, Daawitanne Yonaataana giddon woykko Ximootiyoosanne PHauloosa giddon deꞌiya laggetettaabaa qoppa. (Uruto 1:16, 17; 1 Sameela 23:16-18; Piliphphisiyuusa 2:19-22) Eti mata lagge gidanaadan oottida ubbaappe aadhiyaabay, eta laggetettay baasettidoy Yihoowa wozanappe siiqiyoogaana gidiyoogaa. Neegaadan Yihoowa siiqiya laggeta demmana danddayay? Gubaꞌiyan hegaa mala daro laggeta demmana danddayiyoogaa ammanetta. Hegaa mala laggeti neeni ayyaanaaban metuwan gelanaadan oottokkona. Yaatiyoogaappe, neeni Yihoowau azazettanaadan, ayyaanaaban dichaa bessanaadaaninne ayyaanan zeranaadan maaddana. (Galaatiyaa 6:7, 8 nabbaba.) Neeni Xoossaa siiquwan deꞌanaadan eti maaddana.

Aawatettaa Maataa Boncha

14. Aawatettaa maataa bonchiyoogee nuussi darotoo deexxanaadan oottiyaabati aybee?

¹⁴ Nuuni Yihoowa siiqiyoogaa bessiyo naaꞌꞌantto ogee aawatettaa maataara gayttidaba. Nuuni aawatettaa maataa bonchana bessees. Hegaa oottiyoogee issi issitoo keehippe deexxiyoy aybissee? Issi gaasoy, aawatettaa maatay deꞌiyoogeeti polo asa gidennaagaa. Hegaa bolli, nuunikka polo asa gidokko. Nuuni yeletan laattido makkaliyo koshshaara baaxetoos.

15, 16. (a) Yihooway ba asau koshshiyaabaa kunttanaadan maataa immidoogeeta nuuni bonchiyoogee keehippe koshshiyoy aybissee? (b) Isaaꞌeeleti Muuse bolli makkalidoogaa Yihooway xeellido ogiyaappe ayba goꞌꞌiya timirtte demmiyoo?

¹⁵ Yaatiyo gishshau, ‘aawatettaa maataa bonchiyoogee keehippe deexxiyaabaa gidikko, nuuni hegaadan oottana koshshiyoy aybissee?’ gaada qoppana danddayaasa. Hegaa zaaroy ubbabaa haariyo maataa xeelliyaagan denddida oyshaara gayttidaagaa. Ubbaappe bollaara nena haaranaadan oona doorutii? Ubbaappe bollaara haaranaadan nuuni Yihoowa dooriyaaba gidikko, a maataa bonchana koshshees. Nuuni hegaadan oottana xayikko, i nuna Haariyaagaa tumuppe gaana danddayiyoo? Hegaa bollikka, Yihooway darotoo ba asaassi koshshiyaabaa kunttanaadan aawatettaa immido, polo gidenna asatu baggaara ba aawatettaa goꞌettees. Nuuni he asatu bolli makkaliyaaba gidikko, he hanotaa Yihooway waatidi xeellii?—1 Tasalonqqe 5:12, 13 nabbaba.

¹⁶ Leemisuwau, Israaꞌeeleti Muuse bolli zuuzummidonne makkalido wode, Yihooway eti ba bolli makkalidoogaadan xeelliis. (Qoodaabaa 14:26, 27) Xoossay laamettibeenna. I aawatettaa maataa immidoogeetu bolli nuuni makkaliyaaba gidikko, hegee a bolli makkaliyoogaa!

17. Gubaaꞌiyan aawatettaa maatay deꞌiyoogeeta ayba bessiya ogiyan xeellanau baaxetana koshshii?

¹⁷ Kiristtaane gubaaꞌiyan aawatettaa maatay deꞌiyoogeeta xeellana bessiya ogiyaa kiitettida PHauloosi qonccissiis. I: “Inttena kaalettiyaageetuyyo azazettite; qassi eti azaziyoogaakka oottite. Eti bantta oottidobaa Xoossau yootana gishshau, intte shemppuwaa mintti naagoosona; intte etau azazettikko, bantta oosuwaa ufaittidi oottana; hegee xayikko, eti yiillotiiddi oottana; hegee inttena ainne maaddenna” yaagidi xaafiis. (Ibraawe 13:17) Hegaadan azazettiyoonne haarettiyo koshshay nuussi deꞌanaadan keehippe baaxetana koshshiyoogee tuma. Gidikkokka, nuuni Xoossaa siiquwan deꞌanau baaxetiyoogaa hassaya. He hoollee nuuyyo danddayettiyaabaa ubbaa oottana koshshiyo hoolle gidennee?

Yihoowa Sinttan Geeshsha Gidada Deꞌa

18. Nuuni geeshsha gidanaadan Yihooway koyiyoy aybissee?

¹⁸ Nuuni Yihoowa siiqiyoogaa bessiyo heezzantto ogee a sinttan geeshsha gididi deꞌanau baaxetiyoogaa. Yelidaageeti darotoo bantta naati geeshsha gididi deꞌanaadan baaxetoosona. Aybissi? Issi gaasoy, geeshshatettay naꞌaa payyatettaunne ufayssau keehippe koshshiyaaba. Hegaa bollikka, naꞌaa geeshshatettay yelidaageeti a siiqiyoogaanne loyttidi oyqqidoogaa qonccissiyo gishshau, eta bonchissees. Hegaara issi mala gaasuwan, Yihooway nuuni geeshsha gidanaadan koyees. Geeshshatettay nu ufayssaunne payyatettau keehippe koshshiyoogaa i erees. Nu geeshshatettay a, saluwan deꞌiya nu Aawaa bonchissiyoogaakka erees. Nuuni ha moorettida alamiyan deꞌiyaageetuppe dummatiyoogaa akeekiyoogaappe denddidaagan, asay nuuni goynniyo Xoossaakko shiiqana danddayiyo gishshau, hegee keehippe koshshiyaaba.

19. Asatettaa geeshshatettay keehippe koshshiyoogaa waatidi eriyoo?

¹⁹ Nuuni ayba ogetun geeshsha gididi deꞌana koshshii? Ubba ogiyan gidana koshshiyoogee tuma. Beni Israaꞌeele biittan, asatettaa geeshshatettay ba asaassi keehippe koshshiyoogaa Yihooway qonccissiis. (Wogaabaa 15:31) Muuse Higgee, sheeshsha utettaa kammiyoogaa, goꞌettiyo miishshata meecciyoogaanne kushiyaanne tohuwaa meecettiyoogaanne maayuwaa meecciyoogaa malatiyaabata gujjees. (Kessaabaa 30:17-21; Wogaabaa 11:32; Qoodaabaa 19:17-20; Zaarettido Wogaa 23:13, 14) Eta Xoossay Yihooway geeshshaa woykko xillo gidiyoogaa Israaꞌeeleti hassayanaadan odettiis. Geeshsha Xoossau oottiyaageetikka geeshsha gidanau koshshees.—Wogaabaa 11:44, 45 nabbaba.

20. Nuuni geeshsha gididi deꞌanau koshshiyoy ayba ogetuunee?

²⁰ Yaatiyo gishshau, nuuyyo asatettaaynne wozanay geeshsha gidana koshshees. Nu qofay geeshsha gidanaadan baaxetoos. Nu yuushuwan deꞌiya alamee asho gaytotettaa xeelliyaagan moorettidaagaa gidikkonne, Yihooway kandduwaa geeshshatettau kessido maaraa wozanappe kaalloos. Aybippenne aaruwan, worddo haymaanootiyan ayba ogiyaaninne hambbalaashettiyoogaappe haakkiyoogan nu goynoy geeshsha gidanaadan koyoos. Isiyaasa 52:11n ayyaanay denttettin xaafettida: “Kichchite, kichchite; yaappe kiyite. Tunabaa bochchoppite; a giddoppe kiyiichchite. Intte huuphiyaukka geeyite” yaagiya akeekissuwaa ubbatoo hassayoos. Ha wodiyan, saluwan deꞌiya nu Aaway haymaanootiyaara gayttidaagan tunabaadan xeelliyoobaa bochennan aggiyoogan ayyaanaaban geeshsha gididi deꞌoos. Leemisuwau, ha wodiyan keehi erettida worddo haymaanootiyaa baalatuppe nuuni haakkiyoogee hegaassa. Geeshsha gididi deꞌiyoogee deexxiyaaba gidiyoogee tuma. SHin Xoossaa siiquwan deꞌanau geeshsha gididi deꞌiyoogee eta maaddiyo gishshau, Yihoowa asay hegaadan oottanau baaxetees.

21. Nuuni Xoossaa siiquwan deꞌana danddayiyoogaa erana danddayiyoy ayba ogiyaanee?

²¹ Yihooway nuuni merinau a siiquwan deꞌanaadan koyees. SHin nuuni ubbay Xoossaa siiquwan deꞌanau nuuyyo danddayettida ubbabaa oottana koshshees. Nuuni hegaadan oottana danddayiyoy, Yesuusa leemisuwaa kaalliyoogaananne Yihoowa siiqiyoogaa bessanau A azazota naagiyoogaana. Nuuni hegaadan oottiyaaba gidikko, aybinne “Kiristtoos Yesuusan de7iya Xoossaa siiquwaappe nuna shaakkanau danddayennaagaa” ammanettana danddayoos.—Roome 8:38, 39.

Hassayay?

• Xoossaa siiquwan deꞌanaadan nu zoriya wozanay nuna maaddana danddayiyoy ayba ogiyaanee?

• Yihooway siiqiyoogeeta nuuni siiqana koshshiyoy aybissee?

• Aawatettaa maataa bonchiyoogee keehippe koshshiyoy aybissee?

• Xoossaa asau geeshshatettay keehippe koshshiyoy aybissee?

[Sinttaa 27n diya misiliyaa]

Loꞌꞌo Eeshshaa Minttettiya Xuufiyaa

‘Xoossaa Siiquwan Deꞌa’ giya, 224 sinttay deꞌiyo maxaafay, 2008/2009 awuraajjaa shiiquwaa wode kiyiis. Ha ooratta maxaafay giigido halchoy aybee? He maxaafay Kiristtaane eeshshau waanna sohuwaa immidi, Kiristtaaneti Yihoowa maarata eranaadaaninne siiqanaadan maaddanau giigiis. ‘Xoossaa Siiquwan Deꞌa’ giya maxaafaa loyttidi xannaꞌiyoogee, Yihoowa maaratuura moggottidi deꞌiyoogee ha wodiyan deꞌo oge ubbaappe aadhiyoogaunne sinttappe merinaa deꞌuwaa demissiyoogau deꞌiya nu ammanoy minnanaadan oottees.

Hegaappekka aaruwan, ha maxaafay Yihoowassi azazettiyoogee deexxennaagaa nuuni akeekanaadan maaddanau giigiis. Ubba Yihoowau azazettiyoogee, nuuni a ay keena siiqiyaakko bessiyo oge. Yaatiyo gishshau, ha maxaafay ‘Taani Yihoowayyo azazettiyoy aybissee?’ giidi nuna oychanaadan denttettees.

Issoti issoti Yihoowa siiquwaappe kiyiyo azzanttiya bala baliyo wode, darotoo metoy baaso timirttetuura gayttidaba gidennan, kandduwaara gayttidaba. Hegaa gishshau, galla galla nu deꞌuwan nuna kaalettiya Yihoowa higgiyaanne baaso siraataa minttidi siiqiyoogeenne nashshiyoogee ay keena koshshiyaabee! Ha ooratta xuufee, alame yuushuwan deꞌiya Yihoowa dorssati loꞌꞌo gididabaa mintti oyqqanaadan, Seexaanay worddancha gidiyoogaa bessanaadaaninne ubbaappe aaruwan Xoossaa siiquwan deꞌanaadan maaddanaagaa ammanettoos!—Yihudaa 21.

[Sinttaa 25n deꞌiya misiliyaa]

“Taani ta Aawaa azazuwaa naagadaa siiquwan de7idoogaadan, inttekka ta azazuwaa naagikko, ta siiquwan de7ana”