Yelagatoo, Yihoowayyo Haggaazanau Minttidi Koyite

“Ne yelagatettaa laittan nena Medhdhidaagaa qoppa.” —ERANCHCHAA 12:1.

1. Israaꞌeele biittan deꞌiya naati ay oottanaadan shoobettidonaa?

YIHOOWAY kiittin hananabaa yootiya Muusee 3,500 gidiya layttappe kase, Israaꞌeele biittaa qeesetanne cimata: “Eti ubbaikka siyidi, GODAASSI, intte Xoossaassi, yayyiyoogaa tamaarana mala, ha higgiyaa qaala ubbaa ammanettidi polana mala, asaa, [attumaanne maccaa, naata] . . .  issippe shiishshite” yaagidi azaziis. (Zaarettido Wogaa 31:12) Goynuwau shiiqanaadan azazettidaageeti attumaa, maccaanne naata gidiyoogaa hassayite. Ee, Yihoowa kaaletuwaa kaallana, ezggananne tamaarana mala yootidoogeetu giddon naatikka deꞌoosona.

2. Beni wode Kiristtaane gubaaꞌiyan deꞌida yelagatuyyo qoppiyoogaa Yihooway waati bessidee?

² Yihooway baassi yayyiya yelagatuyyo qoppiyoogaa koyro xeetu layttankka aggibeenna. Leemisuwau, kiitettida PHauloosi gubaaꞌetussi kiittido issi issi dabddaabbetun yelagatussi kaaletuwaa xaafanaadan ayyaanay denttettiis. (Efisoona 6:1; Qolasiyaasa 3:20 nabbaba.) Hegaa mala zoriyaa oosuwan peeshshida yelaga Kiristtaaneti saluwan deꞌiya bantta siiqo Aawaa kaseegaappe aaruwan nashshidosona; qassi a anjjuwaa demmidosona.

3. Ha wodiyan deꞌiya yelagati Yihoowayyo oottanau koyiyoogaa waatidi bessiyoonaa?

³ Ha wodiyan deꞌiya yelagati Yihoowayyo goynnanau shiiqana mala shoobettidonaa? Ee! “Issoy issuwaara waani siiqettanaakkonne qassi loꞌꞌo oosuwaa waati oottanaakko, issoy issuwau qoppoos. Issooti issooti shiiquwaa aggiyoogaa meeze oottidoogaadan, nuuni issippe shiiqiyoogaa aggokko; shin wurssettay matattiyoogaa intte beꞌiyo gishshau, issoy issuwaa minttettoos” yaagiya PHauloosa zoriyaa alame yuushuwan Xoossau oottiya daro yelagati oosuwan peeshshiyoogaa beꞌiyoogee Xoossaa asaa ubbaa keehi ufayssiyaaba. (Ibraawe 10:24, 25, NW) Hegaa bollikka, daro naati banttana yelidaageetuura Xoossaa Kawotettaa mishiraachuwaa sabbakoosona. (Maatiyoosa 24:14) Qassi layttan layttan daro shaꞌan qoodettiya yelagati xammaqettiyoogan Yihoowa wozanappe siiqiyoogaa bessoosonanne Kiristtoosi erissiyo ashkkara gidiyoogan anjjuwaa demmoosona.—Maatiyoosa 16:24; Marqqoosa 10:29, 30.

SHoobiyaa Ekkite—Haꞌꞌi

4. Baassi oottanaadan Xoossay shoobbiyo shoobiyaa yelagati ekkana danddayiyoy awudee?

⁴ Eranchchaa 12:1y: “Ne yelagatettaa laittan nena Medhdhidaagaa qoppa” yaagees. Yihoowayyo goynnanaadaaninne oottanaadan siiquwan shiiqida he shoobiyaa ekkanau yelagatu layttay woqqa gidana koshshii? Layttay woqqa gidana koshshiyaakko Geeshsha Maxaafan qonccibeenna. Yaatiyo gishshau, intte Yihooway giyoobaa siyanaunne ayyo oottanau guutta naꞌa gi qoppidi, guyye gooppite. Intte layttay woqqa gidikkokka, haganaa sugennan ha shoobiyaa ekkanaadan minttettoos.

5. Bantta naati ayyaanaaban diccanaadan yelidaageeti waatidi maaddana danddayiyoonaa?

⁵ Intteppe daroti ayyaanaaban diccanaadan intte aawaynne aayyiyaa maaddidosona woykko etappe issoy maaddiis. Intte hanotay hegaadaana gidikko, beni wode Ximootiyoosa hanotaara issi mala. A aayyiyaa Euniiqanne a aayee aayyiyaa Loyda guutta naatettaappe doommidi geeshsha maxaafata a tamaarissidosona. (2 Ximootiyoosa 3:14, 15) Nena yelidaageeti, hegaara issi mala hanotan Geeshsha Maxaafaa nenaara xannaꞌiyoogan, nenaara woossiyoogan, Xoossaa asay shiiqiyo gubaaꞌe shiiquwaanne gita shiiquwaa nena ekkidi biyoogaaninne nenaara issippe haggaaziyoogan nena loohissennan aggokkona. Nena Xoossaa ogiyaa tamaarissiyoogee Yihooway nena yelidaageetuyyo immido gita aawatetta. Eti nena siiqiyoogaanne neessi qoppiyoogaa nashshay?—Leemiso 23:22.

6. (a) Mazamure 110:3 maaraadan, ay mala goynoy Yihoowa ufayssii? (b) Nuuni haꞌꞌi ay beꞌanee?

⁶ SHin yelagatoo, intte gasttiyo wode, Ximootiyoosaagaadan “Xoossai koyiyoobi, lo77⁠obi, a ufaissiyaabinne qassi kumettabi aibakko erana” mala Yihooway koyees. (Roome 12:2) Intte hegaadan oottikko, inttena yelidaageeti koyiyo gishshataassa gidennan, Xoossaa sheniyaa oottanau koyiyo gishshau, ayyaanaabaa oosuwaa ootteeta. Intte intte dosan Yihoowayyo oottiyaaba gidikko, hegee a ufayssees. (Mazamure 110:3) Yihooway giyoobaa siyanaunne a kaaletuwaa kaallanau mintti koyiyoogaa waatidi bessana danddayeetii? Intte hegaadan oottana danddayiyo, keehippe koshshiya heezzu ogeta beꞌana. Hegeeti xinaatiyaa, woosaanne eeshshaa. Hegeeta ane huuphiyan huuphiyan pilggoos.

Yihoowa Oonatettaa Erite

7. Yesuusi Geeshsha Maxaafaa tamaare gidiyoogan leemiso gidiyoy ayba ogiyaanee, i hegaadan oottanaadan maaddidabay aybee?

⁷ Intte galla galla Geeshsha Maxaafaa nabbabiyoogee, Yihoowayyo oottanau mintti koyiyoogaa bessiyo koyro oge. Ubbatoo Xoossaa Qaalaa nabbabiyoogan intte ayyaanaabaa saamuwaa alanaunne Geeshsha Maxaafaa alꞌꞌo eraa demmanau danddayeeta. (Maatiyoosa 5:3) Yesuusi hegau leemiso gidiyaabaa oottiis. Ayyo layttay 12 gidido wode, beeta maqidasiyan “tamaarissiyaageetuppe siyiiddinne eta oichchiiddi eta giddon uttidaagaa” a aayyiyaanne a aaway demmidosona. (Luqaasa 2:44-46) Yesuusi naatettan Geeshsha Maxaafaa dosiyoogaanne loyttidi akeekiyoogaa qonccissiis. I hegaadan oottanau maaddidabay aybee? A aayyiyaa Mayraamanne a dichida aaway Yooseefi hegau keehippe maaddidoogee sirissenna. Eti Yesuusa naatettaappe doommidi Xoossaabaa tamaarissida, Xoossaa ashkkarata.—Maatiyoosa 1:18-20; Luqaasa 2:41, 51.

8. (a) Yelidaageeti bantta naati Xoossaa Qaalaa dosanaadan loyttidi tamaarissiyoogaa awude doommana koshshii? (b) Naata naatettaappe doommidi loohissiyoogaa goꞌꞌaa qonccissiya temokruwaa yoota.

⁸ Hegaadan, ha wodiyan Xoossau yayyiya yelidaageeti bantta naata naatettaappe doommidi Geeshsha Maxaafaa tumaa dosanaadan loyttidi tamaarissiyoogaa goꞌꞌaa akeekoosona. (Zaarettido Wogaa 6:6-9) Ruubo geetettiya issi Kiristtaane michiyaa ba bayra naꞌaa Jooseefa yelada takkennan hegaadan oottaasu. Geeshsha Maxaafaa Taariketa Tamaariyo Maxaafaappe ubba galla ayyo nabbabausu. I dicci dicci biyo wode, daro xiqiseta hassayanaadan maaddaasu. He loohissuwan Jooseefi goꞌettidee? I haasayaa doommosaara Geeshsha Maxaafaa taariketa darota yootiyoogaa doommiis. Ayyo layttay ichasha gidido wode, Tiꞌokiraase Haggaazo Timirtte Keettan kifiliyaa shiishshiis.

9. Geeshsha Maxaafaa nabbabiyoogeenne intte nabbabidoban wotti denttidi qoppiyoogee keehippe koshshiyoy aybissee?

⁹ Yelagatoo, ayyaanaaban kaseegaappe aaruwan diccanau, yelagatettan gidin gasttidikka Geeshsha Maxaafaa galla galla nabbabiyoogaa intte meeze oottana koshshees. (Mazamure 71:17) Intte ayyaanaaban diccanau Geeshsha Maxaafaa nabbabiyoogee maaddiyoy aybissee? Yesuusi ba Aawaakko woossido woosan woygidaakko hassayite: “Asai nena issi Xoossaa gididaagaa erana . . . mala, hagee merinaa de7⁠o.” (Yohaannisa 17:3) Intte Yihoowa xeelliyaagan daro eraa demmido payduwan, a oonatettaa loyttidi ereetanne a keehippe siiqeeta. (Ibraawe 11:27) Yaatiyo gishshau, Geeshsha Maxaafaappe amaridaagaa nabbabiyo wode ubban, he injjiyaa Yihoowabaa darobaa eranau goꞌettite. ‘Ha qofay Yihoowa oonatettaa xeelliyaagan tana ay tamaarissii? Ha qofay Xoossay tana siiqiyoogaanne taassi qoppiyoogaa waati qonccissii?’ yaagidi inttena oychite. Hegaa mala oyshatun wotti denttidi qoppanau wodiyaa immiyoogee Yihoowa qofaa, au siyettiyaabaanne i intteppe koyiyoobaa eranau maaddees. (Leemiso 2:1-5 nabbaba.) Yelaga Ximootiyoosadan, intte Geeshsha Maxaafaappe eridobaa ‘ammananau,’ qassi Yihoowayyo intte dosan goynnanau koyana danddayeeta.—2 Ximootiyoosa 3:14, NW.

Intte Yihoowa Keehippe Siiqanaadan Woosay Maaddiyo Ogiyaa

10, 11. Intte Xoossaayyo oottanau minttidi koyanau woosay waati maaddii?

¹⁰ Intte kumetta wozanaappe Yihoowayyo oottanau keehippe koyanaadan maaddiya naaꞌꞌanttobay woosaa. Mazamure 65:2y: “Abeet woosaa siyiyaagoo, asai ubbai neekko yaana” yaagees. Israaꞌeele deree Xoossaara maacettida asa gididi deꞌiyo wodekka, Yihoowa beeta maqidasiyaa yiida kare biittaa asay akko woossana danddayiis. (1 Kawotu 8:41, 42) Xoossay asaa asaappe shaakkenna. A azazuwaa naagiyaageeti i eta woosaa siyanaagaa ammanettoosona. (Leemiso 15:8) “Asai ubbai” giya qofay inttena yelagatakka gujjiyoogee qoncce.

¹¹ Loꞌꞌo laggetettau koyettiyaabatuppe issoy loꞌꞌo hanotan issoy issuwaara haasayiyoogaa. Intte mata laggetuyyo intte qofaa, inttena qofissiyaabaanne inttessi siyettiyaabaa yootiyoogan ufayttennan aggekketa. Hegaara issi mala hanotan, wozanappe woossiyoogan inttena Medhida Xoossaara haasayeeta. (Piliphphisiyuusa 4:6, 7) Inttena yelidaageetuyyo woykko intte mata laggetuyyo intte wozanan deꞌiyaabaa yootiyoogaadan, Yihoowayyo yootite. Intte woossiyo ogee Yihoowa xeelliyaagan intteyyo siyettiyaabaa keehippe qonccissiyaaba gidiyoogee tuma. Yihoowaara deꞌiya dabbotay minnido payduwan, intte woosay wozanappe gidana.

12. (a) Wozanappe gidida woosay haasayiyoogaappe aadhiyaabaa gujjiyoy aybissee? (b) Yihooway intteyyo matan deꞌiyoogaa akeekanaadan aybi maaddii?

¹² Gidikkokka, wozanappe gidida woosay haasayappe aadhiyaaba gujjiyoogaa akeekite. Hegee intte wozanan siyettiyaabaa gujjees. Yihoowa keehippe siiqiyoogaanne bonchiyoogaa, qassi kumetta ogiyan an zemppiyoogaa intte woosan qonccissite. Yihooway intte woosaa waatidi zaaridaakko akeekiyo wode, “GODAI bana xeesiya ubbau, . . . matan” deꞌiyoogaa awudeegaappenne aaruwan akeekeeta. (Mazamure 145:18) Ee, intte Dabloosa eqettanaadan minttiyoogaaninne deꞌuwan bessiya dooruwaa dooranaadan maaddiyoogan Yihooway inttekko shiiqees.—Yaaqooba 4:7, 8 nabbaba.

13. (a) Xoossaa dabbo gidiyoogee issi michchiyo waatidi maaddidee? (b) Xoossaa dabbo gidiyoogee laggetu sugettaa xoonanaadan nena waatidi maaddii?

¹³ Yihoowaara mata dabbotaa medhiyoogan SHeera waatada minttettuwaa demmidaakko akeekite. A timirttiyaaninne ispporttiyan gooba gidido gishshau, naaꞌꞌantto xekka timirtte keettan woytuwaa demmaasu. A timirttiyaa wurssido wode, xoqqa timirttiyaa kaallanau danddayissiya, miishsha qanxxennan tamaariyo injjiyaa demmaasu. SHeera: “He injjee amoyiyaaba; qassi ispporttiyaa tamaarissiyaageetinne tanaara tamaariya naati hegaa eeno gaada ekkanaadan tana unꞌꞌissidosona” yaagaasu. Gidikkokka, xoqqa timirttiyaa kaalliyoogee, xinaatiyaaninne ispporttiyaa oottiyoogan daro wodiyaa aattanaadan oottiyo gishshau, Yihoowayyo oottanau wode demmennaagaa akeekaasu. SHeera ay oottadee? A, “Yihoowakko woossa simmada, he shoobiyaa ekkennan ixxada kumetta wode aqinye gidada oottiyoogaa doommaas” yaagaasu. Yaatada, hanno gakkanaassi ichashu layttau aqinye gidada oottaydda deꞌausu. A, “Taani mulekka zilꞌꞌettikke. Yihoowa ufayssiya kuushshaa kuuyidoogaa eriyoogee tana ufayssees. Issi uri kasetidi Xoossaa Kawotettaa koyiyaaba gidikko, harabaa ubbaa demmanaagee tuma” yaagaasu.—Maatiyoosa 6:33.

Loꞌꞌo Eeshshay Intte “Wozanai Geeshsha” Gidiyoogaa Qonccissees

14. Intte loꞌꞌo eeshshay Yihoowa sinttan keehippe koshshiyaaba gididoy aybissee?

¹⁴ Intte Yihoowayyo wozanappe eeno giidi oottiyoogaa bessana danddayiyo heezzantto ogee intte eeshshaa. Kandduwaaban geeshsha gididi deꞌiya yelagata Yihooway anjjees. (Mazamure 24:3-5 nabbaba.) Qeese ubbatu halaqaa Eela naatu shori baynna oosuwaa yelaga Sameeli kaallennan ixxiis. Sameela loꞌꞌo eeshshay ooninne akeekiyooba. Geeshsha Maxaafay: “Na7ai Sameeli GODAA sinttaaninne asaa sinttan dicciisinne sabettiis” yaagees.—1 Sameela 2:26.

15. Intte loꞌꞌo eeshshaa naagidi deꞌanaadan oottiya issi issibati aybee?

¹⁵ Nuuni deꞌiyoy banttana siiqiya, ceeqettiya, yelidaageetussi azazettenna, galatenna, ammanettenna, kehenna, otoruwan sugettiya, Xoossaappe aattidi miishshaa siiqiyaa asay kumido alamiyaana. Ha eeshshati PHauloosi yootidobatuppe amaridaageeta. (2 Ximootiyoosa 3:1-5) Yaatiyo gishshau, intte yuushuwan iitatettay kumidaashin loꞌꞌo eeshshaa naagidi deꞌiyoogee metiyaaba gidana danddayees. Gidikkokka, intte suure gididabaa oottiyoonne iitabaappe haakkiyo wode ubban, ubbabaa haariyo maataa xeelliyaagan denddida oyshan Yihoowa bagga gidiyoogaa besseeta. (Iyyooba 2:3, 4) “Ta na7au, neeni aadhdhida eranchcha gida. Yaatiyaakko taani ufaittananne tana boriyaageetu oishaakka zaarana” yaagidi Yihooway siiquwan woossiyoogau zaaruwaa immiyoogaa eriyoogeekka intte ufayttanaadan oottees. (Leemiso 27:11) Hegaa bollikka, Yihooway inttena nashshiyoogaa eriyoogee intte ayyo oottanau mintti koyanaadan maaddees.

16. Issi michiyaa Yihoowa wozanaa waatada ufayssadee?

¹⁶ Karlo geetettiya Kiristtaane michiyaa, yelagatettan timirtte keettan deꞌaydda Geeshsha Maxaafaa baaso siraataa mintta naagaasu; qassi i loꞌꞌo eeshshaa harati akeekidosona. Hanettidabay aybee? Karli zoriya wozanay Geeshsha Maxaafaappe tamaaridoban loohido gishshau, a baalata bonchennaagaappe denddidaagan iira tamaariyaageeti o baceessidosona. Hegaa mala wodee, issi issitoo a ba ammaniyoobaa haratussi yootanaadan injjiyaa medhiis. Karliira tamaarida issinna: “Nenaara gayttanaunne nena galatanau ubbatoo amottaydda takkaas. Neeni yelaga Kiristtaane gidiyoogaadan, ne loꞌꞌo eeshshaanne leemisuwaa, qassi baalaa xeelliyaagan xalatettan neeni ekkido tangguwaa akeekida uri deꞌees. Tanaara koyro gayttida Yihoowa Markki nena” yaagada daro layttay aadhi simmin, karddiyan xaafada iyyo kiittaasu. Karli leemisoy iira tamaariyaara guyyeppe Geeshsha Maxaafaa xinaatiyaa doommanaadan oottiis. A Karlissi kiittido karddiyan 40 layttappe dariya wodiyau xammaqettida Markka gidiyoogaa xaafaasu! Karlidan Geeshsha Maxaafaa baaso siraataa xalatettan mintti naagiya, ha wodiyan deꞌiya yelagatoo, wozanaa suure asati Yihoowa eranaadan denttettana danddayeeta.

Yelagati Yihoowa Galatoosona

17, 18. (a) Intte gubaaꞌiyan deꞌiya yelagata xeelliyaagan neeyyo aybi siyettii? (b) Xoossaa yayyiya yelagati sinttappe ay demmanee?

¹⁷ Alame yuushuwan Yihoowa dirijjitiyan deꞌiya nuuni ubbay, mishettidi tumu goynuwaa goynniya, shaꞌan qoodettiya yelagata beꞌiyoogan keehippe ufayttoos! He yelagati galla galla Geeshsha Maxaafaa nabbabiyoogan, woossiyoogaaninne Xoossaa sheniyaara moggottidi deꞌiyoogan Yihoowayyo goynnanau minttidi koyiyoogaa bessidosona. Hegaa mala leemiso gidiya yelagati banttana yelidaageetanne Yihoowa asaa ubbaa keehippe ufayssoosona.—Leemiso 23:24, 25.

¹⁸ Ammanettida yelagati sinttappe bashshaappe attidi, Xoossay qaalaa gelido ooratta alamiyan deꞌana. (Ajjuutaa 7:9, 14) Eti yan Yihoowa loytti eriiddinne nashshiiddi biyo wode, maalaaliya daro anjjuwaa demmanaunne Yihoowa merinau sabbanau danddayoosona.—Mazamure 148:12, 13.

Qonccissana Danddayay?

• Ha wodiyan yelagati tumu goynuwan shaahettana danddayiyoy ayba ogiyaanee?

• Geeshsha Maxaafaa nibaabiyaappe goꞌettanau neeni wotta dentta qoppiyoogee keehippe koshshiyoy aybissee?

• Woosay neeni Yihoowakko shiiqanaadan waatidi maaddii?

• Issi Kiristtaaniyaa loꞌꞌo eeshshay ay demissana dandday?

[Sinttaa 17n deꞌiya misiliyaa]

Galla galla Geeshsha Maxaafaa nabbabiyoogaa meeze oottadii?