Alame Yuushuwan Deꞌiya Metoy, Alame Yuushuwan Giigiyo Ogiyaa

METOTIIDDI deꞌiya asaa, daroti qarettidi maaddoosona. Leemisuwau, aakimeti sahettida woykko daafay gakkido asaa maaddanau hosppitaaliyan daro saatiyaa oottoosona. Tamay gattiyo daafaa teqqiyaageeti, poliseti, higgiyaa kessiyaageetinne daafaappe ashshiyaageeti haratu metoy darennaadan woykko eta metoy gakkennaadan oottanau baaxetoosona. Hegaa mala oosoy asaa buzo xekkan daro maaddees; shin ooninne woykko ayba dirijjiteenne tuggaa alamiyaappe muleera xayssana danddayenna. Hegaappe dumma ogiyan, Xoossay alame yuushuwan hegaa giigissana danddayeesinne koyees.

Geeshsha Maxaafan wurssetta maxaafay, “Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna. Aissi giikko, ceegabai xayiis” yaagidi ammanttiyaabaa yootees. (Ajjuutaa 21:4) He hidootay ay keena aahobaa gujjiyaakko qoppa. Xoossay tugga ubbaa xayssanau halchidobaa hegee qanttan qonccissees. I hegaadan oottanay olaa, namisaa, harggiyaa, pirdda pacaanne iita asata ubbaa saꞌaappe xayssiyoogaana. Ay asinne hegaa polana danddayenna.

Xoossaa Kawotettay Oottanabaa

Xoossay salo gufanttuwaaninne saꞌa micettan baappe kaalliya, keehippe wolqqaama gidida, hayquwaappe denddida Yesuus Kiristtoosa baggaara ba gelido qaalaa polana. Yesuusi ooninne eqettennan kumetta saꞌan Kawo gididi haarana wodee matiis. Hegaappe simmin, kawo, prezddantte woykko polotika asa gididi asi asa haarenna. Hegaappe, eta issi Kawoynne issi kawotettay, giishin Xoossaa Kawotettay haarana.

He Kawotettay asaa haaro ubbaa xayssana. Geeshsha Maxaafay daro wodeppe kase: “Saluwaa Xoossai mulekka kunddenna, hara asaukka imettenna kawotettaa essana. He eqqida kawotettai he kawotettata ubbaa gaaceretti xaissana; shin i merinau eqqidi daana” yaagiis. (Daaneela 2:44) Kumetta saꞌan deꞌiya asay xillotettan haariya Xoossaa Kawotettaa garssan issippetettan deꞌana.

Yesuusi saꞌan deꞌido wode, he Kawotettaabaa darotoo yootiis. Yesuusi ba erissiyo ashkkarati kaallana bessiyo leemisodan goꞌettido woosan: “Ne kawotettai yo; ne shenee saluwan hanidoogaadan, sa7ankka hano” yaagidi woossanaadan tamaarissiis. (Maatiyoosa 6:10) Xoossaa Kawotettay Xoossaa shenee saꞌan haniyoogaara gayttidaagaa gidiyoogaa Yesuusi yootidoogaa akeeka; qassi kumetta saꞌaappe Xoossay tuggaa xayssanau koyees.

Asaa kawotettay aynne ehaana danddayenna anjjuwaa, xillotettan ayssiya Xoossaa haaroy ehaana. Asaa naati merinaa deꞌuwaa demmana mala Yihooway ba Naꞌay wozo gidanaadan immidoogaa hassaya. Asau koshshiyaabaa kunttiya Xoossaa Kawotettaa haaruwan asay polo gidana. Wurssettan aybi hananee? “Haiquwaa [Yihooway] merinau mittana; Ubbaa Haariya GODAI aife ubbaappe afuttaa quccana.”—Isiyaasa 25:8.

Issoti issoti: ‘Xoossay tuggaa ayssi xayssibeennee? I tuggaa xayssennan takkidoy aybissee?’ giidi oychana danddayoosona. Yihooway daro wodiyaappe kase tugga ubbaa xayssanau, ubba qassi gakkennaadan oottanau danddayees. Hegaappe, i bana siiqiyo gishsha gidennan, saꞌan deꞌiya ba naati merinau goꞌettanaadan koyidi, tuggay deꞌanaadan paqqadiis. Siiqiya yelidaageeti, bantta naꞌay wodeppe goꞌettanaagaa eriyaaba gidikko, naꞌaa bolli metoy gakkanaadan paqqadoosona. Hegaadankka, asaa naati amarida wodiyau tuggatanaadan Yihooway paqqadido bessiya gaasoy deꞌees; Geeshsha Maxaafay he gaasota qonccissees. Hegeeti koyidoogaa dooriyo maataa, nagaraa, Yihoowa haaroy suure gidiyoogaa xeelliyaagan denddida oyshaa mala yohotuura gayttidaageeta. Issi iita ayyaana meretay alamiyaa amarida wodiyau haaranaadan Xoossay paqqadidoogaakka Geeshsha Maxaafay yootees.a

Ha ubbabaa qonccissanau sohoy gidennaba gidikkokka, nuuni hidootaanne minttettuwaa demmana danddayiyo naaꞌꞌu yohoti deꞌoosona. Koyroy: Yihooway nuna gakkida tuggaa dogissiyaabaappekka aadhiyaabaa oottiyoogaa. Hegaa bollikka Xoossay: “Kasebai ubbai hassayettennanne qofettenna” yaagidi nuna minttettees. (Isiyaasa 65:17) Iitabaa amarida wodiyau paqqadidoogee gattido azzanuwaanne tuggaa Xoossay merinau muleera xayssana.

Naaꞌꞌanttoy: Xoossay tuggaa xayssanau laamettenna wodiyaa keeridoogaa. Hananabaa yootiya Imbbaaqoomi, makkalaanne ooshshaa Yihooway awude gakkanaashin coꞌꞌu giidi danddayanaakko oychidoogaa hassaya. Yihooway: “Ajjuutan beettidabai ba keerettida wodiyaa naagees. . . . Gam77enna” yaagidi zaariis. (Imbbaaqooma 2:3) Nuuni kaalliya huuphe yohuwan beꞌanaagaadan, he ‘keerettida wodee’ matattiis.

[Tohossa qofata]

[Sinttaa 7n deꞌiya misiliyaa]

Ufayssiya Wodee Yaanaagaa Yootiya Xiqiseta

OLI DEꞌENNA:

“Haa yiite; GODAA oosuwaa xeellite; i sa7an oottido garamissiya malaataa be7ite. I sa7aa gaxaa gakkanaassi de7iya olaa teqqees.” —Mazamure 46:8, 9.

SIIQIYOOGEETI HAYQUWAAPPE DENDDANA:

“Asai ubbai, worddoikka xilloikka haiquwaappe denddana.”—Oosuwaa 24:15.

ASA UBBAU GIDIYA QUMAY DEꞌANA:

“Biittan daro kattai mokko; dereti kattan kamettona. Biittay Liibaanoosa deree mokkiyoogaadan kattaa mokko; maatai dembbaa kumiyoogaadan asai katamaa kumo.” —Mazamure 72:16.

HARGGEE DEꞌENNA:

“Ooninne, ‘Taani harggais’ yaagenna.” —Isiyaasa 33:24.

IITA ASAY XAYANA:

“Iitati biittaappe xoqollettana; ammanttennaageetikka shodettidi xayana.”—Leemiso 2:22.

SUURE PIRDDAY AAKKANA:

“Be7ite, kawoi xillotettan kawotana; haariyaageetikka suuretettan haarana.”—Isiyaasa 32:1.

[Sinttaa 7n deꞌiya misiliyaa]

Xoossaa Kawotettay ha wodiyan nu bolli gakkiya tugga ubbaa xayssana