“Ayyaanaa Bisuwaa” Hiillan Goꞌettite

“Geeshsha Ayyaanaa bisuwaa, Xoossaa qaalaa, oiqqite.”—EFISOONA 6:17.

1, 2. Kawotettaabaa yootiya daro asaa koshshiyo gishshau nu zaaroy ay gidana koshshii?

YESUUSI asau ayyaanaaban koshshiyaabaa akeekidi, ba erissiyo ashkkarata: “Kattai daro; shin cakkiya asai guutta. Simmi kattaa Godai kattaa cakkanau oosanchcha yeddana mala, a woossite” yaagiis. Yesuusi hegaadan giidi aggiigibeenna. Yesuusi hegaadan gi simmidi, “tammanne naa77⁠u erissiyo ashkkarata xeesidi,” sabbakanaadan woykko ‘cakkanaadan’ kiittiis. (Maatiyoosa 9:35-38; 10:1, 5) Takkidi, Yesuusi “hara laappun tammu asata dooriis. Etappe naa77aa naa77aa” hegaa mala oosuwau kiittiis.—Luqaasa 10:1, 2.

² Ha wodiyankka Kawotettaabaa yootiya daro asaa koshshees. Alame yuushuwan, 2009 haggaazo layttan Kiristtoosa Hayquwaa Hassayiyo Baalan shiiqida asaa qooday 18, 164,539. He qooday Yihoowa Markkatu qoodaappe 10 miilooneppe dariyaagaa aadhees. Kattay cahaa bessiis. (Yohaannisa 4:34, 35) Hegaa gishshau, daro oosancha yeddana mala nuuni woossana koshshees. SHin he woosaara moggiya ogiyan waanidi deꞌana danddayiyoo? Kawotettaabaa sabbakiyoonne erissiyo ashkkara oottiyo oosuwaa mishettidi oottiyo wode, keehippe murutiyoogan hegaadan oottana danddayoos.—Maatiyoosa 28:19, 20; Marqqoosa 13:10.

3. Nuuni haggaazuwan keehi murutanaadan Xoossaa ayyaanay keehippe maaddiyoy ayba ogiyaanee?

³ Aadhida huuphe yohuwan, Xoossaa ayyaanaa kaaletuwaa kaalliyoogee “Xoossaa qaalaa xalan” yootanau waati maaddiyaakko beꞌida. (Oosuwaa 4:31) He ayyaanay nuuni haggaazuwan hiillancha gidanaadankka maaddana danddayees. Nuuni haggaazuwan murutanaadan maaddiya issibay, Xoossaa Yihooway immido muruta miishshaa, a Qaalaa, Geeshsha Maxaafaa loytti goꞌettiyoogaa. I xaafettidoy geeshsha ayyaanaana. (2 Ximootiyoosa 3:16) A giddon deꞌiya qofay Xoossay yootidoba. Hegaa gishshau, nuuni haggaazuwan Geeshsha Maxaafaa tumaa hiillan goꞌettiyo wode, geeshsha ayyaanaa kaaletuwaa kaalloos. Hegaadan waatidi oottana danddayiyaakko beꞌanaappe kasetidi, he Qaalay ay keena wolqqaamakko ane qoppoos.

‘Xoossaa Qaalay Oottees’

4. Geeshsha Maxaafay issi uri ayba ogiyan laamettanaadan maaddana danddayii?

⁴ Xoossaa qaalau woykko a giddon deꞌiya qofau gita wolqqay deꞌees! (Ibraawe 4:12) Geeshsha Maxaafan deꞌiya qofay, leemiso hanotan kureenne kolzzee issippe gayttiyoosaa shaakkana gakkanaassi caddiyo gishshau, asi medhiyo ay bisoppekka aadhidi qarattees. Geeshsha Maxaafaa tumay issi uraa wozanaa denttetteesinne a koshshaanne qofaa shaakkidi, i ay mala asakko qonccissees. Geeshsha Maxaafaa tumay issi ura denttetteesinne laamettanaadan oottees. (Qolasiyaasa 3:10 nabbaba.) Ee, Xoossaa Qaalay asa deꞌuwaa laammana danddayees!

5. Geeshsha Maxaafay nuna ayba ogiyan kaalettana danddayii, wurssettan ay demissii?

⁵ Hegaa bollikka, Geeshsha Maxaafay aara laggetiyay baynna aadhida eray deꞌiyo maxaafa. Ha wuttaawulettida alamiyan asay waani deꞌana danddayiyaakko maaddiya qofaa oyqqiis. Xoossaa Qaalay nu tanggo xallaassa gidennan nuuni baana ogiyaukka pooꞌo. (Mazamure 119:105) Nuuni laggeta, wodiyaa aattiyoobaa, oosuwaa, maayuwaanne hegaa mala harabata dooriyo wode woykko nuna metoy gakkiyo wode keehippe maaddees. (Mazamure 37:25; Leemiso 13:20; Yohaannisa 15:14; 1 Ximootiyoosa 2:9) Xoossaa Qaalan deꞌiya baaso siraatata nuuni oosuwan peeshshiyoogee haratuura loꞌꞌo gaytotettay deꞌanaadan maaddees. (Maatiyoosa 7:12; Piliphphisiyuusa 2:3, 4) Nuuni baana ogee leemiso hanotan wagaggidi pooꞌiyo wode, nuuni kuuyiyoobay ay kaalettanaakko akeekana danddayoos. (1 Ximootiyoosa 6:9) Geeshsha Maxaafay Xoossay sinttanau halchidobaakka yootees; nuuni he halchuwaara moggiya ogiyan deꞌanaadankka maaddees. (Maatiyoosa 6:33; 1 Yohaannisa 2:17, 18) Issi uri Xoossay immido baaso siraatan ba deꞌuwaa kaalettiyaaba gidikko, keehi ufayssiya deꞌo daana danddayees!

6. Nuuni ayyaanaaban olettiyo wode Geeshsha Maxaafay wolqqaama miishshadan waati maaddii?

⁶ Geeshsha Maxaafay nuuni ayyaanaaban olettiyo wode, wolqqaama miishsha gididikka maaddiyoogaa qoppite. PHauloosi Xoossaa Qaalaa “Geeshsha Ayyaanaa bisuwaa” yaagiis. (Efisoona 6:12, 17 nabbaba.) Geeshsha Maxaafaa loyttidi goꞌettiyo wode, asay Seexaanau aylletiyoogaappe ayyaanaaban naxa kiyanaadan oottana danddayees. Hegee asaa woriya biso gidennan ashshiya biso. Nuuni a hiillan goꞌettanau baaxetana koshshennee?

Xoossaa Qaalaa Suure Goꞌettiyoogaa

7. “Geeshsha Ayyaanaa bisuwaa” loytti goꞌettiyoogaa tamaarana koshshiyoy aybissee?

⁷ Issi wotaaddaray ba ola miishshaa loytti goꞌettiyoogaa meezetidaabanne tamaaridaba gidikko, olaa wode muruta ogiyan goꞌettana danddayees. Nuuni ayyaanaaban olettiyo wode, “Geeshsha Ayyaanaa bisuwaa” goꞌettiyoy hegaara issi mala ogiyaana. PHauloosi: “Neeni Xoossaa tumatettaa qaalaa suuretettan yootiyaagaanne qassi a oosuwaayyo yeellatenna oosanchcha gidada, Xoossai sabbiyo asadan, ne huuphiyaa Xoossau immanau minna” giidi xaafiis.—2 Ximootiyoosa 2:15.

8, 9. Geeshsha Maxaafay giyoobaa akeekanau nuna aybi maaddii? Leemisuwaa yoota.

⁸ Nu haggaazuwan ‘tumatettaa qaalaa suuretettan yootanau’ aybi maaddii? Geeshsha Maxaafan deꞌiyaabaa haratuyyo qonccissidi yootanaappe kase, nuuni hegaa loyttidi akeekana koshshees. Hegee xiqisiyaa yuushuwan deꞌiya qofaa akeekiyoogaa gujjees.

⁹ Issi xiqisiyaa suure akeekanau a yuushuwan deꞌiya qofaa akeekana koshshees. Galaatiyaa 5:13n PHauloosi goꞌettido qaalay hegau leemiso. I: “Inttena gidikko, ta ishanttoo, ailletettaappe kiyanau xeesettideta. Gidinkka ailletettaappe intte kiyidoogan, intte asatettaa amoi inttena haaroppo. Hegaa gishshaa siiquwan issoi issuwaayyo haarettite” yaagidi xaafiis. PHauloosi ayba aylletettaappe kiyiyoogaa yootidee? I yootidoy nagaraanne hayquwaa woy worddo ammanuwaa woy hegaa mala hara aylletettaappe kiyiyoogee? Xiqisiyaa yuushuwan deꞌiya qofay ‘higgiyaa qanggettaappe wozettidi’ naxa kiyiyoogaa PHauloosi yootidoogaa qonccissees. (Galaatiyaa 3:13, 19-24; 4:1-5) I yootidoy Kiristtaaneti naxa kiyiyoogaabaa. He naxatettaa nashshiyaageeti issoy issuwau siiquwan haarettoosona. Siiqennaageeti zigiroosonanne ooyettoosona.—Galaatiyaa 5:15.

10. Geeshsha Maxaafaa loyttidi akeekanau ay qoppana koshshii, he qofaa awuppe demmana danddayiyoo?

¹⁰ Issi xiqisiyaa birshshettaa suure akeekanau hegaara gayttida hanota ubbaa, giishin he maxaafaa xaafida uraa, awudenne ayba hanotan xaafettidaakko akeekana koshshees. Maxaafay ayba halchuwan xaafettidaakko, danddayettiyaaba gidikko qassi, he wode deꞌiya asaa wogaa, eeshshaa, eti xoqqu oottidi xeelliyoobaanne eta goynuwaabaa akeekiyoogeekka maaddees.a

11. Xiqisiyaa qonccissiyo wode akeekana koshshiyoy aybee?

¹¹ “Tumatettaa qaalaa suuretettan” yootiyoogee Geeshsha Maxaafaa tumaa suure qonccissiyoogaappe aadhiyaabaa gujjees. Geeshsha Maxaafaa asa yashissanau goꞌettennaadan naagettana koshshees. Yesuusi Dabloosan paacettido wode oottidoogaadan, nuuni tumau exatiyoogaa bessanau Geeshsha Maxaafaa goꞌettana danddayiyaaba gidikkonne, asa wolqqan ammanttanau woy yeellayanau goꞌettana bessenna. (Zaarettido Wogaa 6:16; 8:3; 10:20; Maatiyoosa 4:4, 7, 10) Nuuni kiitettida PHeexiroosa zoriyaa oosuwan peeshshana koshshees: “Kiristtoosa intte wozanan bonchchitenne a intte Goda oottite. Xoossai intteyyo immana giido inttenan de7⁠iyaagau gaaso oichchiya ooyyoonne zaaro immanau ubba wode giigi uttite; shin hegaa ashkketettaaninne yashshatettan oottite.”—1 PHeexiroosa 3:15.

12, 13. Xoossaa Qaalaa tumay laalana danddayiyo ‘qatoy’ aybee? Leemisuwaa yoota.

¹² Suure goꞌettiyaaba gidikko Xoossaa Qaalay ay polana danddayii? (2 Qoronttoosa 10:4, 5 nabbaba.) Geeshsha Maxaafaa tumay “qatuwaa laalanau” danddayees; giishin worddo timirttiyaa, qohiya oosuwaa, polo gidenna asaa naatu eran baasettida qofaa qoncciyaa kessees. “Xoossaa eratettaa bolli denddidi xubbiya” qofaa laalanau Geeshsha Maxaafaa goꞌettana danddayoos. Harati tumaara moggiya ogiyan deꞌanau bantta qofaa giigissanaadan maaddanau Geeshsha Maxaafaa timirttiyaa goꞌettana danddayoos.

¹³ Leemisuwau, Hindde biittan deꞌiya, layttay 93 gidido maccaaseebaa qoppite. A naatettaappe doommada shemppoy hara mereta gididi zaaretti yelettees giya timirttiyaa ammanausu. A hara biittan deꞌiya ba naꞌaara dabddaabbiyan Geeshsha Maxaafaa xannaꞌiyoogaa doommido wode, Yihoowabaanne i gelido qaalaabaa tamaarada ammanaasu. SHin, shemppoy hara mereta gididi zaaretti yelettees giya timirttiyaa a mintta ammaniyo gishshau, i naꞌay hayqqida asaa hanotaabaa xaafido wode eqettaasu. A hagaadan gaasu: “Intte Geeshsha Maxaafay giyoobay ammananau taayyo metiyaaba. Ubba haymaanootee nu giddon hayqqennabay deꞌiyoogaa tamaarissees. Taani ashoy hayqqiyoogaanne ayfiyan beettennabay hara mereta gididi 8,400,000⁠too zaaretti zaaretti yelettiyoogaa ammanaydda takkaas. Hagee tuma gidana danddayennay aybissee? Ha ubba haymaanootee balee?” ‘Geeshsha ayyaanaa bisoy’ hegaa mala qatuwaa laalana danddayii? A he allaalliyaara gayttidaagan Geeshsha Maxaafaappe gujo qofaa demma simmada amarida saaminttaappe guyyiyan: “Taani hayqqida asaabaa tumaa wurssettan akeekiyoogaa doommaas. Asay hayquwaappe denddiyo wode nuuni siiqiyoogeetuura gayttana danddayiyoogaa eridoogee tana keehi ufayssiis. Xoossaa Kawotettay matan yaanaagaa yeemottays” yaagada xaafaasu.

Ammanttanau Goꞌettite

14. Nuuni yootiyoobaa siyiyaageeta ammanttiyoogaa giyoogee woygiyoogee?

¹⁴ Haggaazuwan Geeshsha Maxaafaappe yootiyoogaa xallay a muruta ogiyan goꞌettiyoogaa bessenna. PHauloosi ‘ammanttiya’ ogiyan yootiis; nuunikka hegaadan oottana bessees. (Oosuwaa 19:8, 9; 28:23 nabbaba.) “Ammanttiyoogaa” giyoogee “akeekanaadan oottiyoogaa” giyoogaa. Ammanida uri “issibay tuma gidiyoogan ammanettees.” Nuuni issi uri Geeshsha Maxaafay yootiyoobaa ammananaadan oottiyo wode, i he timirttiyaa akeekidi ammanettanaadan oottoos. Hegaadan oottanau, nuuni yootiyoobaa siyiya uraa hegee tuma gidiyoogaa ammanttana koshshees. Kaallidi deꞌiyaagaadan hegaa oottana danddayoos.

15. Asay Geeshsha Maxaafaa bonchanaadan oottiya ogiyan xiqisiyaa waatada goꞌettana danddayay?

¹⁵ Xoossaa Qaalaa bonchanaadan oottiya ogiyan xiqiseta goꞌetta. Neeni xiqisiyaa erissiyo wode, he allaalliyaara gayttidaagan Xoossaa qofaa eriyoogee keehippe koshshiyoogan xeelaa wotta. Issi oyshaa oychada keettaawaa zaaruwaa siya simmada, kaallidi deꞌiyaagaadan gaana danddayaasa: ‘Ha allaalliyaa xeelliyaagan Xoossaa qofay aybakko ane beꞌoos.’ Woy, ‘Hagaa xeelliyaagan Xoossay woygii?’ gaada oychana danddayaasa. Xiqisiyaa hagaadan erissiyoogee, Geeshsha Maxaafay Xoossay immidoogaa gidiyoogaa qonccissees; qassi nuuni yootiyoobaa siyiyaageeti a bonchanaadan maaddees. Xoossaa ammaniya ura gididi, Geeshsha Maxaafay tamaarissiyoobaara meezetibeenna urau markkattiyo wode, hegaadan oottiyoogee keehi koshshees.—Mazamure 19:7-10.

16. Neeni xiqisiyaa suure qonccissanaadan maaddiyay aybee?

¹⁶ Xiqisiyaa nabbabiyoogaappe aadhiyaabaa ootta; qonccissa. PHauloosi ba tamaarissiyoobaa ‘birshshidi yootiyoogaanne tuma gididoogaa erissiyoogaa’ meeze oottiis. (Oosuwaa 17:3) Geeshsha Maxaafaa xiqisiyan darotoo issi qofaappe daroy dees; neeni tobbiyoobau haniya qofaa dummayada qonccissiyoogaa koshshana danddayees. Qofay deꞌiyo qaalaa zaarettada yootiyoogan, woykko keettaaway hegaa akeekanaadan maaddiya oyshaa oychiyoogan hegaadan oottana danddayaasa. Yaatada, xiqisiyan deꞌiya he qofaa qonccissa. Hegaappe guyyiyan, neeni yootiyoobaa ezggiyaagee he xiqisiyaa ba deꞌuwan waatidi oosuwan peeshshanaakko akeekanaadan maadda.

17. Geeshsha Maxaafaappe ammanttiya ogiyan waatada yootana danddayay?

¹⁷ Geeshsha Maxaafaappe ammanttiya ogiyan yoota. PHauloosi kehanne ammanttiya hanotan “Xoossaa maxaafatuppe asaara haasayiis.” (Oosuwaa 17:2, 4) Neeni yootiyoobaa siyiyaageetu wozanaa denttettanau aagaadan oottanau baaxeta. Izaawuyyo qoppiyoogaa bessiya liiqo oyshaa oychiyoogan a wozanan deꞌiyaabaa ‘duuqqa.’ (Leemiso 20:5) Keha gidennabaa haasayennaadan naagetta. Qonccenne ammanttiya ogiyan haasaya. Hegau ammanttiya naqaashaa yoota. Neeni yootiyoobay Xoossaa Qaalan baasettidaagaa gidana bessees. Naaꞌꞌu woy heezzu xiqisiyaa bolli bollan nabbabiyoogaappe issi xiqisiyaa qonccissiyoogaaninne qofaa leemisuwan yootiyoogan loyttidi goꞌettiyoogee loꞌꞌo. Qofaa kaafiya naqaashaa goꞌettiyoogee “asi ekkiyo,” ammanttiya haasayaa haasayanaadan maaddees. (Leemiso 16:23) Issi issitoo, pilggidi gujo qofaa yootiyoogee koshshana danddayees. Qommoora yootido 93 laytta maccaasiyaa shemppoy (woykko ayyaanay) hayqqenna giyo timirttee keehi aakkidoy aybissakko erana koshshiis. Geeshsha Maxaafay hegaa xeelliyaagan tamaarissiyoobaa o ammanttanau he timirttiyaa dendduwaabaanne hegee waanidi daro haymaanootiyaa timirtte gididaakko yootana koshshiis.b

Hiillan A Goꞌettiyoogaa Aggoppite

18, 19. Nuuni “Geeshsha Ayyaanaa bisuwaa” hiillan ubbatoo goꞌettana koshshiyoy aybissee?

¹⁸ “Ha sa7aa merai” laamettiiddi deꞌiyoogaa Geeshsha Maxaafay yootees. Iita asati kaseppe iiti iiti boosona. (1 Qoronttoosa 7:31; 2 Ximootiyoosa 3:13) Yaatiyo gishshau, “Geeshsha Ayyaanaa bisuwaa, Xoossaa qaalaa” goꞌettidi nuuni ubbatoo “qatuwaa” laaliyoogee keehippe koshshiyaaba.

¹⁹ Worddo timirttiyaa asaa wozanaappe xayssanaunne suure asaa wozanaa denttettanau nuuyyo Xoossaa Qaalaa, Geeshsha Maxaafay deꞌiyoogeenne an goꞌettiyoogee keehippe ufayssiyaaba! Geeshsha Maxaafaa qofay laalana danddayenna qatoy baawa. Hegaa gishshau, Xoossay nuuyyo immido, Kawotettaabaa awaajjiyo oosuwan “geeshsha ayyaanaa bisuwaa” hiillan goꞌettanau wozanappe baaxettiyaageeta gidoos.

[Footnotes]

Ay Tamaaradii?

• Xoossaa Qaalay ay keena wolqqaamee?

• ‘Tumatettaa qaalaa suuretettan yootana’ danddayiyoy ayba ogiyaanee?

• Geeshsha Maxaafaa qofay “qatuwaa” waatana danddayii?

• Haggaazuwan asaa kaseegaappe aaruwan waatada ammanttana danddayay?

[Sinttaa 18n diya misiliyaa]

Xoossaa Qaalaa Ammanttiya Hanotan Goꞌettiyo Ogiyaa

[Sinttaa 18n deꞌiya misiliyaa]

▪ Geeshsha Maxaafaa bonchanaadan ootta

▪ Xiqisiyaa qonccissa

▪ Ammanttiyaanne wozanaa denttettiya ogiyan yoota

[Sinttaa 17n deꞌiya misiliyaa]

Neeni “Geeshsha Ayyaanaa bisuwaa” loyttada goꞌettiyoogaa tamaarana bessees